ഓസ്ലോ: അവസാനറൗണ്ടില്‍ ജര്‍മ്മനിയുടെ വിന്‍സെന്‍റ് കെയ്‌മറെ ക്ലാസിക് ഗെയിമില്‍ തന്നെ തോല‍്പിച്ച് മൂന്ന് പോയിന്‍റ് നേടിയതോടെ ഇന്ത്യയുടെ പ്രജ്ഞാനന്ദ നോര്‍വ്വെ ചെസ് കിരീടം ചൂടി. ഇതാദ്യമായാണ് ഒരു ഇന്ത്യക്കാരന്‍ നോര്‍വ്വെ ചെസ് കിരീടം സ്വന്തമാക്കുന്നത്. കഴിഞ്ഞ എത്രയോവര്‍ഷങ്ങളായി നോര്‍വ്വെക്കാരന്‍ കൂടിയായ ചെസ്സിലെ ലോകരാജാവായ മാഗ്നസ് കാള്‍സന്‍ എന്ന അത്ഭുപ്രതിഭ സ്ഥിരം ചൂടിയിരുന്ന കിരീടമാണ് ഇക്കുറി പ്രജ്ഞാനന്ദയെ തേടി എത്തുന്നത്.
ആറ് റൗണ്ട് വരെ പിന്നില്‍ നിന്ന ശേഷമാണ് തുടര്‍ച്ചയായ നാല് ക്ലാസിക് ജയങ്ങളിലൂടെ പ്രജ്ഞാനന്ദ 18 പോയിന്‍റ് വാരിക്കൂട്ടിയത്. പ്രജ്ഞാനന്ദയുടെ ഈ പടയോട്ടത്തില്‍ മാഗ്നസ് കാള്‍സന്‍, ഫ്രഞ്ച് താരം അലിറെസ ഫിറൂഷ, ലോക ചെസ് ചാമ്പ്യന്‍ ഡി. ഗുകേഷ്, ജര്‍മ്മന്‍ താരം വിന്‍സെന്‍റ് കെയ്‌മര്‍ എന്നിവര്‍ ക്ലാസിക് ഗെയിമുകളില്‍ പ്രജ്ഞാനന്ദയോട് തോല്‍വി ഏറ്റുവാങ്ങി. മാഗ്നസ് കാള്‍സനെ ഈ ടൂര്‍ണ്ണമെന്‍റില്‍ രണ്ട് തവണ പ്രജ്ഞാനന്ദ തോല്‍പിച്ചിരുന്നു. 19 വര്‍ഷം മുന്‍പ് ആനന്ദ് മാത്രമാണ് ഇതുപോലെ കാള്‍സനെ രണ്ട് തവണ ഒരു ടൂര്‍ണ്ണമെന്‍റില്‍ തോല‍്പിച്ചിരിക്കുന്നത്.
നോര്‍വ്വെ കിരീടം നേടുന്ന പ്രജ്ഞാനന്ദയ്‌ക്ക് 70 ലക്ഷം രൂപയോളം സമ്മാനത്തുകയായി ലഭിയ്‌ക്കും. പ്രജ്ഞാനന്ദയോട് ഒന്നാം സ്ഥാനത്തിന് വേണ്ടി മത്സരിച്ച അമേരിക്കയുടെ വെസ്സി സോയ്‌ക്ക് അലിറെസ ഫിറൂഷയെ ക്ലാസിക്ക് ഗെയിമില്‍ തോല‍്പിക്കാന്‍ കഴിയാത്തതാണ് പ്രജ്ഞാനന്ദയ്‌ക്ക് കിരീടം നേടിക്കൊടുത്തത്. ക്സാസിക് ഗെയിം സമനിലയില്‍ പിരിഞ്ഞതോടെ ആമെഗെഡോണില്‍ മാത്രമാണ് വെസ്സി സോയ്‌ക്ക് വിജയം കണ്ടെത്താന്‍ സാധിച്ചത്. അതിനാല്‍ ഒന്നര പോയിന്‍റ് മാത്രം ലഭിച്ച വെസ്സി സോയ്‌ക്ക് പ്രജ്ഞാനന്ദയേക്കാള്‍ ഒരു പോയിന്‍റ് കുറവോടെ 17 പോയിന്‍റ് മാത്രമാണ് ലഭിച്ചത്.
അദാനിയും പ്രജ്ഞാനന്ദയുടെ വിജയത്തില്‍ ഏറെ സന്തോഷിക്കും. കാരണം കഴിഞ്ഞ ഏതാനും വര്‍ഷങ്ങളായി അദാനിയാണ് പ്രജ്ഞാനന്ദയുടെ മുഖ്യ സ്പോണ്‍സര്‍.
