കരുനാഗപ്പള്ളി: വിദേശ വിപണികളെ ആശ്രയിച്ചിരുന്ന റോബോട്ടിക്സ് സാങ്കേതികവിദ്യയില് വന്മുന്നേറ്റവുമായി അമൃത വിശ്വവിദ്യാപീഠത്തിലെ ഹട്ട് ലാബ്സ്. റോബോട്ടുകളുടെ ചലനങ്ങളെ നിയന്ത്രിക്കുന്ന ‘സിക്സ് ഡി ഒ എഫ്’ (6 ഡിഗ്രിസ് ഓഫ് ഫ്രീഡം) റോബോട്ടിക് മാനിപ്പുലേറ്ററുകള്ക്കായുള്ള കുറഞ്ഞ ചെലവിലുള്ള മോഷന് കണ്ട്രോളറാണ് ഹട്ട് ലാബ്സിലെ ഗവേഷകര് വിജയകരമായി വികസിപ്പിച്ചെടുത്തത്.
‘നിയന്ത്ര’ എന്ന് പേരിട്ടിരിക്കുന്ന മോഷന് കണ്ട്രോളര് ഇതിനോടകം തന്നെ വിജയകരമായി പരീക്ഷിച്ചുകഴിഞ്ഞു. നിലവില് വിപണിയിലുള്ള കൊറിയന്, ചൈനീസ് നിര്മ്മിത കണ്ട്രോളറുകള്ക്ക് ബദലായാണ് പൂര്ണമായും സ്വദേശീയമായ ഈ സാങ്കേതികവിദ്യ അമൃതയിലെ ശാസ്ത്രജ്ഞര് വികസിപ്പിച്ചത്. ഇതുവരെ വിദേശ കമ്പനികള് കൈയടക്കി വച്ചിരുന്ന ഈ രംഗത്ത് ഭാരതത്തിന്റെ ആദ്യത്തെ സംരംഭമാണ് ഇത്. ഇതുവരെ ദക്ഷിണ കൊറിയയുടെയും ചൈനയുടെയും കണ്ട്രോളറുകളാണ് ഗവേഷണങ്ങള്ക്കായി ഉപയോഗിച്ചിരുന്നത്. ഇവയ്ക്ക് ഒരു യൂണിറ്റിന് രണ്ട് ലക്ഷം രൂപയിലധികം വിലവരുമെന്നുമാത്രമല്ല, എന്തെങ്കിലും തരത്തിലുള്ള മാറ്റങ്ങള് വരുത്തണമെങ്കില് വിദേശവിപണികളെയും കമ്പനികളെയും ആശ്രയിക്കേണ്ടതായും വന്നിരുന്നു. ഇത് രാജ്യത്തെ റോബോട്ടിക്സ് ഗവേഷണങ്ങള്ക്ക് വലിയ തടസമാണ് സൃഷ്ടിച്ചിരുന്നത്. എന്നാല് തദ്ദേശീയമായ കണ്ട്രോളറുകള് വരുന്നതോടെ വിദേശ കണ്ട്രോളറുകള്ക്ക് ഇത് വലിയ തിരിച്ചടിയാകും. ചെലവ് നാലിലൊന്നായി കുറയും ചെയ്യും. ടെക്സസ് ഇന്സ്ട്രുമെന്റ്സ്, എസ്ടി മൈക്രോഇലക്ട്രോണിക്സ് പ്ലാറ്റ്ഫോമുകള് അടിസ്ഥാനമാക്കി ഹട്ട് ലാബ്സ് വികസിപ്പിച്ച പുതിയ കണ്ട്രോളറിന് 50,000 രൂപയില് താഴെ മാത്രമാണ് ചെലവ് വരുന്നത്.
വിലക്കുറവിനൊപ്പം ഗവേഷകര്ക്ക് തങ്ങളുടെ ആവശ്യാനുസരണം മാറ്റങ്ങള് വരുത്താനുള്ള പൂര്ണസ്വാതന്ത്ര്യവും ഈ പുതിയ ഇന്- ഹൗസ് കണ്ട്രോളര് നല്കുന്നുണ്ട്. തെങ്ങുകയറ്റത്തിനും തേങ്ങയിടലിനുമായി അമൃത വികസിപ്പിച്ച കേരംബോട്ട് എന്ന ആളില്ലാ റോബോട്ടിക് സംവിധാനത്തിലാണ് ഈ പുതിയ മാനിപ്പുലേറ്റര് കണ്ട്രോളര് ആദ്യമായി വിജയകരമായി പരീക്ഷിച്ചത്. വളരെ കുറഞ്ഞ മാറ്റങ്ങളോടെ നിലവിലുള്ള ഏത് റോബോട്ടിക് സിസ്റ്റത്തിലും ഇത് ഘടിപ്പിക്കാനാകുമെന്ന് സംഘം തെളിയിച്ചിട്ടുണ്ട്. ഹട്ട് ലാബ്സ് ഡയറക്ടര് ഡോ. രാജേഷ് കണ്ണന് മേഘലിംഗം, റിസര്ച്ച് അസോസിയേറ്റ് ജെസില് മരിയോ. പി.എസ്, പ്രോജക്ട് മാനേജറും സയന്റിസ്റ്റുമായ ഡോ. കെ എം ശക്തിപ്രസാദ് എന്നിവരടങ്ങുന്ന സംഘമാണ് നേട്ടത്തിന് പിന്നില്.
