തിരുവനന്തപുരം: കുട്ടനാട് മൂലം വള്ളംകളിക്ക് പ്രാദേശിക അവധി നല്കുന്നതുമായി ബന്ധപ്പെട്ട് മുഖ്യമന്ത്രി വി ഡി സതീശന്റെ പരാമര്ശം വിവാദമായതിന് പിന്നാലെ പ്രചരിക്കുന്നത് യഥാര്ഥ വീഡിയോ ആണോയെന്ന് പരിശോധിക്കുമെന്ന് റെജി ചെറിയാന് എം എല് എ. കുട്ടനാടിന്റെ വികാരം കണക്കിലെടുത്ത് അവധി അനുവദിക്കുമെന്നാണ് പ്രതീക്ഷ. അവധി തന്നില്ലെങ്കിലും കുട്ടനാടിന് അന്ന് അവധിയായിരിക്കുമെന്നും റെജി ചെറിയാന് പറഞ്ഞു.
400 വര്ഷത്തെ പഴക്കമുള്ളതാണ് മൂലം വള്ളംകളി.അവധി വേണം എന്ന് തനിക്ക് കൂടി തോന്നിയ തുകൊണ്ടാണ് സബ്മിഷനിലൂടെ ഉന്നയിച്ചത്.സര്ക്കാര് അത് പരിഗണിക്കാം എന്നാണ് മറുപടി നല്കിയത്.പിന്നീട് രാവിലെ മാധ്യമങ്ങളാണ് മുഖ്യമന്ത്രി ഇങ്ങനെ പറഞ്ഞു എന്ന് പറയുന്നത്. എന്താണ് ഇതിന്റെ യാഥാര്ഥ്യം എന്നറിയില്ല.കുട്ടനാടിന്റെ ഉത്സവമായിട്ട് മാറുന്ന ദിവസമാണ്. അവധി ഔദ്യോഗികമാക്കാന് മാത്രമേ നമ്മള് പറഞ്ഞുള്ളൂ. അത് നടക്കും എന്നാണ് ഇപ്പോഴും താന് പ്രതീക്ഷിക്കുന്നത്.
മൂലം വള്ളംകളി നടക്കുന്ന ജൂണ് 29ന് കുട്ടനാട് താലൂക്കിന് പ്രാദേശിക അവധി അനുവദിക്കണം എന്നായിരുന്നു യുഡിഎഫ് എംഎല്എ റെജി ചെറിയാന്റെ സബ്മിഷന്. ഇക്കാര്യം പരിശോധിച്ച് തീരുമാനിക്കുമെന്നായിരുന്നു മുഖ്യമന്ത്രി മറുപടി നല്കിയത്.എന്നാല് സീറ്റില് ഇരുന്നശേഷം ‘ഒരു കാരണവശാലും കൊടുക്കില്ല’ എന്ന് സതീശന് പറഞ്ഞു. ഇത് മൈക്കിലൂടെ പുറത്തുവന്നു. വലിയ വിവാദവും ഉണ്ടായി.
