ഇംതിയാസ് അലി സംവിധാനം ചെയ്ത പുതിയ ചിത്രം ‘മേം വാപസ് ആവൂംഗ’യ്ക്ക് മികച്ച പ്രേക്ഷക പ്രതികരണമാണ് ലഭിക്കുന്നത്. എന്നാൽ ചിത്രത്തെ വിമർശിച്ചും നിരവധി പേർ രംഗത്തെത്തുന്നുണ്ട്. ഇപ്പോഴിതാ ഇത്തരം വിമർശനങ്ങളോട് പ്രതികരിച്ചിരിക്കുകയാണ് സംഗീത സംവിധായകൻ എ ആർ റഹ്മാൻ. ചിത്രം രാജ്യവിരുദ്ധമാണെന്ന വിമർശനത്തോടാണ് റഹ്മാൻ പരോക്ഷമായി പ്രതികരിച്ചത്.
തന്റെ ഇൻസ്റ്റഗ്രാം സ്റ്റോറിയിലൂടെയായിരുന്നു റഹ്മാന്റെ പ്രതികരണം. ‘ഭീകരവാദികളോ രഹസ്യ ഏജന്റുമാരോ ഇല്ലാതെ പാകിസ്ഥാനെ കാണിക്കാൻ സിനിമ ധൈര്യം കാണിച്ചു’ എന്ന് പരിഹസിക്കുന്നതായിരുന്നു പ്രസ്തുത പോസ്റ്റ്. ‘രാജ്യവിരുദ്ധം ? ഭീകരവാദികളോ രഹസ്യ ഏജന്റുമാരോ ഇല്ലാതെ പാകിസ്ഥാനെ കാണിക്കാൻ സിനിമ ധൈര്യം കാണിക്കുന്നു’, എന്നും പോസ്റ്റിൽ പറയുന്നു.
സ്ക്രീൻഷോട്ട് ഷെയർ ചെയ്ത റഹ്മാൻ, ഒരു ചിരിക്കുന്ന ഇമോജി ആണ് പങ്കുവച്ചിരിക്കുന്നത്. റോക്സ്റ്റാർ, ഹൈവേ, തമാശ, അമർ സിങ് ചംകീല എന്നീ ചിത്രങ്ങൾക്ക് ശേഷം റഹ്മാനും സംവിധായകൻ ഇംതിയാസ് അലിയും ഒന്നിക്കുന്ന ചിത്രമാണ് മേം വാപസ് ആവൂംഗ.
ഇന്ത്യ വിഭജനത്തിന്റെ പശ്ചാത്തലത്തിൽ ഒരുക്കിയ ചിത്രത്തിൽ ദിൽജിത് ദോസാഞ്ജ്, നസീറുദ്ദീൻ ഷാ, ശർവാരി, വേദാങ്ക് റെയ്ന എന്നിവരാണ് പ്രധാന വേഷങ്ങളിൽ എത്തുന്നത്. ജൂൺ 12 നാണ് ചിത്രം തിയറ്ററുകളിലെത്തിയത്. 10 കോടിയാണ് ചിത്രം ഇതുവരെ കളക്ട് ചെയ്തിരിക്കുന്നത്.
