ഇത്തവണത്തെ ലോകകപ്പിലെ ഏറ്റവും സന്തുലിതമായ ഒരു ഗ്രൂപ്പെന്നു വിലയിരുത്താം എഫിനെ. നെതര്ലന്ഡ്സ്, , ജപ്പാന്, സ്വീഡ, ടുണിഷ്യ. എല്ലാക്കാലത്തും മികച്ച ടീമുകളുമായെത്തുന്ന ഓറഞ്ച് പട എന്നറിയപ്പെടുന്ന നെതര്ലന്ഡ്സ് ആണ് ഗ്രൂപ്പിലെ കൊമ്പന്മാര്. അവര് തന്നെയാകും ഗ്രൂപ്പ് ജേതാക്കളാകാന് സാധ്യത. എന്നാല് ജപ്പാനും സ്വീഡനും തമ്മിലുള്ള രണ്ടാം സ്ഥാനപ്പോരാട്ടം ലോകകപ്പിലെ ഏറ്റവും ആവേശകരമായ ഗ്രൂപ്പ് പോരാട്ടങ്ങളില് ഒന്നായേക്കും.
നെതര്ലന്ഡ്സ്
ലോകഫുട്ബോളിലെ പരമ്പരാഗത ശക്തികളിലൊന്നാണ്. മൂന്ന് തവണ ലോകകപ്പ് ഫൈനലിലെത്തിയെങ്കിലും കിരീടം നേടാനായിട്ടില്ല. ആക്രമണാത്മക ഫുട്ബോള്, മികച്ച പാസിങ്, യുവതാരങ്ങളുടെ വളര്ച്ച എന്നിവയാണ് അവരുടെ പ്രധാന ശക്തി. പ്രതിരോധനിരയില് വിര്ജില് വാന് ദെയ്ക് പോലുള്ള നേതാക്കളും മധ്യനിരയില് സാവി സിമോണ്സ് പോലുള്ള സാങ്കേതിക മികവുള്ള താരങ്ങളും ടീമിലുണ്ട്. ഗ്രൂപ്പിലെ ഒന്നാം സ്ഥാനത്തിനുള്ള പ്രധാന ഫേവറിറ്റായി നെതര്ലാന്ഡ്സിനെ കണക്കാക്കാം.
ശക്തിയും ദൗര്ബല്യവും
ഉയര്ന്ന നിലവാരമുള്ള യൂറോപ്യന് താരങ്ങളാണ് ടീമിന്റെ പ്രത്യേകത. മികച്ച പ്രതിരോധവും വേഗതയുമാണ് അവരുടെ കളിയുടെ രീതി. അതുപോലെ തന്നെ പരിചയസമ്പത്ത്. വലിയ ടൂര്ണമെന്റുകളില് നിരന്തരം കളിച്ചുള്ള പരിചയം അവര്ക്ക് മുതല്ക്കൂട്ടാണ്. അതേസമയം, നിര്ണായക ഘട്ടങ്ങളില് സമ്മര്ദ്ദം കൈകാര്യം ചെയ്യുന്നതില് പരാജയപ്പെടുന്നതാണ് പലപ്പോഴും ടീമിന്റെ പ്രധാന പ്രശ്നം. കഴിഞ്ഞ ലോകകപ്പിലടക്കം ഇത് നാം കണ്ടതാണ്.
ജപ്പാന്
ഏഷ്യന് ഫുട്ബോളിന്റെ അഭിമാനമാണ് ജപ്പാന്. കഴിഞ്ഞ പല ലോകകപ്പുകളിലും അവര് നോക്കൗട്ട് ഘട്ടത്തിലെത്തിയിട്ടുണ്ട്. അതിവേഗ കൗണ്ടര് അറ്റാക്കും മികച്ച ടീം വര്ക്കുമാണ് അവരുടെ പ്രധാന ആയുധങ്ങള്. കഴിഞ്ഞ ലോകകപ്പില് ജര്മനിയെ വരെ അട്ടിമറിച്ച ടീം. ടക്കേഫുസ കുബോ, കവോരു മിടോമ തുടങ്ങിയ താരങ്ങള് യൂറോപ്പിലെ മുന്നിര ലീഗുകളില് തിളങ്ങുന്നവരാണ്.
ശക്തിയും ദൗര്ബല്യവും
വേഗതയാണ് ജപ്പാന്റെ വലിയ ഗുണം. ജര്മന് പട്ടാളത്തിന്റെ ഗോള് പോസ്റ്റിലേക്ക് ശരവേഗം കയറിപ്പോകുന്ന ജാപ്പനീസ് സമുറായികളെ കഴിഞ്ഞ ലോകകപ്പില് നാം കണ്ടു. കളിക്കാരുടെ ഫിറ്റ്നസ് അപാരമാണ്. അതുപോലെ ടീമിന്റെ കോര്ഡിനേഷനും. അതേസമയം, ശാരീരിക ശക്തിയേറിയ ടീമുകള്ക്കെതിരെ കളിക്കുമ്പോള് പലപ്പോഴും കാലിടറാറുണ്ട്.
സ്വീഡന്
സ്ലാട്ടന് ഇബ്രഹാമോവിച്ചിന്റെ സ്വീഡന് യൂറോപ്പിലെ സ്ഥിരതയാര്ന്ന ടീമുകളിലൊന്നാണ്. ലോകകപ്പില് റണ്ണറപ്പായ ചരിത്രവുമുണ്ട്. ശക്തമായ പ്രതിരോധവും സെറ്റ് പീസുകളും അവരുടെ പ്രധാന കരുത്താണ്. ആക്രമണനിരയില് അലക്സാണ്ടര് ഇസാക്ക് പോലുള്ള ഗോള്വേട്ടക്കാരന് ടീമിന്റെ പ്രതീക്ഷയാണ്.
ശക്തിയും ദൗര്ബല്യവും
കളിക്കാരുടെ ശാരീരിക മികവും സംഘടിതമായുള്ള പ്രതിരോധവുമാണ് സ്വീഡന്റെ കരുത്ത്. എന്നാല്, അമിതമായ പ്രതിരോധാത്മകത തിരിച്ചടികളുണ്ടാക്കുന്നുണ്ട്. ഭാവനാ സമ്പന്നതയോടെയുള്ള നീക്കങ്ങളുടെ അപര്യപ്തത അവരുടെ പ്രധാന ദൗര്ബല്യമാണ്.
ടുണീഷ്യ
ആഫ്രിക്കയിലെ സ്ഥിരം ലോകകപ്പ് സാന്നിധ്യമാണ് ടുണീഷ്യ. ലോകകപ്പില് ഗ്രൂപ്പ് ഘട്ടം കടന്നിട്ടില്ലെങ്കിലും ശക്തരായ ടീമുകളെ അട്ടിമറിക്കാന് കഴിവുള്ള സംഘമാണ്. കൃത്യമായ പ്രതിരോധവും പോരാട്ടവീര്യവുമാണ് അവരുടെ മുഖമുദ്ര.
ശക്തിയും ദൗര്ബല്യവും
സംഘടിത പ്രതിരോധവും ടീമിന്റെ ഐക്യവും പ്രധാനം. ഈ ലോകകപ്പിലെ അണ്ടര്ഡോഗ് മനോഭാവം അവരുടെ ആത്മവിശ്വാസമാണ്. എന്നാല്, ഗോള് നേടുന്നതിലെ സ്ഥിരതക്കുറവും പരിചയസമ്പത്തിന്റെ അഭാവവും തിരിച്ചടിയായേക്കാം.
