തിരുവനന്തപുരം: പ്രധാനമന്ത്രി നരേന്ദ്ര മോദിയെ അപകീര്ത്തിപ്പെടുത്തുകയും ജനങ്ങള്ക്കിടയില് തെറ്റിദ്ധാരണയും വിദ്വേഷവും വളര്ത്തുകയും ചെയ്യുന്ന തരത്തില് എ ഐ ഉപയോഗിച്ച് നിര്മ്മിച്ച ഡീപ്ഫേക്ക് വീഡിയോ സാമൂഹിക മാധ്യമങ്ങളിലൂടെ പ്രചരിപ്പിച്ച സംഭവത്തില് അടിയന്തര നിയമനടപടികള് ആവശ്യപ്പെട്ട് ബിജെപി സംസ്ഥാന സോഷ്യല് മീഡിയ കണ്വീനര് അഭിജിത് രാധാകൃഷ്ണന് നായര് സംസ്ഥാന പൊലീസ് മേധാവിക്ക് പരാതി നല്കി.
‘കൈപ്പടി അന്സാരി’ എന്ന പേരിലുളള ഫേസ്ബുക്ക് അക്കൗണ്ടിലൂടെയാണ് വീഡിയോ പ്രചരിപ്പിച്ചതെന്നാണ് പരാതിയില് ചൂണ്ടിക്കാട്ടുന്നത്. ജി-7 ഉച്ചകോടിയുമായി ബന്ധപ്പെട്ട യഥാര്ത്ഥ ദൃശ്യങ്ങള് ദുരുപയോഗം ചെയ്ത് ലോകനേതാക്കള് പ്രധാനമന്ത്രിയെ അപമാനിക്കുന്ന തരത്തില് വ്യാജ ദൃശ്യങ്ങള് സൃഷ്ടിക്കുകയും അതിനൊപ്പം അധിക്ഷേപകരമായ പരാമര്ശങ്ങള് ചേര്ത്ത് സമൂഹമാധ്യമങ്ങളിലൂടെ വ്യാപകമായി പ്രചരിപ്പിക്കുകയും ചെയ്തതായി പരാതിയില് പറയുന്നു.
രാഷ്ട്രീയ വിമര്ശനത്തിന്റെ മറവില് രാജ്യത്തിന്റെ പ്രധാനമന്ത്രിയെയും ഭരണഘടനാപരമായ ഉന്നത പദവിയെയും ലക്ഷ്യമിട്ട് നടത്തുന്ന ഇത്തരം ആസൂത്രിത സൈബര് ആക്രമണങ്ങള് അംഗീകരിക്കാനാകില്ലെന്ന് അഭിജിത് പറഞ്ഞു. ഡീപ്ഫേക്ക് സാങ്കേതികവിദ്യ ഉപയോഗിച്ചുള്ള വ്യാജ പ്രചാരണങ്ങള് വ്യക്തികളെ മാത്രമല്ല ജനാധിപത്യ വ്യവസ്ഥയെയും പൊതുസമൂഹത്തിന്റെ വിശ്വാസ്യതയെയും തകര്ക്കുന്ന ഗുരുതരമായ കുറ്റകൃത്യങ്ങളാണ്.
സമൂഹത്തില് വിദ്വേഷവും തെറ്റിദ്ധാരണയും സൃഷ്ടിക്കാനുള്ള ലക്ഷ്യത്തോടെയുള്ള ഇത്തരം വ്യാജ പ്രചാരണങ്ങള്ക്കെതിരെ ശക്തമായ നിയമനടപടികള് സ്വീകരിക്കേണ്ടത് അനിവാര്യമാണ്.ഭാരതീയ ന്യായ സംഹിതയിലെയും വിവരസാങ്കേതിക നിയമത്തിലെയും ബാധകമായ വകുപ്പുകള് പ്രകാരം എഫ് ഐ ആര് രജിസ്റ്റര് ചെയ്ത് സമഗ്ര അന്വേഷണം നടത്തണം. വീഡിയോ എല്ലാ സാമൂഹിക മാധ്യമ പ്ലാറ്റ്ഫോമുകളില് നിന്നും അടിയന്തരമായി നീക്കം ചെയ്യുകയും ഇതിന് പിന്നില് പ്രവര്ത്തിച്ചവരെ കണ്ടെത്തി മാതൃകാപരമായ ശിക്ഷ ഉറപ്പാക്കുകയും വേണമെന്നും അഭിജിത് നായര് ആവശ്യപ്പെട്ടു.
വീഡിയോയുടെ പകര്പ്പും മറ്റ് ഡിജിറ്റല് തെളിവുകളും പരാതിക്കൊപ്പം സമര്പ്പിച്ചിട്ടുണ്ട്.അന്വേഷണവുമായി പൂര്ണമായും സഹകരിക്കുമെന്നും അദ്ദേഹം അറിയിച്ചു.
