Kangana Ranautചെന്നൈ: ബോളിവുഡ് നടിയും ബിജെപി എംപിയുമായ കങ്കണ റണാവത്തിനെ പ്രശംസിച്ച് നടി ഐശ്വര്യ ലക്ഷ്മി. കങ്കണയെ ‘മാഡ് ജീനിയസ്’ എന്നാണ് ഐശ്വര്യ വിശേഷിപ്പിച്ചത്. പാർലമെന്റിലെ കങ്കണയുടെ പ്രസംഗങ്ങൾ കാണാൻ തനിക്ക് ഏറെ ഇഷ്ടമാണെന്നും അവർ പറഞ്ഞു. ഗലാട്ട പ്ലസിനു നൽകിയ അഭിമുഖത്തിലായിരുന്നു ഐശ്വര്യയുടെ പ്രതികരണം.
“എനിക്ക് കങ്കണ റണാവത്തിനെ വളരെ ഇഷ്ടമാണ്. അവർ ഒരു ‘മാഡ് ജീനിയസ്’ ആണെന്നാണ് എനിക്ക് തോന്നുന്നത്. സ്വയം പരിശ്രമിച്ച് മികച്ച രീതിയിൽ സംസാരിക്കാനും മികച്ച പ്രാസംഗികയാകാനും അവർ പഠിച്ചത് എനിക്ക് ഇഷ്ടമാണ്. പാർലമെന്റിൽ അവർ നടത്തുന്ന പ്രസംഗങ്ങളും ഞാൻ ആസ്വദിച്ച് കാണാറുണ്ട്,” ഐശ്വര്യ പറഞ്ഞു.
സിനിമാ രംഗത്ത് യാതൊരു പാരമ്പര്യ പിന്തുണയുമില്ലാതെ സ്വന്തം പരിശ്രമത്തിലൂടെയാണ് കങ്കണ റണാവത്ത് ശ്രദ്ധേയ സ്ഥാനത്തേക്ക് എത്തിയത്. കരിയറിന്റെ തുടക്കത്തിൽ ഭാഷയുടെ പേരിൽ വിമർശനങ്ങൾ നേരിട്ടിരുന്നെങ്കിലും പിന്നീട് സ്വന്തം കഴിവിലൂടെ ബോളിവുഡിലെ മുൻനിര താരമായി മാറി.
‘ഫാഷൻ’, ‘ക്വീൻ’, ‘തനു വെഡ്സ് മനു റിട്ടേൺസ്’, ‘മണികർണിക’ തുടങ്ങിയ ചിത്രങ്ങളിലെ പ്രകടനങ്ങൾക്ക് നാല് ദേശീയ ചലച്ചിത്ര പുരസ്കാരങ്ങളും കങ്കണ സ്വന്തമാക്കിയിട്ടുണ്ട്.
2024-ലെ ലോക്സഭാ തിരഞ്ഞെടുപ്പിൽ ഹിമാചൽ പ്രദേശിലെ മാണ്ഡി മണ്ഡലത്തിൽ നിന്ന് ബിജെപി സ്ഥാനാർത്ഥിയായി വിജയിച്ച കങ്കണ, പിന്നീട് പാർലമെന്റിലെ പ്രസംഗങ്ങളിലൂടെയും ശ്രദ്ധ നേടിയിരുന്നു.
അതേസമയം, തിരുവനന്തപുരം സ്വദേശിയായ ഐശ്വര്യ ലക്ഷ്മിയും സിനിമയിൽ യാതൊരു പാരമ്പര്യവുമില്ലാതെ സ്വന്തം കഴിവിലൂടെ ശ്രദ്ധ നേടിയ നടിയാണ്. എറണാകുളത്തെ ശ്രീനാരായണ ഇൻസ്റ്റിറ്റ്യൂട്ട് ഓഫ് മെഡിക്കൽ സയൻസസിൽ നിന്ന് എംബിബിഎസ് പൂർത്തിയാക്കിയ ശേഷം മോഡലിങ്ങിലൂടെയാണ് അഭിനയരംഗത്തേക്ക് എത്തിയത്.
‘ഞണ്ടുകളുടെ നാട്ടിൽ ഒരിടവേള’, ‘മായാനദി’, ‘വരത്തൻ’, ‘കുമാരി’, ‘ഗാർഗി’, ‘പൊന്നിയിൻ സെൽവൻ’, ‘അമ്മു’ തുടങ്ങി മലയാളത്തിനൊപ്പം തമിഴ്, തെലുങ്ക് സിനിമകളിലും ഐശ്വര്യ ശ്രദ്ധേയ സാന്നിധ്യമാണ്
