ലോസ് ആഞ്ചലസ്: ആവേശം ഇരട്ടിച്ചുകൊണ്ടിരിക്കുന്ന ലോകകപ്പ് ഫുട്‌ബോള്‍ മത്സരങ്ങള്‍ക്ക് ഇന്ന് രണ്ടാം ക്വാര്‍ട്ടര്‍ പോരിന്റെ ചൂട്. ലോസ് ആഞ്ചലസില്‍ നടക്കുന്ന ഏറ്റുമുട്ടലില്‍ മുഖാമുഖം കാണുന്നത് സ്‌പെയിനും ബെല്‍ജിയവും. ഭാരത സമയം ഇന്ന് രാത്രി 12.30 നാണ് ഈ മത്സരം.
പ്രീക്വാര്‍ട്ടറില്‍ പോര്‍ച്ചുഗലിനെ 1-0ന് തോല്‍പ്പിച്ചാണ് സ്‌പെയിന്‍ ക്വാര്‍ട്ടറിലെത്തിയിരിക്കുന്നത്. ബെല്‍ജിയം ക്വാര്‍ട്ടറിലേക്ക് യോഗ്യത നേടിയത് പ്രീക്വാര്‍ട്ടറില്‍ ആതിഥേയരായ അമേരിക്കയെ 4-1ന് തോല്‍പ്പിച്ചാണ്. സ്‌പെയിന്‍-ബെല്‍ജിയം പോരില്‍ ജയിക്കുന്നവര്‍ ചൊവ്വാഴ്‌ച്ച രാത്രി നടക്കുന്ന ആദ്യ സെമിയില്‍ കളിക്കാന്‍ യോഗ്യത നേടും. ഇരു ടീമുകളും ഇതേവരെ ഒരു കളിയില്‍ പോലും തോല്‍ക്കാതെയാണ് ക്വാര്‍ട്ടര്‍ വരെ എത്തിയത്. ഗ്രൂപ്പ് ഘട്ടത്തില്‍ സ്‌പെയിന്‍ രണ്ട് കളി ജയിക്കുകയും ഒരെണ്ണത്തില്‍ സമനിലയില്‍ കുരുങ്ങുകയും ചെയ്തു. ബെല്‍ജിയം ഗ്രൂപ്പ് ഘട്ടത്തില്‍ ഒരു മത്സരത്തില്‍ മാത്രമാണ് വിജയിച്ചത്. രണ്ട് മത്സരങ്ങള്‍ സമനിലയിലായി.
