ന്യൂദല്ഹി: സൗദി അറേബ്യയിലെ ഇന്ത്യയുടെ പുതിയ അംബാസിഡറായി 1998 ബാച്ച് ഐഎഫ്എസ് ഉദ്യോഗസ്ഥനായ വിപുല് നിയമിതനായി. നിലവില് ഖത്തറിലെ ഇന്ത്യന് അംബാസിഡറാണ്. വിദേശകാര്യ മന്ത്രാലയത്തില് ജോയിന്റ് സെക്രട്ടറിയായും കെയ്റോ, കൊളംബോ, ജനീവ, ദുബായ് എന്നിവിടങ്ങളിലെ ഇന്ത്യന് മിഷനുകളിലും വിപുല് പ്രവര്ത്തിച്ചിട്ടുണ്ട്.
രാഷ്ട്രീയം, വാണിജ്യം, വികസനം, നിരായുധീകരണം, അന്താരാഷ്ട്ര സുരക്ഷ, മാധ്യമങ്ങള് തുടങ്ങി വിവിധ മേഖലകളില് സമ്പന്നമായ പ്രവൃത്തി പരിചയമുള്ള അദ്ദേഹം ഉടന് ചുമതലയേറ്റെടുക്കുമെന്ന് പ്രതീക്ഷിക്കുന്നുവെന്ന് വിദേശകാര്യ മന്ത്രാലയം അറിയിച്ചു. പശ്ചിമേഷ്യയിലെ അസ്ഥിരമായ ഭൗമരാഷ്ട്രീയ പ്രതിസന്ധിയുടെ പശ്ചാത്തലത്തില് ഇത് ഒരു നിര്ണായക നിയമനമായി കണക്കാക്കപ്പെടുന്നു.
