മെക്സിക്കോ സിറ്റി: പ്രവചനങ്ങള് കൃത്യമാകുന്നു, മെക്സിക്കോ ഫുട്ബോളിന്റെ പുതിയ സൂപ്പര് സ്റ്റാറായി പതിനേഴുകാരന് ഗില്ബര്ട്ടോ മോറ മാറുന്നു. ഈ ലോകകപ്പില് ദക്ഷിണാഫ്രിക്കയ്ക്കെതിരായ ഉദ്ഘാടന മത്സരത്തില് പകരക്കാരനായി ഇറങ്ങി വിസ്മയം തീര്ത്ത ഗില്ബര്ട്ടോ മോറ ഇന്നലെ നോക്കൗട്ടില് കളിക്കാനിറങ്ങി മറ്റൊരു റിക്കോര്ഡും സ്വന്തമാക്കി. ഇക്വഡോറിനെതിരായ മത്സരത്തിലൂടെ ലോകകപ്പിന്റെ നോക്കൗട്ടില് കളിക്കുന്ന ഏറ്റവും പ്രായം കുറഞ്ഞ ലോകത്തെ രണ്ടാമത്തെ താരമായി മാറി. ഒന്നാമത്തെ താരമായ പെലെയെക്കാള് 20 ദിവസം മാത്രം പ്രായക്കൂടുതല്. 1958 ലോകകപ്പില് 17 വയസ്സും 239 ദിവസവും പ്രായമുള്ളപ്പോഴാണ് പെലെ ഇറങ്ങിയത്. മോറ ഇന്നലെ കളിക്കാനിറങ്ങിയപ്പോള് 17 വയസ്സും 259 ദിവസുമാണ് പ്രായം. മെക്സിക്കോയുടെ ഏറ്റവും പ്രായംകുറഞ്ഞ ലോകകപ്പ് താരവും ഈ ലോകകപ്പിലെ ഏറ്റവും പ്രായംകുറഞ്ഞ താരവും ഗില്ബെര്ട്ടോ മോറ തന്നെയാണ്.
മെക്സിക്കന് ഫുട്ബോളിലെ വളര്ന്നുവരുന്ന പ്രതിഭയായാണ് മോറയെ കണക്കാക്കുന്നത്. ഗ്രൂപ്പ് ഘട്ടത്തില് ദക്ഷിണാഫ്രിക്കയ്ക്കെതിരെ പകരക്കാരനായി ഇറങ്ങി ലോകകപ്പില് അരങ്ങേറിയ മോറ ലോകകപ്പ് കളിക്കുന്ന ഏറ്റവും പ്രായം കുറഞ്ഞ മെക്സിക്കന് താരമായി. 1930ലെ ആദ്യ ലോകകപ്പില് 18 വയസ്സും 134 ദിവസവും പ്രായമുള്ളപ്പോള് കളിച്ച മാനുവല് ചാക്വെറ്റാസ് റോസാസിന്റെ റിക്കോഡാണ് മോറ തിരുത്തിക്കുറിച്ചത്. ഇന്നലെ ഇക്വഡോറിനെതിരെയും ഗോളടിക്കാന് കഴിഞ്ഞല്ലെങ്കിലും താരം മൈതാനത്ത് ആവേശം തീര്ത്തു. 16-ാം മിനിറ്റില് ദൂരെനിന്നുതിര്ത്ത ഷോട്ട്, വളഞ്ഞ് പോസ്റ്റിന് തൊട്ടരികിലൂടെ കടന്നുപോയത് നിര്ഭാഗ്യമായി.
കളിക്കളത്തില് മിന്നുന്ന മുന്നേറ്റങ്ങള് നടത്താനുള്ള കഴിവാണ് താരത്തെ വ്യത്യസ്തനാക്കുന്നത്. പന്ത് കാലുകളില് എത്തുന്നതിന് മുന്പുതന്നെ തല ഇരുവശങ്ങളിലേക്കും വേഗത്തില് തിരിച്ച് സാഹചര്യങ്ങള് കൃത്യമായി നിരീക്ഷിക്കുന്ന സ്വഭാവം മോറയുടെ പ്രത്യേകതകളിലൊന്നാണ്. കൂടാതെ മികച്ച ഡ്രിബ്ലിങ് കഴിവും പന്തിന്മേലുള്ള നിയന്ത്രണവും പാസ്സിങ്ങിലെ കൃത്യതയും മറ്റ് താരങ്ങളില് നിന്ന് മോറയെ വ്യത്യസ്തനാക്കുന്നു. ഈ വൈദഗ്ദ്ധ്യം തിരിച്ചറിഞ്ഞ് മോറയെ ലോകത്തിലെ മികച്ച ഫുട്ബോള് ക്ലബ്ബുകളായ മാഞ്ചസ്റ്റര് സിറ്റി, യുണൈറ്റഡ്, റയല് മാഡ്രിഡ് ഉള്പ്പെടെയുള്ള വമ്പന് ക്ലബ്ബുകള് മോറയ്ക്കുവേണ്ടി വലവിരിച്ചിട്ടുണ്ട്.
