റിയോ ഡി ജനൈറോ: ദീര്ഘമായ 24 വര്ഷങ്ങള് !. മറ്റൊരു ലോക കിരീടത്തിനായി ലോകത്തെ ഏറ്റവും സക്സസ്ഫുള്ളായ ടീം കാത്തിരിക്കുകയാണ്. ഇത്തവണ ബ്രസീലിന് ലോക കിരീടം ലഭിക്കുമോ? ഒരുപക്ഷേ പ്രതീക്ഷയുടെ അമിത ഭാരമില്ലാതെ ബ്രസീല് ടീം റിയോ ഡി ജനൈറോയില്നിന്ന് അമേരിക്കയിലേക്ക് യാത്ര തിരിച്ചു.
ബ്രസീലിയന് ഫുട്ബോള് കോണ്ഫെഡറേഷന്റെ നേതൃത്വത്തില് ആവേശോജ്വലമായ യാത്രയയ്പ്പാണ് ടീമിനു നല്കിയത്. നിരവധി ആരാധകരും ടീമിനെ യാത്രയയക്കാന് വിമാനത്താവളത്തിലെത്തിയിരുന്നു. പുറപ്പെടുന്നതിനു മുമ്പായി, ലോക ഫുട്ബോളില് തങ്ങളാരാണെന്ന് അടയാളപ്പെടുത്തിയ നിമിഷങ്ങളിലേക്ക് ഓരോ കളിക്കാരനെയും കൊണ്ടുപോകുന്നതിനായി അത്യുജ്വലമായ കാഴ്ചകളായിരുന്നു ബ്രസീലിയന് ഫുട്ബോള് അധികാരികള് ഒരുക്കിയത്. ബ്രസീലിന്റെ ഫുട്ബോള് പ്രൗഢി വെളിവാകുന്ന ബ്രസീലിയന് ഫുട്ബോള് നാഷണല് മ്യൂസിയം ഓരോ കളിക്കാരനെയും കണിച്ചു. ബ്രസീല് നേടിയ അഞ്ച് ലോക കിരിടങ്ങള് അവിടെ ഷോക്കേസ് ചെയ്തിട്ടുണ്ട്. പെലെയും ഗാരിഞ്ചയും ദിദിയും ബെബറ്റോയും റൊമാരിയോയും റൊണാള്ഡോയും റിവാല്ഡോയുമൊക്കെ ഉയര്ത്തിയ കിരീടങ്ങള് അവിടെയുണ്ടായിരുന്നു. ആ ലോക കിരീടങ്ങളുടെ തെളിമയില് ഓരോ കളിക്കാരന്റെയും മുഖത്ത് ആത്മവിശ്വാസമുണര്ന്നു. തങ്ങളാരായിരുന്നു എന്ന് ഓരോ കളിക്കാരനും മനസിലാകുന്ന നിമിഷങ്ങളിലൂടെ പോയി. ആ പാരമ്പര്യത്തിന്റെ പ്രൗഢി കളിക്കാര്ക്ക് വലിയ ആത്മവിശ്വാസം പകരുമെന്ന വിശ്വാസത്തിലാണ് ലോകകപ്പിനു പുറപ്പെടും മുമ്പ് ബ്രസീലിയന് ടീമിന് ഇത്തരത്തിലൊരു മുഹൂര്ത്തം ബ്രസീലിയന് ഫുട്ബോള് കോണ്ഫെഡറേഷന് നല്കിയത്. വിനിഷ്യസും ബ്രൂണോ ഗുമെയ്റസും കസേമിറോയുമൊക്കെ ഏറെ കൗതുകത്തോടെ തങ്ങളുടെ ഗതാകാല മഹിമ വീക്ഷിച്ചു.
പരിശീലകന് കാര്ലോ ആഞ്ചലോട്ടിക്ക് ദേശീയ പതാകയും ലോകകപ്പ് റിപ്ലിക്കയും ബ്രസീലിയന് ഫുട്ബോള് കോണ്ഫെഡറേഷന് അധികൃതര് നല്കി. ശേഷം ടീമംഗങ്ങളുടെ ഫോട്ടോ ഷൂട്ടും നടന്നു. തുടര്ന്ന് അമേരിക്കയിലേക്കുള്ള പ്രത്യേക വിമാനത്തില് ടീം യാത്ര തിരിച്ചു. ന്യൂജഴ്സിയിലെ കൊളംബിയ പാര്ക്കിലാണ് ബ്രസീലിന്റെ പരിശീലന സൗകര്യങ്ങള് ഒരുക്കിയിരിക്കുന്നത്. ഞായറാഴ്ച ന്യൂ ജേഴ്സിയില്വച്ച്സൗഹൃദ മത്സരത്തില് ബ്രസീല് മുഹമ്മദ് സലാ നയിക്കുന്ന ഈജിപ്തിനെ നേരിടും. ജൂണ് 14ന് മൊറോക്കോയ്ക്കെതിരേയാണ് ബ്രസീലിന്റെ ലോകകപ്പിലെ ആദ്യ മത്സരം. ഹെയ്തി, സ്കോട്ലന്ഡ് എന്നീ ടീമുകളാണ് ബ്രസീലിന്റെ മറ്റ് ഗ്രൂപ്പംഗങ്ങള്.
