ഡാളസ്: ലോകകപ്പ് പ്രാഥമിക റൗണ്ടിലെ മറ്റൊരു ഹെവിവെയ്റ്റ് പോരാട്ടം. ഗ്രൂപ്പ് എഫില് ഇന്ന്, ഓറഞ്ച് പട എന്നറിയപ്പെടുന്ന നെതര്ലന്ഡ്സും നീല സമുറായികളായ ജപ്പാനും ഏറ്റുമുട്ടും.
ഡാളസിലെ എടി ആന്ഡ് ടി സ്റ്റേഡിയത്തിലാണ് മത്സരം. ഗ്രൂപ്പിലെ മറ്റ് ടീമുകളായ സ്വീഡനും ടുണീഷ്യയും ഉള്ളതിനാല്, ഈ മത്സരത്തിലെ വിജയം നോക്കൗട്ട് റൗണ്ടിലേക്കുള്ള യാത്രയില് നിര്ണായകമാകും. 12 തവണ ലോകകപ്പിന് യോഗ്യത നേടി, മൂന്നു തവണ (1974, 78,2010) ലോകകപ്പ് ഫൈനലിലെത്തിയിട്ടും കിരീടം നേടാനാകാത്ത ടീമാണ് നെതര്ലന്ഡ്സ്. ഈ ലോകകപ്പിലും അവര് ശക്തമായ ടീമുമായാണ് എത്തിയിരിക്കുന്നത്. യോഗ്യതാ മത്സരങ്ങളില് തോല്വിയറിയാതെ മുന്നേറിയ ഡച്ച് സംഘം ഗ്രൂപ്പ് എഫിലെ ഫേവറിറ്റുകളായാണ് കണക്കാക്കപ്പെടുന്നത്.
അതേസമയം, ഏഷ്യന് ഫുട്ബോളിന്റെ അഭിമാനമായ ജപ്പാന്, യോഗ്യതാ റൗണ്ടില് അതിശയിപ്പിക്കുന്ന പ്രകടനമാണ് കാഴ്ചവച്ചത്. ഏഷ്യന് യോഗ്യതാ മത്സരങ്ങളില് ഏറ്റവും കൂടുതല് ഗോള് നേടിയ ടീമും ഏറ്റവും കുറവ് ഗോള് വഴങ്ങിയ ടീമുമായിരുന്നു അവര്. 54 ഗോളുകളാണ് എഎഫ്സി യോഗ്യതാ റൗണ്ടില് അവര് അടിച്ചുകൂട്ടിയത്. വഴങ്ങിയത് മൂന്നു ഗോള് മാത്രം.
നെതര്ലന്ഡ്സും കഴിഞ്ഞ 10 മത്സരങ്ങളില് തോല്വിയറിയാതെയാണ് വരവ്. അതുപോലെ യോഗ്യതാ റൗണ്ടില് ഒരു മത്സരത്തില്പ്പോലും പരാജയപ്പെട്ടിട്ടില്ല. 2022 ലോകകപ്പില് ക്വാര്ട്ടര് ഫൈനലിലെത്തിയ അവര് അര്ജന്റീനയോട് തോറ്റു. യൂറോ 2024 സെമിഫൈനലിസ്റ്റുകളായ ഓറഞ്ച് പടയുടെ ശക്തി മികച്ച പ്രതിരോധവും പന്തടക്കവുമാണ്. വിര്ജില് വാന് ദെയ്ക്, ഫ്രെങ്കി ഡി ജോങ്, മെഫിസ് ഡെപ്പെ, കോഡി ഗാക്പോ, റ്യാന് ഗ്രാവന്ബെര്ഷ് എന്നിവരാണ് പ്രധാന താരങ്ങള്. ലോകോത്തര സെന്റര്-ബാക്കുകള്, മിഡ്ഫീല്ഡിലെ നിയന്ത്രണം, സെറ്റ്-പീസുകളിലെ മികവ് എന്നിവയാണ് അവരുടെ ശക്തി. മുന്നേറ്റനിരയുടെ സ്ഥിരതയില്ലായ്മയും ടീമിലെ ചിലരുടെ പരിക്കും ആശങ്കപ്പെടുത്തുന്നു.
തുടര്ച്ചയായ എട്ടാം തവണ ലോകകപ്പിനെത്തുന്ന ജപ്പാന് 2022 ലോകകപ്പില് കരുത്തരായ ജര്മനിയെയും സ്പെയിനിനെയും പരാജയപ്പെടുത്തിയിരുന്നു. അവസാനം കളിച്ച ആറു മത്സരങ്ങളിലും ജയിച്ചു. തകേഫുസ കുബോ, ഡായ്ചി കമാഡ, ടകേഹിറോ തോമിയാസു, ഡായ്സണ് മായേഡ, അയാസെ ഉവേഡ എന്നിവരാണ് ടീമിലെ പ്രധാന താരങ്ങള്.
അതിവേഗ കൗണ്ടര് അറ്റാക്ക് ആണ് ജപ്പാന്റെ ശക്തി. ഒപ്പം യൂറോപ്യന് ലീഗുകളില് അവരുടെ നിരവധി താരങ്ങള് കളിക്കുന്നതും ഗുണമാണ്. ക്യാപ്റ്റന് വടാരു എന്ഡോ പരിക്ക് കാരണം പിന്മാറി. ശാരീരിക ശക്തിയില് ഡച്ചുകാര്ക്ക് മുന്തൂക്കം ലഭിച്ചേക്കാം. ജപ്പാന്റെ ഏറ്റവും അപകടകാരിയായ ആക്രമണായുധമാണ് കുബോ. അദ്ദേഹത്തെ നിയന്ത്രിക്കാനായാല് ഡച്ചുകാര്ക്ക് വലിയ ആശ്വാസമാകും.
ലോകകപ്പ് വേദിയില് ഇരു ടീമുകളും മുമ്പ് ഒരിക്കല് മാത്രം ഏറ്റുമുട്ടിയിട്ടുണ്ട്. 2010 ലോകകപ്പില് നെതര്ലന്ഡ്സ് 1-0 ന് ജയിച്ചിരുന്നു.
