ലക്നൗ ; വരുന്ന ഉത്തര്പ്രദേശ് നിയമസഭാ തെരഞ്ഞെടുപ്പിൽ കോൺഗ്രസിനെ അധികാരത്തിൽ തിരിച്ചെത്തിക്കുമെന്ന് ഉത്തർപ്രദേശിന്റെ പുതിയ കോൺഗ്രസ് ഇൻ-ചാർജ് രാജേന്ദ്ര പാൽ ഗൗതം. ചുമതലയേറ്റ ശേഷമുള്ള തന്റെ ആദ്യ ഉത്തർപ്രദേശ് സന്ദർശനത്തിനിടെ സംസാരിക്കുകയായിരുന്നു അദ്ദേഹം.
“2027ൽ ഞങ്ങൾ ഉത്തർപ്രദേശ് പിടിച്ചെടുക്കും, 2029ൽ രാഹുൽ ഗാന്ധിയെ രാജ്യത്തിന്റെ പ്രധാനമന്ത്രിയാക്കും”- എന്നായിരുന്നു അധികാരമേറ്റതിനു പിന്നാലെയുള്ള അദ്ദേഹത്തിന്റെ പ്രഖ്യാപനം. അംബേദ്കറും കോൺഗ്രസും തമ്മിൽ ഭിന്നതയിലായിരുന്നുവെന്ന് വരുത്തിത്തീർക്കാനുള്ള ശ്രമങ്ങളാണ് നടക്കുന്നത്. അംബേദ്കറും കോൺഗ്രസും തമ്മിൽ യാതൊരു അഭിപ്രായവ്യത്യാസവുമുണ്ടായിരുന്നില്ല. അവർ പരസ്പര പൂരകങ്ങളായിരുന്നു. അതുകൊണ്ടാണ് കോൺഗ്രസ് അദ്ദേഹത്തെ രാജ്യത്തിന്റെ ആദ്യത്തെ നിയമമന്ത്രിയാക്കിയതെന്നും ഗൗതം പറഞ്ഞു.
