ടെഹ്‌റാന്‍: ഇറാന്‍ നിര്‍ദേശിച്ച പാതയിലൂടെ മാത്രം ഹോര്‍മൂസ് കടന്നുപോകാന്‍ വാണിജ്യ കപ്പലുകള്‍ക്കു കര്‍ശന നിര്‍ദേശമേകി ഇസ്ലാമിക് റെവല്യൂഷണറി ഗാര്‍ഡ്‌സ് കോര്‍ (ഐആര്‍ജിസി). അല്ലാത്തപക്ഷം ശക്തമായ നടപടി നേരിടേണ്ടി വരുമെന്ന് ഐആര്‍ജിസി സംയുക്ത സൈനിക കമാന്‍ഡ് ഖത്തം അല്‍-അന്‍ബിയ മുന്നറിയിപ്പ് നല്‍കി. ഹോര്‍മൂസ് നിര്‍വചിക്കപ്പെട്ടിരിക്കുന്നത് ഇറാന്റെ കീഴിലാണെന്നും സെന്റ്‌കോമിന്റെ കീഴിലല്ലെന്നും ഇറാന്‍ ഡെ. വിദേശകാര്യ മന്ത്രി കാസിം ഗരിബാബാദി വ്യക്തമാക്കി.
ദോഹയില്‍ ഇരുരാജ്യങ്ങളുടെയും പ്രതിനിധികള്‍ പങ്കെടുത്ത പരോക്ഷ ചര്‍ച്ചകള്‍ അവസാനിച്ചു. ചര്‍ച്ചയില്‍ ഒരാഴ്ചത്തേക്കു ഹോര്‍മൂസ് സംഘര്‍ഷം അവസാനിപ്പിക്കാന്‍ ഇരുപക്ഷവും ധാരണയായി. ഇറാന്റെ മരവിപ്പിച്ച ഫണ്ടുകള്‍ വിട്ടുകൊടുക്കാന്‍ ധാരണയായതായി റിപ്പോര്‍ട്ടുണ്ട്. കരാര്‍ ലംഘനങ്ങള്‍ വിശകലനം ചെയ്യാന്‍ ആശയ വിനിമയ ചാനല്‍ രൂപീകരിക്കാനും നിശ്ചയിച്ചു.
അടുത്ത റൗണ്ട് ചര്‍ച്ചകള്‍ മുന്‍ പരമോന്നത നേതാവ് ആയത്തുള്ള അലി ഖമേനിയുടെ സംസ്‌കാരത്തിനു ശേഷമേ ഉണ്ടാകൂവെന്നും ഇറാന്‍ അറിയിച്ചു. പരോക്ഷ ചര്‍ച്ചകളില്‍ പുരോഗതിയുള്ളതായി മധ്യസ്ഥത വഹിച്ച ഖത്തറും പാകിസ്ഥാനും അവകാശപ്പെട്ടു.
