കൊച്ചി: ലോകകപ്പ് ഫുട്ബോളില് ഭാരതം യോഗ്യരാകുന്നത് വിദൂരമായൊരു സ്വപ്നമായി ഇപ്പോഴും അവശേഷിക്കുന്നു, പക്ഷെ ഭാരത ഫുട്ബോള് ആരാധകരെ ആവേശത്തിലാഴ്ത്തിക്കൊണ്ട് നാല് ഭാരത വംശജരാണ് ഇത്തവണത്തെ ലോകകപ്പിന്റെ ഭാഗമാകുന്നത്. കൂടാതെ ഭാരത ഫുട്ബോള് ലീഗായ ഐഎസ്എല്ലില് കളിച്ച താരവും ഇത്തവണ ബൂട്ടുകെട്ടി ഇറങ്ങുന്നുണ്ട്.
ലോകകപ്പ് ഫുട്ബോളില് തിളങ്ങുന്ന സാന്നിധ്യമായിരുന്ന പല പ്രമുഖ ലോകകപ്പ് താരങ്ങളും ഐഎസ്എല്ലിന്റെ ഭാഗമായിട്ടുണ്ട്. മുംബൈ എഫ്സിക്കായി കളിച്ചിട്ടുള്ള ഉറുഗ്വേയുടെ ഡീഗോ ഫോര്ലാന്, ചെന്നൈയിന് എഫ്സി കോച്ചായിരുന്ന ഇറ്റലിയുടെ മാര്കോ മറ്റെരാസി തുടങ്ങിയവരെല്ലാം അതില് ചിലര് മാത്രം. എന്നാല് ഐഎസ്എല്ലില് അതിലുപരി കേരള ബ്ലാസ്റ്റേഴ്സിനായി കളിച്ച താരം ഇത്തവണ ലോകകപ്പില് കളിക്കാനിറങ്ങുന്നുണ്ട്. ഹെയ്തിക്കുവേണ്ടി ഇറങ്ങുന്ന ഡക്കന്സ് നേസന്. ലോകകപ്പിന്റെ ചരിത്രത്തില് രണ്ടാം തവണ യോഗ്യത നേടിയ ഹെയ്തിയുടെ മുന്നേറ്റ താരമാണ് ഡക്കന്സ്.
കേരള ബ്ലാസ്റ്റേഴ്സ് രണ്ടാം തവണ റണ്ണറപ്പായ 2016 സീസണില് കളിച്ചിട്ടുള്ള താരമാണ്. സ്റ്റീവ് കോപ്പല് പരിശീലകനായിരുന്ന അന്നത്തെ കേരള ബ്ലാസ്റ്റേഴ്സ് ടീമില് കളിച്ച ഡക്കന്സിന്റെ ഗോള് മികവിലാണ് ടീം നിര്ണായക മത്സരത്തില് ജയിച്ച് പ്ലേ ഓഫ് യോഗ്യത നേടിയത്. സീസണിനൊടുവില് കലൂര് സ്റ്റേഡിയത്തില് നടന്ന ഫൈനലില് അത്ലറ്റിക്കോ ഡി കൊല്ക്കത്തയോട് ഷൂട്ടൗട്ടിലാണ് ബ്ലാസ്റ്റേഴ്സ് പരാജയപ്പെട്ടത്. അന്ന് ഡക്കന്സിന് 22 വയസേ ഉണ്ടായിരുന്നുള്ളൂ. 2014 മുതല് അന്താരാഷ്ട്ര ഫുട്ബോളില് കരീബിയന് ടീം ഹെയ്തിക്കായി കളിച്ചുവരുന്നു. 78 മത്സരങ്ങളില് ബൂട്ടുകെട്ടി. ഹെയ്തിക്കായി ഏറ്റവും കൂടുതല് ഗോള് നേടിയ താരമാണ് ഈ 32 കാരന്. ആകെ നേടിയ ഗോളുകള് 44. നിലവില് കളിച്ചുകൊണ്ടിരിക്കുന്ന ടീം ഇറാനിലെ എസ്റ്റേഘ്ലല്.
