ന്യൂഡൽഹി ; തൃണമൂൽ കോൺഗ്രസ് പ്രസിഡന്റ് മമത ബാനർജി ആശങ്കയിലാക്കി വീണ്ടും പാർട്ടിയിൽ കൊഴിഞ്ഞുപോക്ക്. തൃണമൂൽ രാജ്യസഭാ എംപിയായ സുഷ്മിത ദേവ് പാർട്ടിയിലെ എല്ലാ സ്ഥാനങ്ങളിൽ നിന്നും രാജിവച്ചു. ഈ ആഴ്ച പാർട്ടിയിൽ നിന്ന് രാജിവയ്ക്കുന്ന രണ്ടാമത്തെ രാജ്യസഭാ എംപിയാണ് അവർ.
ബുധനാഴ്ച രാവിലെ രാജ്യസഭാ ചെയർമാനെ കണ്ട് സുസ്മിത ദേവ് ഔദ്യോഗിക രാജി സമർപ്പിച്ചു . പാർലമെന്ററി സ്ഥാനം രാജിവച്ചതിനു പുറമേ, അസമിലെ തൃണമൂൽ കോൺഗ്രസിന്റെ പ്രസിഡന്റ് സ്ഥാനവും എല്ലാ സംഘടനാ സ്ഥാനങ്ങളും അവർ രാജിവച്ചു. മാത്രമല്ല സുഷ്മിത ബിജെപിയിൽ ചേരുമെന്നും സൂചനയുണ്ട് . രാജിവച്ചതിന് ശേഷം അസം മുഖ്യമന്ത്രി ഹിമന്ത ബിശ്വ ശർമ്മയുമായുള്ള കൂടിക്കാഴ്ചയും ഈ അഭ്യൂഹങ്ങൾക്ക് ആക്കം കൂട്ടുന്നു
2021 ലാണ് കോൺഗ്രസ് പാർട്ടി വിട്ട് സുഷ്മിത തൃണമൂൽ കോൺഗ്രസിൽ ചേർന്നത് .അസമിലെ മുതിർന്ന കോൺഗ്രസ് നേതാവ് സന്തോഷ് മോഹൻ ദേവിന്റെ മകളാണ് സുഷ്മിത ദേവ്. കോൺഗ്രസിന്റെ വനിതാ വിഭാഗമായ ഓൾ ഇന്ത്യ മഹിളാ കോൺഗ്രസിന്റെ തലവനായും അവർ സേവനമനുഷ്ഠിച്ചിട്ടുണ്ട്. മുമ്പ് പിതാവിന്റെ ശക്തികേന്ദ്രമായ അസമിലെ സിൽച്ചറിൽ നിന്നുള്ള പാർലമെന്റ് അംഗമായിരുന്നു അവർ.തിങ്കളാഴ്ച രാജ്യസഭാംഗം സുഖേന്ദു ശേഖർ റേയും ടിഎംസിയിൽ നിന്ന് രാജിവച്ചിരുന്നു.
