തിരുവനന്തപുരം: പ്രതിപക്ഷ ഉപനേതൃപദവിക്കായി സമ്മര്ദ്ദം ചെലുത്തുന്ന സി പി ഐയോട് പറ്റില്ലെന്ന് തുറന്നു പറഞ്ഞ് സി പി എം. ഇതോടെ ഇടതുമുന്നണിയില് അസാധാരണ പ്രതിസന്ധി രൂപപ്പെട്ടു. സിപിഎം-സിപിഐ സംസ്ഥാന സെക്രട്ടറിമാര് എ കെ ജി സെന്ററില് ഇന്ന് നടത്തിയ ഉഭയകക്ഷി ചര്ച്ച പരാജയപ്പെട്ട സാഹചര്യത്തില് സഭയില് പ്രത്യേക ബ്ലോക്കായി ഇരിക്കുന്നത് അടക്കം ആലോചിക്കുകയാണ് സിപിഐ. അതേസമയം, സമവായ നീക്കങ്ങള് ഇനിയും തുടരും.
പ്രതിപക്ഷ ഉപനേതാവ് പദവി കിട്ടിയേ തീരു എന്ന് സിപിഐ സംസ്ഥാന സെക്രട്ടറി ബിനോയ് വിശ്വം ആദ്യം മാധ്യമങ്ങള്ക്ക് മുന്നിലാണ് പറഞ്ഞത്. ഇക്കാര്യത്തില് ബിനോയ് വിശ്വത്തിന് സിപിഐക്കുളളില് നിന്ന് വലിയ സമ്മര്ദ്ദം ഉണ്ട്.
എല്ഡിഎഫിന് സിപിഐ കൊടുക്കുന്ന പ്രാധാന്യം സിപിഎമ്മും കൊടുക്കണമെന്ന് ബിനോയ് വിശ്വം ചര്ച്ചയ്ക്ക് ശേഷം മാധ്യമങ്ങളോട് പ്രതികരിച്ചു. മുന്നണിയുടെ മുന്നോട്ടുള്ള നല്ല നീക്കത്തിന് സിപിഐ ഒപ്പമുണ്ട്. സിപിഎമ്മും ആ നിലപാട് സ്വീകരിക്കണം.
നിയമസഭയില് എല്ഡിഎഫിന് ആകെ 35 എംഎല്എമാരാണ് ഉള്ളത്. സിപിഎമ്മിന് 26, സിപിഐക്ക് 8, ആര്ജെഡി ഒന്ന്. ഇടതുമുന്നണിയില് സിപിഐക്ക് മാന്യമായ പദവി വേണമെന്നാണ് ആവശ്യം. കെ രാജനെ പ്രതിപക്ഷ ഉപനേതാവാക്കണമെന്നും ഇതില് വ്യക്തതയില്ലാതെ പാര്ലമെന്ററി പാര്ട്ടി യോഗം വിളിക്കരുതെന്നുമാണ് സിപിഐ നിലപാട്.പദവി കിട്ടിയില്ലെങ്കില് വിഷമകരമായ തീരുമാനം എടുക്കേണ്ടി വരുമെന്ന് സിപിഐ നേതൃത്വം നിലപാടെടുക്കുമ്പോഴാണ് സിപിഎം കടുപ്പിക്കുന്നത്.
കെ എന് ബാലഗോപാലാണ് നിലവില് പ്രതിപക്ഷ നിരയിലെ രണ്ടാമന്.നിയമസഭയില് ആദ്യ അടിയന്തര പ്രമേയം അവതരിപ്പിച്ചതും ബാലഗോപാലാണ്. പിണറായി വിജയനെ പ്രതിപക്ഷ നേതാവായി തെരഞ്ഞെടുത്ത കാര്യം പോലും സിപിഐയോട് ചര്ച്ച ചെയ്തില്ല.
