ചെന്നൈ : ദർഗ നിലനിൽക്കുന്നു എന്നതുകൊണ്ട് മാത്രം ഭൂമി ‘വഖഫ് സ്വത്തായി’ മാറില്ലെന്ന് മദ്രാസ് ഹൈക്കോടതി. ചെന്നൈയിലെ ട്രിപ്ലിക്കേനിലെ കാമരാജ് റോഡിൽ സ്ഥിതി ചെയ്യുന്ന സർക്കാർ സയ്യിദ് ഹബീബുള്ള ഷാ ഖദാരി ആരിഫ് റബ്ബാനി ഹസ്രത്ത് ദർഗയ്ക്ക് മുതവല്ലിയെ നിയമിച്ച തമിഴ്നാട് വഖഫ് ബോർഡ് പ്രമേയം റദ്ദാക്കിക്കൊണ്ടാണ് കോടതിയുടെ ഉത്തരവ്.
എം മുഹമ്മദ് അസ്മത്തുള്ള മുഖേന ദർഗ സമർപ്പിച്ച അപ്പീൽ ജസ്റ്റിസ് കെ ഗോവിന്ദരാജൻ തിലകവാടിയാണ് കേട്ടത്. വഖഫ് നിയമപ്രകാരമുള്ള നിയമപരമായ ആവശ്യകതകൾ നിറവേറ്റപ്പെടുമ്പോൾ മാത്രമേ ഒരു ദർഗയെ വഖഫ് ആയി കണക്കാക്കാൻ കഴിയൂ എന്ന് കോടതി വിധിച്ചു. മതപരമായ ഉപയോഗമോ, ഖബർ ഉണ്ടെന്നതോ, ആരാധനാലയത്തിന്റെ സാന്നിധ്യമോ വഖഫ് ഉടമസ്ഥതയുടെയോ വഖഫ് ബോർഡിന്റെ അധികാരപരിധിയുടെയോ തെളിവായി കണക്കാക്കാൻ കഴിയില്ലെന്ന് കോടതി വ്യക്തമാക്കി.
ഒരു സ്ഥലം മതപരമായിരിക്കാം, എന്നാൽ , സ്വത്ത് വഖഫിന്റേതാണെന്നും വഖഫ് ബോർഡിന് അതിന്റെ അഡ്മിനിസ്ട്രേറ്ററെ നിയമിക്കാൻ അധികാരമുണ്ടെന്നും ഇതുകൊണ്ട് അർത്ഥമാക്കുന്നില്ലെന്നും കോടതി പറഞ്ഞു.
