കൊച്ചി: ലഹരി കടത്ത് മേഖലകളില് സ്ത്രീകളുടെ വര്ദ്ധിച്ചു വരുന്ന സാന്നിധ്യവും വില്പനാ രീതികളും പോലീസിനെ വലയ്ക്കുന്നു. മുന്കാലങ്ങളില് പുരുഷന്മാരായിരുന്നു ലഹരി കടത്തിലും വില്പനയിലും ഉപഭോഗത്തിലും മുന്നിലായത്. പിന്നീടത് യുവജനങ്ങളിലും കോളജ് വിദ്യാര്ത്ഥികളിലുമായി. ഇന്നത് യുവതികളടക്കമുള്ള സ്ത്രീകളിലുമെത്തി നില്ക്കുകയാണ്. ലഹരി കടത്തിലെ സ്ത്രീ സാന്നിധ്യത്തിലെ മാറ്റങ്ങളില് അന്ധാളിച്ചു നില്ക്കുകയാണിന്ന് ലഹരി വിരുദ്ധ പ്രതിരോധ അന്വേഷണ സംഘങ്ങള്.
കഴിഞ്ഞ ആറ് വര്ഷത്തിനകം നാല് വിദേശികളും അന്യസംസ്ഥാനക്കാരുമടക്കം 80 ഓളം സ്ത്രീകളാണ് ലഹരി കടത്തു കേസില് സംസ്ഥാനത്ത് പിടിയിലായത്. പോലീസ് – നാര്ക്കോട്ടിക് വിഭാഗങ്ങളില് പ്രത്യേക സ്ത്രീ പോലീസ് സംഘങ്ങളുടെ ആവശ്യങ്ങള് ഏറിവരികയാണ്. ലഹരി കടത്തുന്ന സ്ത്രീകളെ കണ്ടെത്തുന്നതില് പലപ്പോഴും പോലീസ് – നാര്ക്കോട്ടിക്ക് – എക്സൈസ് സംഘങ്ങള് പരാജയപ്പെടുകയാണ്. കുടുംബമായും പരിചയക്കാരായും വിദ്യാര്ത്ഥികളായും ജോലിക്കാരായും – സാമൂഹ്യ സംഘടനാ പ്രവര്ത്തകര് പൊതുജന സേവകര് തുടങ്ങി പലവേഷങ്ങളിലുമായാണിവര് ലഹരി വില്പന മേഖലകളില് പ്രവര്ത്തന സജ്ജരാകുന്നത്.
ലഹരി ആവശ്യമുള്ളവരെയും ഏജന്റുമാരെയും കണ്ടെത്തി ചരക്ക് കൈമാറുന്നതില് ഇവര് വിജയിക്കുന്നതും അന്വേഷണ സംഘങ്ങളെ ആശങ്കയിലാഴ്ത്തുന്നു. സ്ത്രീകള് ചരക്ക് സൂക്ഷിക്കുന്നതിലും അവ കൈകാര്യം ചെയ്യുന്നതിലും പ്രത്യേകതയാര്ന്ന രീതികളാണ് പ്രയോഗിക്കുന്നതെന്നാണ് അധികൃതരുടെ വിലയിരുത്തല്. ഇതിനാല് പലയിടങ്ങളിലും പിടികൂടുന്ന സ്ത്രീകളില് നിന്ന് ചരക്ക് കണ്ടെത്തുന്നതില് പോലീസ് പരാജയപ്പെടുന്നുമുണ്ട്.
ലഹരി ഇനങ്ങള് സൂക്ഷിക്കുന്ന ഇടങ്ങളുടെ രീതികള് നാര്ക്കോട്ടിക് സംഘങ്ങളെയും അതിശയിപ്പിക്കുന്നുമുണ്ട്. നാപ്കിന് പാഡ്, തലമുടിക്കടിയില്, അടിവസ്ത്രങ്ങള്, അവയുടെ സ്റ്റിച്ചിങ്ങ് മേഖലകള് തുടങ്ങി ഒട്ടേറെസ്ഥലങ്ങളിലാണിവര് ചരക്ക് ഒളിപ്പിച്ചുവെക്കുന്നതെന്നാണ് പറയുന്നത്. ലഹരി കടത്തില് പിടിക്കപ്പെടുന്ന പുരുഷന്മാരെ പരിശോധിക്കുന്നതിലും ചരക്ക് പിടികൂടുന്നതിലും വിജയിക്കുന്ന ലഹരി വിരുദ്ധ സംഘങ്ങള് സ്ത്രീകളില് നിന്നുമിവ കണ്ടെത്തുന്നതില് പരാജയപ്പെടുകയാണ്. കഴിഞ്ഞ ഏഴ് വര്ഷത്തെ ഇടവേളയിലാണ് സ്ത്രീകള് ലഹരി കടത്ത് ഉപഭോഗ മേഖലയില് സജീവമായതെന്നാണ് അന്വേഷണ ഏജന്സി വൃത്തങ്ങള് ചൂണ്ടിക്കാട്ടുന്നത്.
നാര്ക്കോട്ടിക്- എക്സൈസ്- പോലീസ് സംഘങ്ങളില് പ്രാവീണ്യം നേടിയ വനിതകളുടെ അഭാവം ലഹരി കടത്ത് സ്ത്രീ സംഘങ്ങള്ക്ക് ഗുണകരമാകുന്നതായും ലഹരി മോചന വിരുദ്ധ കേന്ദ്രങ്ങള് പറയുന്നു.
ജന്മഭൂമി ഓണ്ലൈന്