വാഷിങ്ടണ്‍: ലോകകപ്പ് ഗ്രൂപ്പ് കെയിലെ രണ്ടാം മത്സരത്തില്‍ നവാഗതരായ ഉസ്ബക്കിസ്ഥാനെ ഒന്നിനെതിരെ മൂന്ന് ഗോളുകള്‍ക്ക് കീഴടക്കി കൊളംബിയ. 40-ാം മിനിറ്റില്‍ ഡാനിയേല്‍ മുനോസ്, 65-ാം മിനിറ്റില്‍ ലൂയിസ് ഡയസ്, പരിക്ക് സമയത്തിന്റെ ഒന്‍പതാം മിനിറ്റില്‍ ജാമിന്റണ്‍ കാമ്പാസ് എന്നിവര്‍ കൊളംബിയയ്‌ക്കായി ലക്ഷ്യം കണ്ടപ്പോള്‍ 60-ാം മിനിറ്റില്‍ അബ്ബോസ്ബെക്ക് ഫയ്സുല്ലായേവ് ഉസ്ബക്കിസ്ഥാനായി ആശ്വാസ ഗോള്‍ നേടി. വിജയത്തോടെ മൂന്ന് പോയിന്റുമായി കൊളംബിയ ഗ്രൂപ്പില്‍ ഒന്നാമത്.
കളിയുടെ എല്ലാ മേഖലയിലും മുന്നിട്ടുനിന്നത് ഹാമിഷ് റോഡ്രിഗസിന്റെ കൊളംബിയയായിരുന്നു. 62 ശതമാനവും പന്ത് നിയന്ത്രിച്ചു നിര്‍ത്തിയ കൊളംബിയ 15 ഷോട്ടുകളും ആകെ ഉതിര്‍ത്തു. അതേസമയം ഉസ്ബക്കിസ്ഥാന്‍ ആകെ പായിച്ചത് എട്ടെണ്ണം.
കളിയുടെ തുടക്കം മുതല്‍ കൊളംബിയന്‍ മുന്നേറ്റങ്ങളായിരുന്നു മൈതാനത്ത്. ഹാമിഷ് റോഡ്രിഗസ് മുന്നേറ്റങ്ങള്‍ക്ക് ചുക്കാന്‍ പിടിച്ചു. എന്നാല്‍ മികച്ച പ്രതിരോധക്കോട്ട ഉസ്ബക്കിസ്ഥാന്‍ കെട്ടി ഉയര്‍ത്തിയതോടെ കൊളംബിയന്‍ മുന്നേറ്റങ്ങളെല്ലാം പാതി വഴിയില്‍ അവസാനിച്ചു. ഇതിനിടെ 17-ാം മിനിറ്റില്‍ ജോണ്‍ ഏരിയാസും 32-ാം മിനിറ്റില്‍ ലൂയിസ് ഡയസും കൊളംബിയയെ ഗോളിനടുത്തെത്തിച്ചെങ്കിലും ലക്ഷ്യം കണ്ടില്ല. മറുവശത്ത് ഉസ്ബെക്കിസ്ഥാനും അവസരങ്ങള്‍ സൃഷ്ടിച്ച് മുന്നേറാനായില്ല. ആദ്യപകുതി ഗോള്‍രഹിതമായി അവസാനിക്കുമെന്ന് തോന്നിച്ച ഘട്ടത്തിലാണ് പ്രതിരോധക്കോട്ട പൊട്ടിച്ച് കൊളംബിയ ലീഡെടുത്തത്. ലൂയിസ് ഡയസിന്റെ പാസില്‍ നിന്ന് ഡാനിയേല്‍ മുനോസാണ് ഗോളടിച്ചത്. ഈ ഗോളിന് ആദ്യ പകുതിയില്‍ കൊളംബിയ മുന്നിട്ടുനിന്നു.
രണ്ടാം പകുതിയില്‍ ഉസ്ബക്കിസ്ഥാനും ഗോള്‍ മടക്കുക എന്ന ലക്ഷ്യത്തോടെ മൈതാനത്തിറങ്ങിയതോടെ കളി ആവേശകരമായി. അതിവേഗത്തിലുള്ള പ്രത്യാക്രമണമായിരുന്നു ഉസ്ബക്കിസ്ഥാന്‍ താരങ്ങള്‍ നടത്തിയത്. 60-ാം മിനിറ്റില്‍ അവര്‍ സമനില ഗോളും സ്വന്തമാക്കി. ഉസ്ബെക്ക് നായകന്‍ എല്‍ദോര്‍ ഷൊമുറോദോവ് തൊടുത്ത ഒരു തകര്‍പ്പന്‍ വോളി കൊളംബിയന്‍ ഗോള്‍കീപ്പര്‍ തടുത്തിട്ടു. തട്ടി അകന്ന പന്ത് ഉയര്‍ന്നു പൊങ്ങിയത് അബ്ബോസ്ബെക്ക് ഫയ്സുല്ലായേവിന്റെ തലയ്‌ക്ക് പാകത്തില്‍. താരം അനായാസം പന്ത് വലയിലാക്കുകയും ചെയ്തു. ഉസ്ബെക്കിസ്ഥാന്റെ ചരിത്രത്തിലെ ആദ്യ ലോകകപ്പ് ഗോള്‍.
സമനില ഗോള്‍ വഴങ്ങിയതോടെ കൊളംബിയ വിജയം ലക്ഷ്യമാക്കി മുന്നേറ്റം കടുപ്പിച്ചു. 65-ാം മിനിറ്റില്‍ അവര്‍ വീണ്ടും ലീഡ് നേടി. ഗുസ്താവോ പ്യുര്‍ട്ട ബോക്സിലേക്ക് നല്‍കിയ പാസ് സ്വീകരിച്ച ലൂയിസ് ഡയസ് ബോക്സിനുള്ളില്‍ നിന്ന് പായിച്ച ഷോട്ട് വലയില്‍ കയറി. മുന്നേറ്റം തുടര്‍ന്ന കൊളംബിയ മൂന്നാം ഗോളടിച്ചത് കളി അവസാനിക്കുന്നതിന് തൊട്ടുമുന്‍പ്.
72-ാം മിനിറ്റില്‍ റോഡ്രിഗസിന് പകരക്കാരനായി ഇറങ്ങിയ ജാമിന്റണ്‍ കാംപസാണ് അവസാന ഗോളടിച്ചത്. വലതുപാര്‍ശ്വത്തില്‍ നിന്ന് കുച്ചോ ഹെര്‍ണാണ്ടസ് നല്‍കിയ ക്രോസ് നല്ലൊരു ഹെഡ്ഡറിലൂടെ താരം വലയിലെത്തിക്കുകയായിരുന്നു.
