ചെന്നൈ: സ്വന്തമായി പ്രസ്ഥാനം തുടങ്ങാന് ബിജെപിയില് നിന്നും രാജിവെച്ചെങ്കിലും പുതുതായി രൂപീകരിച്ച സംഘടനയ്ക്ക് വേണ്ടി മോദിയുടെ വാക്കുകളും സങ്കല്പങ്ങളും ആവോളം കടമെടുത്ത് അണ്ണാമലൈ. വി ദ ലീഡേഴ്സ് എന്ന് പേരിട്ട ഈ പ്രസ്ഥാനത്തിന്റെ മുഖ്യസേവകന് എന്നാണ് അണ്ണാമലൈ പരിചയപ്പെടുത്തിയിരിക്കുന്നത്. ഇത് മോദിയുടെ സങ്കല്പം തന്നെയാണ്. ബിജെപിയുടെ, സര്ക്കാരിന്റെ മുഖ്യസേവകനായി സ്വയം കാണുന്നതാണ് മോദിയുടെ രീതി.
ദല്ഹിയില് നേതാക്കള് സ്വയം ഷെഹ് സാദ(രാജാവ്) ആയി ചമയുന്ന രാഷ്ട്രീയ സംസ്കാരത്തിനെതിരെ പോരാടുന്ന മോദി തന്നെ സ്വയം പ്രധാന സേവകന് എന്നാണ് എപ്പോഴും വിശേഷിപ്പിക്കുക.. മാത്രമല്ല, ഐപിഎസ് പദവി രാജിവെച്ച് രാഷ്ട്രീയത്തിലേക്ക് കുതിച്ചുചാടാന് അണ്ണാമലൈയ്ക്ക് പ്രചോദനമായതും മോദി തന്നെ. അണ്ണാമലൈയുടെ മോദിയോടുള്ള വിശ്വസ്തതയും കൂറും കാരണം പുതുതായി രൂപീകരിക്കുന്ന പാര്ട്ടി മോദിയുടെ ബി ടീമായി മാറുമെന്ന് കോണ്ഗ്രസ് നേതാക്കള് ഉള്പ്പെടെ ആരോപിക്കുന്നുണ്ട്.
“ഒരൊറ്റ മനുഷ്യന് കാരണമാണ് ഞാന് രാഷ്ട്രീയത്തിലേക്ക് വന്നത്. അത് പ്രധാനമന്ത്രി മോദിയാണ്. അദ്ദേഹം പറയുന്നതെന്തും രണ്ടാമതൊന്നാലോചിക്കാതെ ഞാന് ചെയ്യും”- അണ്ണാമലൈ പല തവണ പ്രസംഗിച്ചിട്ടുള്ളതാണ് ഈ വാക്കുകള്. തന്റെ ഇന്സ്റ്റഗ്രാം പേജില് അണ്ണാമലൈ സ്വയം വിശേഷിപ്പിച്ചിരിക്കുന്നത് തന്നെ മോദിയുടെ കാലാള്പ്പടയില് ഒരാള് എന്നും സാധാരണക്കാരായ നിങ്ങളില് ഒരാള് എന്നുമാണ്.
പുതിയ പാര്ട്ടി രൂപീകരിച്ചപ്പോള് ഇതില് മോദിയുടെ കാലാള്പ്പടയില് ഒരാള് എന്ന വാചകം വെട്ടിക്കളഞ്ഞു. പകരം നല്ല രാഷ്ടീയം തേടുന്ന ഒരു സാധാരണക്കാരന് എന്നാണ് പുതിയ വിശേഷണം.
മോദി എപ്പോഴും പറയുന്ന കുടുംബരാഷ്ട്രീയത്തിനെ തൂത്തെറിയുക എന്നത് തന്നെയാണ് അണ്ണാമലൈയുടെ പാര്ട്ടിയുടെ ഒരു പ്രധാനദൗത്യം. വര്ഷങ്ങളായി ഡിഎംകെയിലെ കുടുംബരാഷ്ട്രീയമാണ് തമിഴ്നാടിനെ ഭരിയ്ക്കുന്നത്. ഇതിന് പകരമായി സാധാരണക്കാരെ ഭരണത്തിലേക്കും അധികാരത്തിലേക്കും എത്തിക്കുക എന്നതും അണ്ണാമലൈയുടെ പുതിയ പാര്ട്ടിയുടെ പ്രഖ്യാപിത നയമാണ്. ഒരു കുടുംബത്തിലേക്ക്, രാജാവിലേക്കും അധികാരം കേന്ദ്രീകരിക്കാതെ സാധാരണക്കാരിലേക്ക് അധികാരമെത്തിക്കുക എന്ന ഈ നയവും മോദിയുടെ സങ്കല്പം തന്നെ.
തമിഴ് ദേശീയത എന്ന നയം ഉയര്ത്തിപ്പിടിക്കുമ്പോഴും ഹിന്ദു സംസ്കാരത്തെ ഉള്ക്കൊള്ളുന്ന തമിഴ് ദേശീയതയാണ് അണ്ണാമലൈയുടെ മനസ്സില്. സുബ്രഹ്മണ്യഭാരതി എന്ന പഴയകാല കവിയുടെ വിശ്വാസത്തില് അടിയുറച്ച തമിഴ് ദേശീയതയെയാണ് അണ്ണാമലൈ വാഴ്ത്തുന്നത്. ഇതും മോദിയുടെ സങ്കല്പം തന്നെയാണ്. ഡിഎംകെ ഉയര്ത്തിപ്പിടിക്കുന്ന സനാതന ധര്മ്മത്തെ ഡെങ്കിപ്പനി പോലെ തുരത്തുന്ന ഒന്നല്ല അണ്ണാമലൈയുടെ തമിഴ് ദേശീയ സങ്കല്പം എന്നര്ത്ഥം.
രാഷ്ട്രീയവുമായി ബന്ധമില്ലാത്ത മിടുക്കരായ ശാസ്ത്രജ്ഞരെയും സാങ്കേതിക വിദഗ്ധരെയും രാഷ്ട്രനിര്മ്മാണത്തിനുള്ള പ്രധാന ചുമതലകള് ഏല്പിക്കണമെന്നും അണ്ണാമലൈ ആഗ്രഹിക്കുന്നു. ഇക്കാര്യത്തില് തമിഴ്നാട്ടില് നിന്നും ഉയര്ന്ന് ഇന്ത്യയുടെ രാഷ്ട്രപതി പദവി വരെ എത്തിയ അബ്ദുള് കലാമിനെ അണ്ണാമലൈ മാതൃകയാക്കുന്നു.
