ന്യൂദൽഹി: ജൂൺ 23 ന് ന്യൂദൽഹിയിൽ നടക്കുന്ന ബ്രിക്സ് ദേശീയ സുരക്ഷാ ഉപദേഷ്ടാക്കളുടെ യോഗത്തിൽ ചൈനീസ് വിദേശകാര്യ മന്ത്രി വാങ് യി, റഷ്യൻ സുരക്ഷാ കൗൺസിൽ സെക്രട്ടറി സെർജി ഷോയിഗു, ഇറാൻ ദേശീയ സുരക്ഷാ ഉപദേഷ്ടാവ് മുഹമ്മദ് ബാഗേരി സോൾഗഡ്ജർ എന്നിവർ പങ്കെടുക്കും. സംഘർഷം അവസാനിപ്പിക്കാൻ ലക്ഷ്യമിട്ടുള്ള യുഎസ്-ഇറാൻ സമാധാന കരാറിനുശേഷം ടെഹ്‌റാന്റെ ആദ്യത്തെ പ്രധാന അന്താരാഷ്‌ട്ര ഇടപെടലായിരിക്കും ഈ യോഗം.
കൂടാതെ യുഎസ്-ഇറാൻ കരാറിനും യുഎഇയും ഇറാനും തമ്മിലുള്ള ശത്രുത അവസാനിപ്പിക്കുന്നതിനുള്ള കരാറിനും ശേഷമുള്ള ആദ്യത്തെ ബ്രിക്സ് സുരക്ഷാ യോഗമായിരിക്കും ഇത്. സെപ്റ്റംബർ 12-13 തീയതികളിൽ ഇന്ത്യയുടെ അധ്യക്ഷതയിൽ ന്യൂദൽഹിയിൽ നടക്കാനിരിക്കുന്ന ബ്രിക്സ് ഉച്ചകോടിക്ക് മുന്നോടിയായി അംഗങ്ങൾക്കിടയിൽ സമവായം സൃഷ്ടിക്കാൻ ഈ സംഭവവികാസങ്ങൾ സഹായിച്ചേക്കാം. പശ്ചിമേഷ്യയിലെ സംഘർഷത്തിനുശേഷം നടന്ന മുൻ ബ്രിക്സ് യോഗങ്ങളിൽ ഇറാനും യുഎഇയും തമ്മിലുള്ള അഭിപ്രായവ്യത്യാസങ്ങൾ കാരണം സംയുക്ത പ്രസ്താവന നടത്താൻ കഴിഞ്ഞില്ല.
ഭീകരതയും സുരക്ഷയും ചർച്ച ചെയ്തേക്കാം
അതിർത്തി കടന്നുള്ള ഭീകരതയെയും മറ്റ് അന്താരാഷ്‌ട്ര സുരക്ഷാ വെല്ലുവിളികളെയും നേരിടുന്നതിനുള്ള നടപടികളിലാണ് യോഗം ശ്രദ്ധ കേന്ദ്രീകരിക്കുന്നതെന്ന് ഇക്കണോമിക് ടൈംസ് റിപ്പോർട്ട് ചെയ്യുന്നു. ഇറാന്റെ ദേശീയ സുരക്ഷാ ഉപദേഷ്ടാവിന്റെ സാന്നിധ്യം സമാധാന കരാറിന്റെ സൂക്ഷ്മതകളും ഇന്ത്യ-ഇറാൻ സാമ്പത്തിക ബന്ധങ്ങളിൽ അതിന്റെ സ്വാധീനവും നന്നായി മനസ്സിലാക്കാൻ ഇന്ത്യയ്‌ക്ക് അവസരം നൽകുമെന്ന് പ്രതീക്ഷിക്കുന്നു.
പ്രസിഡന്റ് ഷി ജിൻപിംഗ് ഇന്ത്യയിലേക്ക് എത്തുന്നതിന് മുമ്പായി ഈ സന്ദർശനം ഉണ്ടാകാനാണ് സാധ്യത.
ഷോയിഗുവുമായും മറ്റ് ബ്രിക്സ് അംഗരാജ്യങ്ങളിൽ നിന്നുള്ള അദ്ദേഹത്തിന്റെ സഹപ്രവർത്തകരുമായും ദേശീയ സുരക്ഷ ഉപദേഷ്ടാവ് അജിത് ഡോവൽ ഉഭയകക്ഷി കൂടിക്കാഴ്ചകൾ നടത്തുമെന്നും പ്രതീക്ഷിക്കുന്നുണ്ട്.
