ഓസ്ലോ: ലോകകപ്പില് ഓരോ മത്സരം വിജയിക്കുമ്പോഴും നോര്വീജിയന് താരങ്ങളുടെ ഒരാഘോഷമുണ്ട് വൈക്കിങ് ആഘോഷമെന്നാണ് ഇതിനു പേര്. മൈതാനമധ്യത്ത് എല്ലാവരും ഇരുന്ന ശേഷം ഒരാള് ഡ്രം ഒക്കെ എടുത്ത് താളം മുഴക്കുന്നു. ഇതോടൊപ്പം ചേര്ന്ന് വലിയ ശബ്ദത്തോടെ കളിക്കാരും ഗാലറിയിലെ ആരാധകരും ശബ്ദമുയര്ത്തും. കഴിഞ്ഞദിവസം ഐവറി കോസ്റ്റിനെതിരായ മത്സരം വിജയിച്ച ശേഷവും താരങ്ങള് ഗ്രൗണ്ടില് ഇത്തരമൊരു ആഘോഷം നടത്തി. എന്നാല്, കാര്യങ്ങള് അവിടംകൊണ്ട് നിന്നില്ല. നോര്വെയിലെ 20 ലക്ഷത്തോളം ജനങ്ങള് വൈക്കിങ് രീതിയില് വിജയമാഘോഷിക്കാന് തെരുവിലിറങ്ങിയത്രേ. അതാകട്ടെ പരിസ്ഥിതിക്കു വലിയ നാശനഷ്ടമുണ്ടാക്കിയത്രേ. ‘വൈക്കിങ് റോ’ ലോകകപ്പിലെ ഏറ്റവും വൈറലായ ആരാധകാഘോഷമായി മാറിയെങ്കിലും, അതിന്റെ ആഘോഷാവേശം പൊതുമുതലിനും നഗരപരിസ്ഥിതിക്കും നാശനഷ്ടമുണ്ടാക്കി എന്ന് നോര്വെയിലെ പരിസ്ഥിതി സംഘടനകള് ചൂണ്ടിക്കാട്ടി. അതേസമയം, അധികൃതര് ആഘോഷത്തിന്റെ ചരിത്രപ്രാധാന്യം അംഗീകരിച്ചുകൊണ്ട് നാശനഷ്ടങ്ങള് പരിഹരിക്കുമെന്ന് അറിയിച്ചു.
ഐവറി കോസ്റ്റിനെ 2-1ന് തോല്പ്പിച്ച് ലോകകപ്പ് നോക്കൗട്ട് ഘട്ടത്തിന്റെ ചരിത്രത്തില് ആദ്യമായി വിജയിച്ചതിന് പിന്നാലെ ആയിരക്കണക്കിന് നോര്വീജിയന് ആരാധകര് തലസ്ഥാനമായ ഓസ്ലോയിലെ തെരുവുകളിലേക്ക് ഒഴുകിയെത്തി. നഗരത്തിലെ പ്രധാന തെരുവായ കാള് ജൊഹാന്സ് ഗേറ്റിലും രാജകൊട്ടാരത്തിന് സമീപവും വലിയ ആഘോഷം നടന്നു. ആരാധകര് ഒരുമിച്ച് ഇരുന്ന് വൈക്കിങ് കപ്പല് തുഴയുന്നതുപോലെ കൈകള് ചലിപ്പിക്കുന്ന ‘വൈക്കിങ് റോ’ ആഘോഷം നടത്തി. രാജ്യത്തിന്റെ ലോകകപ്പ് ചരിത്രത്തിലെ ഏറ്റവും വലിയ വിജയമായതിനാല് ആഘോഷം മണിക്കൂറുകളോളം നീണ്ടു.
ആവേശം അതിരുകടന്നതോടെ പൊതു ഉദ്യാനങ്ങളിലെയും തെരുവോരങ്ങളിലെയും നിരവധി ചെടികളും പൂച്ചെടികളും ചവിട്ടിമെതിക്കപ്പെട്ടു. ചില അലങ്കാരച്ചെടികള് വേരോടെ പിഴുതുമാറ്റപ്പെട്ടു. സംരക്ഷണത്തിനായി സ്ഥാപിച്ചിരുന്ന വേലിക്കമ്പുകളും തകര്ന്നു.
ആഘോഷത്തിനിടെ നിറഞ്ഞ ട്രെയിനുകളില് ആരാധകര് പാട്ടുപാടുകയും ചാടുകയും ചെയ്തതിനെ തുടര്ന്ന് ചില മെട്രോ കോച്ചുകളുടെ മേല്ക്കൂരയ്ക്ക് കേട്പാട് സംഭവിച്ചു. പരസ്യബോര്ഡുകള് കീറിപ്പറിക്കപ്പെട്ടു. മെട്രോയുടെ ചില ഉള്ഭാഗങ്ങള്ക്ക് കേടുപാടുകള് സംഭവിച്ചു. ഇതേത്തുടര്ന്ന് അറ്റകുറ്റപ്പണികള് നടത്തേണ്ടിവന്നു. എന്നാല് ഇത് രാജ്യത്തിന്റെ ചരിത്രവിജയവുമായി ബന്ധപ്പെട്ട അപൂര്വ ആഘോഷമാണെന്നും, ആരാധകരുടെ സന്തോഷം മനസ്സിലാക്കുന്നുവെന്നും അധികൃതര് വ്യക്തമാക്കിയിട്ടുണ്ട്. എന്നാല്, ഇനി ഇതുപോലെയുള്ള ആവേശങ്ങള് പാടില്ലെന്ന് അധികൃതര് അറിയിച്ചു.
