തിരുവനന്തപുരം: വി.ജോയി സിപിഎം ജില്ലാ സെക്രട്ടറിയാകുന്നതിനെ എതിര്‍ത്ത് മുന്‍ മന്ത്രിയും മുന്‍ ജില്ലാ സെക്രട്ടറിയുമായ കടകംപള്ളി സുരേന്ദ്രന്‍.മുന്‍ മന്ത്രി വി ശിവന്‍കുട്ടിയെ ജില്ലാ സെക്രട്ടറിയെ ആക്കണമെന്നാണ് കടകംപളളിയുടെ ആവശ്യം. എന്നാല്‍ സമ്മേളനം തിരഞ്ഞെടുത്ത വി.ജോയി തുടരട്ടെയെന്ന നിലപാടിലാണ് സംസ്ഥാന നേതൃത്വം . ജില്ലയിലെ പ്രധാന നേതാക്കളായ ആനാവൂര്‍ നാഗപ്പന്‍, എം. വിജയകുമാര്‍ എന്നിവര്‍ ജോയിയെ അനുകൂലിച്ചു.
ജില്ലയില്‍ നിന്നുളള സംസ്ഥാന സമിതി അംഗങ്ങളുടെ യോഗത്തിലാണ് വി ജോയിയെ ജില്ലാ സെക്രട്ടറിയാക്കാന്‍ തീരുമാനിച്ചത്.ബുധനാഴ്ച നടക്കുന്ന ജില്ലാ കമ്മിറ്റിയില്‍ സംസ്ഥാന സെന്റര്‍ വി.ജോയിയുടെ പേര് നിര്‍ദ്ദേശിക്കും. സിപിഎം തിരുവനന്തപുരം ജില്ലാ സെക്രട്ടറിയെ തീരുമാനിക്കാന്‍ ജില്ലയിലെ നേതാക്കളുമായി സംസ്ഥാന സെക്രട്ടറി എംവി ഗോവിന്ദന്‍ എകെജി സെന്ററില്‍ വച്ച് ചര്‍ച്ച നടത്തിയിരുന്നു.
എം എല്‍ എമാര്‍ ജില്ലാ സെക്രട്ടറി സ്ഥാനം ഒഴിയുന്നതാണ് സി പി എമ്മിലെ രീതി. എന്നാല്‍ ജില്ലയില്‍ നിലവിലുളള രൂക്ഷമായ തര്‍ക്കത്താലാണ് ജോയിയോട് തുടരാന്‍ നിര്‍ദ്ദേശിക്കുന്നത്. നിയമസഭാ തിരഞ്ഞെടുപ്പില്‍ മത്സരിച്ചതിനെ തുടര്‍ന്ന് വി.ജോയിയെ ജില്ലാ സെക്രട്ടറി സ്ഥാനത്ത് നിന്ന് താല്‍ക്കാലികമായി മാറ്റിയിരുന്നു. സംസ്ഥാന കമ്മിറ്റി അംഗമായ എ.എ.റഹീമിനാണ് ജില്ലാ സെക്രട്ടറിയുടെ താല്‍ക്കാലിക ചുമതല.
