സീട്ടില്: ലോകകപ്പ് ഫുട്ബോള് 2026ല് ഇതുവരെ ആറ് ഗ്രൂപ്പുകളിലെ മുഴുവന് പ്രാഥമിക റൗണ്ട് പോരാട്ടങ്ങളും അവസാനിച്ചപ്പോള് ഏറ്റവും മികച്ച മൂന്നാം സ്ഥാനക്കാരായി ഫിനിഷ് ചെയ്തിരിക്കുന്നത് ബോസ്നിയ. ഗ്രൂപ്പ് ബിയില് ഈ ടീം മൂന്നാം സ്ഥാനത്തെത്തിയിരിക്കുന്നത് നാല് പോയിന്റുമായി. മറ്റ് അഞ്ച് ഗ്രൂപ്പുകളിലെയും മൂന്നാം സ്ഥാനക്കാരാരും നാല് പോയിന്റില് എത്തിയിട്ടില്ല.
32 വര്ഷത്തെ ഇടവേളയ്ക്ക് ശേഷം ഈ ലോകകപ്പില് മികച്ച മൂന്നാം സ്ഥാനക്കാര് രണ്ടാം റൗണ്ടിലേക്ക് മുന്നേറുന്നുവെന്ന പ്രത്യേകതയുണ്ട്.
ഇന്നലത്തെ മത്സരത്തില് ഖത്തറിനെ ബോസ്നിയ 3-1ന് പരാജയപ്പെടുത്തിയതോടെ മൂന്ന് പോയിന്റുകള് കൂടി നേടിയെടുക്കുകയായിരുന്നു. ആദ്യ മത്സരത്തില് ആതിഥേയരായ കാനഡയെ സമനിലയില് കുരുക്കി ഒരു പോയിന്റ് സ്വന്തമാക്കിയിരുന്നു. രണ്ടാം മത്സരത്തില് സ്വിറ്റ്സര്ലന്ഡിനോട് 1-4ന് പരാജയപ്പെടുകയും ചെയ്തു.
ഖത്തറിനെതിരായ മത്സരത്തില് ആദ്യ പകുതിയില് 2-1ന് മുന്നില് നിന്നു. രണ്ടാം പകുതിയില് ഒരു ഗോള് കൂടി കണ്ടെത്തി ലീഡ് ഉയര്ത്തുകയായിരുന്നു. 29-ാം മിനിറ്റില് കെറിം അലയ്ബെഗോവിച്ച് ബോസ്നിയക്കായി ലീഡ് സമ്മാനിച്ചു. അഞ്ച് മിനിറ്റിനകം ദാനഗോളിലൂടെ ബോസ്നിയ 2-0ന് മുന്നിലായി. 42-ാം മിനിറ്റില് ഖത്തര് ഹസന് അല്-ഹൈദ്രോസിലൂടെ തിരിച്ചടിച്ചു. 80-ാം മിനിറ്റില് ബോസ്നിയ വീണ്ടും ലീഡ് ചെയ്തു. എര്മിന് മഹ്മിച്ച് സ്കോര് ചെയ്തു.
