തിരുവനന്തപുരം: രാജ്യത്ത് വൈദ്യുതി ലഭ്യതയില് വലിയ കുറവുണ്ടായതിനാല് സംസ്ഥാനത്ത് നിയന്ത്രണത്തിന് സാധ്യതയെന്ന് കെഎസ്ഇബി.പസഫിക് സമുദ്രത്തില് എല്നിനോ പ്രതിഭാസം ശക്തിപ്രാപിച്ചതിനാല് അന്തരീക്ഷ ഊഷ്മാവ് വര്ദ്ധിച്ച സാഹചര്യത്തില് രാജ്യത്താകെ വൈദ്യുതിലഭ്യതയില് വലിയതോതിലുള്ള കുറവാണ് ഉണ്ടായിരിക്കുന്നത്.ജൂണ് 16 മുതല് തിരികെ നല്കാമെന്ന കരാറില്, മാര്ച്ച്, ഏപ്രില് മാസങ്ങളില് കേരളം ഇതരസംസ്ഥാനങ്ങളില് നിന്ന് വായ്പയായി വാങ്ങിയ വൈദ്യുതി തിരികെ നല്കേണ്ട വേളയാണിത്.
സംസ്ഥാനത്ത് ജൂണ് ഒന്നിന് കാലവര്ഷം എത്തിയെങ്കിലും മഴ ശക്തമാകാത്തതിനാല് അന്തരീക്ഷ താപനില കാര്യമായി കുറഞ്ഞിട്ടില്ല. ആകെ 4100 മെഗാവാട്ടിന്റെ ആവശ്യകതയാണ് പ്രതീക്ഷിച്ചിരുന്നതെങ്കിലും 4900 മെഗാവാട്ട് വരെ ഉയരുന്ന സ്ഥിതിയുണ്ട്. വൈദ്യുതി ഉപയോഗത്തിലും 10 ദശലക്ഷം യൂണിറ്റിന്റെ വര്ദ്ധനയുണ്ട്. ആഭ്യന്തര ഉത്പാദനമായ 1700 മെഗാവാട്ടും കേന്ദ്ര നിലയങ്ങളില്നിന്നുള്ള 1701 മെഗാവാട്ടും ദീര്ഘകാല കരാറുകളിലൂടെ ലഭ്യമാകുന്ന 612 മെഗാവാട്ടും വൈദ്യുതി പൂര്ണതോതില് ലഭിക്കുമ്പോഴും മേല്പ്പറഞ്ഞ കാരണങ്ങളാല് ഏതാണ്ട് 900 മെഗാവാട്ട് വൈദ്യുതിയുടെ കുറവ് ജൂണ് 16 മുതല് 30 വരെ നിലനില്ക്കുകയാണ്. പവര് എക്സ്ചേഞ്ചുകളിലെ വൈദ്യുതിലഭ്യതയും ഈ പ്രത്യേക സാഹചര്യത്തില് അഞ്ച് ശതമാനം ആയി ചുരുങ്ങിയിരിക്കുകയാണ്.ഇക്കാരണങ്ങളാല് ജൂണ് 16ന് രാത്രി 9 നും 12നുമിടയില് സംസ്ഥാനത്തെ ചില ഭാഗങ്ങളില് നേരിയ തോതിലുള്ള വൈദ്യുതി നിയന്ത്രണം വേണ്ടിവന്നെന്ന് കെ എസ് ഇ ബി അറിയിച്ചു.
സാഹചര്യം വിലയിരുത്താന് വൈദ്യുതി വകുപ്പ് മന്ത്രി സണ്ണി ജോസഫിന്റെ നേതൃത്വത്തില് പവര് സെക്രട്ടറിയും കെ എസ് ഇ ബി ചെയര്മാനുമായ ഡോ. എം ജി രാജമാണിക്യം ഉള്പ്പെടെയുള്ള ഉന്നത ഉദ്യോഗസ്ഥരുടെ അടിയന്തരയോഗം വിളിച്ചുചേര്ത്തിരുന്നു.ദൈനംദിന കരാറുകളിലൂടെ ലഭ്യമാകുന്ന പരമാവധി വൈദ്യുതി വാങ്ങിയെത്തിക്കണമെന്ന് വൈദ്യുതി മന്ത്രി നിര്ദേശിച്ചു.
തുടര്ന്നുള്ള ദിവസങ്ങളില് വൈദ്യുതി ലഭ്യതക്കുറവ് ഏറുന്നപക്ഷം വൈദ്യുതി ശൃംഖലയുടെ സുസ്ഥിരത നഷ്ടപ്പെടാതിരിക്കുന്നത് ലക്ഷ്യമിട്ട് ആവശ്യം വേണ്ട വൈദ്യുതി നിയന്ത്രണം ഏര്പ്പെടുത്തുന്നതിന് കെ എസ് ഇ ബിക്ക് യോഗം അനുമതി നല്കി.
വൈദ്യുതി ലഭ്യതയില് രൂക്ഷമായ പ്രതിസന്ധി നേരിടുന്ന സാഹചര്യത്തില് ജൂണ് 30 വരെ വൈകുന്നേരം 6നും രാത്രി 12നുമിടയില് പരിമിതമായ തോതില് വൈദ്യുതി നിയന്ത്രണം ആവശ്യമായി വന്നേക്കാമെന്നാണ് അറിയിപ്പ്.
