ന്യൂയോര്ക്കില് നിന്ന്
ഭാഗ്യരാജ്
ന്യൂയോര്ക്ക് സിറ്റി: ലോകകപ്പ് തൊട്ടടുത്ത് എത്തിയെങ്കിലും അമേരിക്കയില് ആവേശം ഉച്ചസ്ഥായിയിലേയ്ക്ക് എത്തുന്നതേയുള്ളു. നിലവില് ആവേശം തകര്ത്തു വാരുന്നത് മെക്സിക്കോയിലാണ്. അവിടെയാണല്ലോ കപ്പിന്റെ അരങ്ങേറ്റം. മാത്രമല്ല, ലാറ്റിനമേരിക്കന് ഫുട്ബോള് കമ്പത്തിന്റെ പങ്കുപറ്റിയാണ് മെക്സിക്കോയുടെ കിടപ്പ്. ആ ആവേശത്തിന്റെ രാപ്പനി അവരേയും പിടികൂടാതിരിക്കില്ല. അമേരിക്കയില് കാര്യങ്ങള് അല്പം വ്യത്യസ്തമാണ്. സോക്കര് എന്ന് ഇവിടത്തുകാര് വിളിക്കുന്ന ഫുട്ബോളിന് യൂറോപ്പിലേയോ ലാറ്റിനമേരിക്കയിലേയോ പോലുള്ള ആവേശം ഇനിയും ആയിട്ടില്ല. പോരാത്തതിന് ഇക്കുറി തൊട്ടാല് പൊള്ളുന്ന ടിക്കറ്റ് നിരക്കാണ് കളികള്ക്ക്. സാധാരണക്കാര്ക്കെന്നല്ല ഒരുവിധപ്പെട്ടവര്ക്കൊന്നും ചിന്തിക്കാന് വയ്യാത്ത വില. ഫുട്ബോള് പണക്കാരുടെ മാത്രം കളിയായി മാറുന്ന സ്ഥിതിയാണ് ഈ ലോകകപ്പ് പൊതുവെ കാണിച്ചുതരുന്നത്. കളികള് പ്രത്യേകിച്ചു ഫുട്ബോള്, ലോകത്തേയും ജനതയേയും ഒന്നിപ്പിക്കുമെന്നാണ് പൊതുവെ പറയുന്നതെങ്കിലും ഇവിടെ കഥ അല്പം വ്യത്യസ്തം തന്നെയാണ്. മിക്കവരും ടിവി സെറ്റിനു മുന്നിലെ ആരാധകരായി ഒതുങ്ങും.
ന്യൂയോര്ക്കിലെ ആദ്യ മല്സരം ബ്രസീലും മൊറോക്കോയും തമ്മിലാണ്. വേദി മെറ്റ്ലൈഫ് സ്റ്റേഡിയം. ലോകത്തിലെ ഏറ്റവും വലിയ സ്റ്റേഡിയങ്ങളില് ഒന്ന്. ഇരിപ്പിടം 84,500. ബ്രസീല് നാലാം കിരീടമണിഞ്ഞ 1994ലെ ഫൈനല് വേദി. വിവരണമൊക്കെ കൊള്ളാം പക്ഷേ, അവിടെ കയറണമെങ്കില് ഏറ്റവും കുറഞ്ഞ ടിക്കറ്റ് നിരക്ക് 140 ഡോളറിനു മേലാണ്. ഇന്ത്യന് രൂപയില് പറഞ്ഞാല് ഏകദേശം പതിമൂവായിരം രൂപ. കൂടിയ ടിക്കറ്റ് വില ഒന്നര ലക്ഷത്തോളം വരും. ഇതുവച്ചു കണക്കാക്കിയാല് അറിയാമല്ലോ വരും മല്സരങ്ങളുടെ വില. കിരീടമണിഞ്ഞ കളത്തില് ബ്രസീല് ഒരിക്കല്ക്കൂടി അരങ്ങേറുന്നത് അവരെ സംബന്ധിച്ച് സന്തോഷകരമാണെങ്കിലും എതിരാളികല് കുറച്ചു കടുപ്പക്കാരാണെന്ന യാഥാര്ഥ്യം ബാക്കി നില്ക്കുന്നു. ബ്രസീലിന്റെ ഒഴുക്കുള്ള ലാറ്റിനമേരിക്കന് ശൈലി മറികടക്കേണ്ടത് ആഫ്രിക്കന് കരുത്തിനെയാണ്. ബ്രസീലും ഇക്കുറി സ്വതസ്സിദ്ധമായ കളിശൈലിയില് നിന്നു മാറിയാണെന്നതും ഓര്ക്കണം. കാര്ലോ ആഞ്ചലോട്ടി എന്ന കോച്ചിനു കീഴില് അവര് യൂറോപ്യന് ശൈലി കൈവശമാക്കിയാണ് വരുന്നത്. അതു കളിക്ക് സൗന്ദര്യത്തിനൊപ്പം കരുത്തുകൂടി ചേര്ക്കും.
എന്നാല്, ഇവിടെ ആരാധകരുടെ താത്പര്യങ്ങള് പൊതുവെ വ്യത്യസ്തമാണ്. സ്പാനിഷ് ജനസംഖ്യകൂടുതലുള്ള ഇവിടെ, ടീമെന്ന നിലയില് സ്പെയ്നിനോടാണ് പൊതുവെ താത്പര്യം കൂടുതല്. കറുത്ത വര്ഗക്കാര് ധാരാളമുള്ളതിനാല് ആഫ്രിക്കന് ടീമുകള്ക്കും ആരാധകര് ഏറും. അതിന്റെ ആനുകൂല്യം മൊറോക്കോയ്ക്കു കിട്ടും. അല്ലെങ്കിലും ഇത്തവണ വിലയിരുത്തലുകളില് പൊതുവെ സ്പെയ്നിന് ആണല്ലോ മൂന്തൂക്കം. ഓരോ പൊസിഷനിലും ഒന്നിനൊന്നു മെച്ചപ്പെട്ട കളിക്കാര് കൈവശമുള്ള അവരെ മറികടക്കാന് എതിരാളികല് വിയര്ക്കും. മെസ്സിക്കും നെയ്മര്ക്കും റൊണാള്ഡോയ്ക്കും മറ്റും ചുറ്റും കറങ്ങുന്നതു പോലുള്ള ടീമല്ല സ്പെയ്ന്. അവരുടേതു ടീം ഗെയിമാണ്. ഓരോ പൊസിഷനലും ഇളകിയുറച്ച കളിക്കാരുള്ളപ്പോല് അവര്ക്കതിനു കഴിയും. 2010ല് ആദ്യ ലോകകപ്പു നേടിയപ്പോള് സ്പെയ്ന് അതു കാണിച്ചു തന്നതാണല്ലോ. ഇവിടെ അതിന്റെ തനിയാവര്ത്തനമായിക്കൂടെന്നില്ല.