തഹ്സിന് മുഹമ്മദ്
ഖത്തറില് സ്ഥിരതാമസമാക്കിയ മലയാളി ദമ്പതികളുടെ മകന് തഹ്സിന് മുഹമ്മദ് ആണ് ഭാരത വംശജനായ ഈ ലോകകപ്പിലെ ഒരു താരം. 20കാരനായ തഹ്സിന്റെ പിതാവ് ജംഷീദ് തലശേരിക്കാരനും അമ്മ ഷൈമ കണ്ണൂര് വളപട്ടണം സ്വദേശിയുമാണ്.
ഓസ്ട്രേലിയന് ടീമിന്റെ നിഷാന് വേലുപിള്ള
ആംഗ്ലോ ഇന്ത്യന് അമ്മയ്ക്കും മലേഷ്യയില് നിന്നുള്ള ശ്രീലങ്കന് തമിഴ് വംശജനായ അച്ഛന്റെയും മകനായാണ് നിഷാന് വേലുപിള്ള ജനിച്ചത്. മാതാപിതാക്കള് ഓസ്ട്രേലിയയില് സ്ഥിരതാമസമാക്കിയതിനെ തുടര്ന്ന് നിഷാന്റെ ജനനവും വളര്ച്ചയുമെല്ലാം ഓസ്ട്രേലിയക്കാരാനായിരുന്നു. വളര്ച്ചയ്ക്കൊപ്പം ഫുട്ബോളിനെയും കൂടെ കൂട്ടി. ഇപ്പോള് അത് ലോകകപ്പ് ഫുട്ബോള് കളിത്തട്ടില് എത്തിനില്ക്കുന്നു.
2024 മുതല് ഓസ്ട്രേലിയന് ഫുട്ബോള് ടീമിലുണ്ട്. 25കാരനായ താരം നിലവില് മെല്ബണ് വിക്ടറി എഫ്സിക്കായി കളിക്കുന്ന വിങ്ങര് ആണ്.
സാമുവല് മുത്തുസ്വാമി (ഡിആര് കോംഗോ)
ഫ്രാന്സില് ജനിച്ച സാമുവല് മുത്തുസ്വാമി നിലവില് ഡിആര് കോംഗോയുടെ ഡിഫെന്സീവ് മിഡ്ഫീല്ഡര് ആണ്. ഗ്രീക്ക് സൂപ്പര് ലീഗില് അട്രോമിറ്റോസിനായി കളിക്കുന്നു.
സാമുവലിന്റെ അമ്മ കോംഗോക്കാരിയാണ്. അച്ഛന് തമിഴ്നാട്ടില് ജനിച്ച ഗ്വാഡിലോപിയന് കാരനും.
ന്യൂസിലന്ഡിന്റെ സര്പ്രീത് സിങ്
ന്യൂസിലന്ഡിനായി അറ്റാക്കിങ് മിഡ്ഫീല്ഡില് കളിക്കുന്ന സര്പ്രീത് സിങ്ങിന്റെ മാതാപിതാക്കള് പഞ്ചാബില് നിന്നുള്ളവരാണ്. സര്പ്രീതിന്റെ ജനനം ന്യൂസിലന്ഡിലെ ഓക്ക്ലണ്ടിലായിരുന്നു. നിലവില് വെല്ലിങ്ടണ് ഫീനിക്സിന് വേണ്ടി കളിചുകൊണ്ടിരിക്കുന്നു. ജര്മന് ടീം ബയേണ് മ്യൂണിക്കിനായി കളിച്ച ആദ്യ ഭാരത വംശജന് കൂടിയാണ് സര്പ്രീത്. ബയേണ് രണ്ടാം ഡിവിഷന് ടീമില് സജീവമായിരുന്ന താരം 2019-20 സീസണിലെ രണ്ട് മത്സരങ്ങളിലാണ് ബയേണിനായി പന്ത് തട്ടാനിറങ്ങിയത്.
