സൂറിച്ച്: യുഎസും ഇറാനും തമ്മിലുള്ള യുദ്ധം അവസാനിപ്പിച്ച് അന്തിമ കരാറില് എത്തുന്നതിനുള്ള റോഡ്മാപ്പിന് അംഗീകാരം നല്കി. സ്വിറ്റ്സര്ലാന്ഡില് നടക്കുന്ന ഒന്നാംഘട്ട ചര്ച്ചയില് 60 ദിവസത്തിനുള്ളില് അന്തിമ കരാറില് എത്തുന്നതിനുള്ള റോഡ്മാപ്പിനാണ് രാജ്യങ്ങള് തമ്മില് ധാരണയായത്. ചര്ച്ചകള് എല്ലാ ആഴ്ചയും തുടരും ഇതിനായി മേല്നോട്ട സമിതിക്ക് രൂപം നല്കിയതായി മധ്യസ്ഥ രാജ്യങ്ങളായ ഖത്തറും പാകിസ്ഥാനും സംയുക്ത പ്രസ്താവനയിലൂടെ അറിയിച്ചു.
ഇറാന്, യുഎസ്, ഖത്തര്, പാകിസ്ഥാന് എന്നീ രാജ്യങ്ങളുടെ പ്രതിനിധികളും ഈ ചര്ച്ചകളില് പങ്കെടുത്തു. യുഎസ് പ്രതിനിധി സംഘത്തിന് വൈസ് പ്രസിഡന്റ് ജെ.ഡി വാന്സ് നേതൃത്വം നല്കി. ഇറാന് വേണ്ടി വിദേശകാര്യ മന്ത്രി അബ്ബാസ് അരാഗ്ചിയും ചീഫ് നെഗോസിയേറ്റര് മുഹമ്മദ് ബാഗര് ഘാലിബാഫും ചര്ച്ചയില് പങ്കെടുത്തു. പാകിസ്ഥാന് പ്രധാനമന്ത്രി ഷഹബാസ് ഷെരീഫ്, ആര്മി ചീഫ് അസിം മുനീര്, ഖത്തര് പ്രധാനമന്ത്രി ഷെയ്ഖ് മുഹമ്മദ് ബിന് അബ്ദുള്റഹ്മാന് അല് താനി എന്നിവരും ചര്ച്ചയുടെ ഭാഗമായി.
അന്താരാഷ്ട്ര ആണവോര്ജ ഏജന്സിയിലെ (ഐഎഇഎ) പരിശോധകരെ രാജ്യത്തേക്ക് ക്ഷണിക്കാന് ഇറാന് സമ്മതിച്ചതായി യുഎസ് വൈസ് പ്രസിഡന്റ് ജെഡി വാന്സ് മാധ്യമങ്ങളോട് വെളിപ്പെടുത്തി.
അതേസമയം സമാധാന ചര്ച്ചകള് നടക്കുന്നതിനിടയിലും ട്രംപ് സമൂഹ മാധ്യമങ്ങളിലൂടെ ഇറാനെതിരെ പ്രകോപനപരമായ പ്രസ്താവനകള് നടത്തി. ഇതോടെ ഇറാന് സംഘം ചര്ച്ചകളില്നിന്ന് ഇറങ്ങിപ്പോയി. ട്രംപ് നടത്തിയ പ്രസ്താവനയ്ക്കെതിരെ ഇറാന് പരസ്യമായി അതൃപ്തിയും പ്രകടിപ്പിച്ചു.
