തിരുവല്ല: കൊമ്പുകള് വളഞ്ഞ് വളര്ന്നതോടെ ശ്രീവല്ലഭ ദാസന് തിരുവല്ല ജയരാജന് ദുരിത കാലം. ഇതു മൂലം ആനയ്ക്ക് തുമ്പിക്കൈ ഉയര്ത്താനാകുന്നില്ല. തീറ്റയെടുക്കുന്നതും ഏറെ പ്രയാസപ്പെട്ടാണ്. കൊമ്പ് മുറിക്കാനുള്ള നടപടി ക്രമങ്ങള് ജനുവരിയില് തുടങ്ങിയതാണ്. എന്നാല് തിരുവിതാംകൂര് ദേവസ്വം ബോര്ഡിന്റെയും വനംവകുപ്പിന്റെയും മെല്ലപ്പോക്കുമൂലം കൊമ്പ് മുറിക്കല് അനിശ്ചിതമായി നീളുകയാണ്. ഇതിനിടെ ആന മദപ്പാടിലായതിനാല് തീരുമാനം ഉടന് വന്നാലും മദപ്പാട് കഴിയും വരെ കൊമ്പു മുറിക്കല് നീട്ടിവെക്കേണ്ടിവരും. ഇത്ആനയുടെ ജീവിതം കൂടുതല് ദുസ്സഹമാക്കും.
2022 ആഗസ്തിലാണ് ഇതിന് മുമ്പ് ആനയുടെ കൊമ്പ് മുറിച്ചത്. അന്ന് മാധ്യമങ്ങളുടെയും ഭക്തരുടെയും ഇടപെടല്മൂലമാണ് ബോര്ഡ് നടപടിയെടുത്തത്.
29 വയസുള്ള ഗജരാജന് ജയരാജിന് കൊമ്പുകള് എന്നും പ്രശ്നമായിരുന്നു. 2015 ലും 19 ലും മുറിച്ച് ആകൃതി വരുത്തിയിരുന്നു. കൊമ്പ് വളര്ന്ന് തുമ്പിക്കൈ ഉയര്ത്താനാകാത്ത അവസ്ഥ ആനകള്ക്ക് ഏറെ വേദനാജനകമാണ്.
ശരിയായി ഭക്ഷണം കഴിയ്ക്കാനാവില്ലെന്നതിനാല് ആനയ്ക്ക് ക്ഷീണമേറും. ബുദ്ധിമുട്ട് നേരിടുന്ന സാഹചര്യമാണ്. കൊമ്പുകളില് ഉരസി തുമ്പിക്കൈ മുറിഞ്ഞ വേദന സഹിച്ചാണ് ആന മതില്ക്കകത്ത് തുടരുന്നത്.
