മയാമി: ലയണല് മെസിയും അര്ജന്റീനന് സ്പോര്ട്സ് മാധ്യമപ്രവര്ത്തകയായ സോഫി മാര്ട്ടിനെസും തമ്മിലുള്ള ഒരു ഓഫ് ദ ഫീല്ഡ് സംഭാഷണമാണ് ഇപ്പോള് സോഷ്യല് മീഡിയയുടെ ചര്ച്ചാ വിഷയം.
ദിവസങ്ങളായി പ്രചരിച്ച അഭ്യൂഹങ്ങള്ക്ക് മെസി നല്കിയ പരോക്ഷ മറുപടിയായാണ് ഇപ്പോഴത്തെ ചര്ച്ചയ്ക്കടിസ്ഥാനം. 2022 മുതല് മെസിയുടെ വിശേഷങ്ങള് ലോകത്തെ അറിയിക്കുന്ന പ്രധാന മാധ്യമപ്രവര്ത്തകയായ സോഫി മാര്ട്ടിനെസിനെ കേപ് വെര്ദെയ്ക്കെതിരായ മത്സരശേഷം മെസി കാണുകയും സംസാരിക്കുകയും ചെയ്ത് വിവാദങ്ങള് അവസാനിപ്പിക്കുകയായിരുന്നു മെസി. 2026 ലോകകപ്പിനിടെ അര്ജന്റീനയിലെ ചില ഗോസിപ്പ് മാധ്യമങ്ങളില് ഒരു അഭ്യൂഹം പ്രചരിച്ചിരുന്നു. സോഫി മാര്ട്ടിനെസിനെ അര്ജന്റീന ടീമിലെ താരങ്ങള് മനഃപൂര്വം ഒഴിവാക്കുകയാണെന്നായിരുന്നു പ്രചാരണം.
മെസ്സിയുടെ ഭാര്യ അന്റോണെല്ല റോക്കൂസോയ്ക്ക് സോഫിയുമായുള്ള മെസിയുടെ അഭിമുഖങ്ങളില് അസ്വസ്ഥതയുണ്ടായിരുന്നുവെന്നും അതിനാലാണ് സോഫിക്ക് ടീമിലേക്ക് പ്രവേശനത്തില് ബുദ്ധിമുട്ടുണ്ടായതെന്നും ചില മാധ്യമങ്ങള് അടിസ്ഥാനരഹിതമായി റിപ്പോര്ട്ട് ചെയ്തു. എന്നാല് ഈ ആരോപണങ്ങള്ക്ക് വിശ്വസനീയമായ തെളിവുകളൊന്നും പുറത്തുവന്നിരുന്നില്ല. കേപ് വെര്ദെയ്ക്കെതിരായ മത്സരശേഷം മിക്സ്ഡ് സോണില് മാധ്യമങ്ങളെ കാണാന് എത്തിയ മെസ്സി നേരെ സോഫി മാര്ട്ടിനെസിന്റെ അടുത്തേക്ക് നടന്നു. അദ്ദേഹം ആദ്യം അര്ജന്റീനന് രീതിയില് കവിളില് ഒരു സൗഹൃദചുംബനം നല്കി അഭിവാദ്യം ചെയ്തു. പിന്നീട് ചിരിച്ചുകൊണ്ട് പറഞ്ഞു: ‘പിന്നെ അവര് പറയും, ഞാന് നിന്നെ അഭിവാദ്യം ചെയ്തില്ലെന്ന്. ഞാന് നിന്നെ നോക്കിയാല് അതും വാര്ത്ത, അഭിവാദ്യം ചെയ്താലും അതും വാര്ത്ത.’ സോഫി മാര്ട്ടിനെസ് ഉടന് തന്നെ മറുപടി നല്കി: ‘നമുക്ക് ഏറ്റവും ഇഷ്ടമുള്ള കാര്യം ചെയ്യാം… നമ്മുടെ ജോലി.’ പിന്നീട് അഭിമുഖം അവസാനിച്ചശേഷം അവര് പറഞ്ഞു: ‘മെസിയുടെ ഈ സ്നേഹപൂര്വമായ സമീപനം ഞാന് ഒരുപാട് വിലമതിക്കുന്നു. കഴിഞ്ഞ ദിവസങ്ങളിലെ അനാവശ്യ അഭ്യൂഹങ്ങള്ക്കുള്ള ഏറ്റവും നല്ല മറുപടിയായിരുന്നു അത്.’അതോടൊപ്പം, ‘ഇതെല്ലാം നുണകളാണ്’ എന്നും അവര് വ്യക്തമാക്കി. ആരെയും നേരിട്ട് വിമര്ശിക്കാതെ മെസി തന്നെ അഭ്യൂഹങ്ങള്ക്ക് മറുപടി നല്കുകയായിരുന്നു.
