പത്തനംതിട്ട: മുല്ലപ്പെരിയാര് വിഷയത്തില് പത്ത് വര്ഷം മൗനം ഭജിച്ച കേരളാ കോണ്ഗ്രസ് ജോസഫ് ഗ്രൂപ്പ്, മണ്ഡലകാലത്തിനു മൂന്നര മാസം മാത്രം ബാക്കിനില്ക്കെ വിഷയം ആളിക്കത്തിക്കാന് വീണ്ടും ശ്രമം തുടങ്ങി. കഴിഞ്ഞ ദിവസം ചരല്കുന്നില് നടന്ന ജോസഫ് വിഭാഗം നേതൃക്യാമ്പിലാണ് മുല്ലപ്പെരിയാറില് പുതിയ ഡാം നിര്മിക്കണമെന്ന ആവശ്യം വീണ്ടും ഉയര്ന്നത്.
മുല്ലപ്പെരിയാറില് പുതിയ ഡാം വേണമെന്നതില് തര്ക്കമില്ലെങ്കിലും പിണറായി സര്ക്കാര് അധികാരത്തില് ഇരുന്ന വര്ഷങ്ങളില് വാതുറക്കാതിരുന്നവര് ശബരിമല സീസണ് ആരംഭിക്കാറാകുമ്പോള് ഇതു കുത്തിപ്പൊക്കിയതില് രഹസ്യ അജണ്ട ഉണ്ടെന്ന ആരോപണം ശക്തമാണ്. കോണ്ഗ്രസ് ഭരിക്കുമ്പോള് മാത്രമാണ് മുല്ലപ്പെരിയാര് വിഷയം ആളിക്കത്തിക്കുന്നത്. അതിനു പിന്നില് കേരളാ കോണ്ഗ്രസ് ജോസഫ് ഗ്രൂപ്പും ആയിരിക്കും എന്നതാണ് ഇക്കാലമത്രയുമുള്ള അനുഭവം.
മുല്ലപ്പെരിയാര് പ്രശ്നത്തിന് ശാശ്വത പരിഹാരം ഉണ്ടാക്കാന് കേരള- തമിഴ്നാട് സര്ക്കാരുകള് തമ്മില് ചര്ച്ച നടത്തി അഭിപ്രായ സമന്വയത്തോടെ പുതിയ ഡാം നിര്മിക്കാന് സാഹചര്യമൊരുക്കാന് കേന്ദ്ര സര്ക്കാര് മുന്നോട്ട് വരണമെന്നാണ് കേരള കോണ്ഗ്രസ് പ്രമേയത്തിലെ ആവശ്യം. ഇക്കാര്യത്തില് സംസ്ഥാന സര്ക്കാരിന്റെ ഇടപെടല് പാര്ട്ടി ആവശ്യപ്പെട്ടിട്ടുമില്ല. കേന്ദ്ര ഇടപെടലിനു സമ്മര്ദം ശക്തമാക്കി തങ്ങളുടെ ഭാഗം സുരക്ഷിതമാക്കാനാണ് ഇവരുടെ ശ്രമം. കേരള കോണ്ഗ്രസ് നിയമസഭ കക്ഷിനേതാവും മന്ത്രിയുമായ മോന്സ് ജോസഫ് ആണ് സമാപന സമ്മേളനം ഉദ്ഘാടനം ചെയ്തത്. വര്ക്കിങ് ചെയര്മാന് പി.സി. തോമസ് ആയിരുന്നു അധ്യക്ഷന്.
ശബരിമല സീസണ് ആരംഭിക്കാന് ഇനി മൂന്നര മാസം മാത്രമാണ് ബാക്കി. തീര്ത്ഥാടനത്തിന് മുമ്പ് കേരളത്തില് തമിഴ്നാട് വിരുദ്ധവികാരവും തമിഴ്നാട്ടില് കേരളവിരുദ്ധതയും ആളിക്കത്തിക്കുക എന്ന ലക്ഷ്യത്തോടെയാണ് തല്പരകക്ഷികള് മുല്ലപ്പെരിയാര് വിഷയം ഉയര്ത്തുന്നത്.
വണ്ടിപ്പെരിയാര് ചപ്പാത്തിലും സത്രത്തിലും ഉപരോധം ഏര്പ്പെടുത്തി തീര്ത്ഥാടന പ്രവാഹത്തിന് തടയിടാനാണ് ശ്രമമെന്ന വിമര്ശനം ശക്തമാണ്.
വിഷയത്തില് ആശങ്കയുമായി മുല്ലപ്പെരിയാര് സമര സമിതി കഴിഞ്ഞ മാസം രംഗത്തെത്തിയിരുന്നു. ഡാമിലെ ജലനിരപ്പ് 152 അടിയാക്കി ഉയര്ത്തുമെന്ന തമിഴ്നാട് സര്ക്കാരിന്റെ നിലപാട് പെരിയാര് തീരവാസികളോടുള്ള വെല്ലുവിളിയാണെന്ന് മുല്ലപ്പെരിയാര് സമര സമിതി കണ്വീനര് ഷാജി പി. ജോസഫ് പറഞ്ഞു. അണക്കെട്ടില് സുപ്രീംകോടതി നിര്ദേശിച്ച കോംപ്രിഹെന്സീവ് ഡാം സേഫ്റ്റി ഇവാലുവേഷന് ഉടന് നടത്തണമെന്നും പുതിയ ഡാം നിര്മിക്കുന്നതിന് ഇരുസംസ്ഥാനങ്ങളും ധാരണയിലെത്തണമെന്നും അദ്ദേഹം ആവശ്യപ്പെട്ടു.
