ആലപ്പുഴ: നവകേരള യാത്രയ്ക്കിടെ യൂത്ത് കോണ്ഗ്രസ് പ്രവര്ത്തകരെ മുന് മുഖ്യമന്ത്രി പിണറായി വിജയന്റെ സുരക്ഷാ ഉദ്യോഗസ്ഥര് മര്ദിച്ച കേസില് പ്രതികളുടെ അറസ്റ്റ് തടയണമെന്ന ആവശ്യം കോടതി അംഗീകരിച്ചില്ല. പ്രതികള് ഒളിവില് അല്ലെന്നും ഹര്ജി പരിഗണിക്കും വരെ അറസ്റ്റ് തടയണമെന്നും പ്രതിഭാഗം കോടതിയില് ആവശ്യപ്പെട്ടു. എന്നാല് ഈ ആവശ്യം കോടതി തള്ളി. പ്രതികളുടെ മുന്കൂര് ജാമ്യാപേക്ഷ പരിഗണിക്കുന്നത് ബുധനാഴ്ചത്തേക്ക് മാറ്റി.
കുറ്റകൃത്യം നടന്ന കേസുകളില് അറസ്റ്റ് തടയാന് ജില്ലാ സെഷന്സ് കോടതിക്ക് അവകാശമില്ലെന്ന് ചൂണ്ടിക്കാട്ടിയാണ് ജഡ്ജി ഹണി എം വര്ഗീസ് പ്രതിഭാഗം ആവശ്യം തള്ളിയത്. ഐപിസി 308 പ്രകാരം ജാമ്യമില്ലാവകുപ്പ് ചുമത്തിയ സാഹചര്യത്തില് വാറണ്ട് ഇല്ലാതെ പ്രതികളെ അറസ്റ്റ് ചെയ്യാനാകും. കേസിലെ പ്രതികളായ അനില് കല്ലിയൂര്, സന്ദീപ്, ഷൈജു, അരുണ്, വിപിന് എന്നിവര് ഒളിവിലാണെന്നാണ് പ്രത്യേക അന്വേഷണ സംഘം പറയുന്നത്. പ്രതികളുടെ മൊബൈല് ഫോണുകള് സ്വിച്ച് ഓഫാണ്.
2023 ഡിസംബറിലാണ് കേസിനാധാരമായ സംഭവമുണ്ടായത്. പിണറായി വിജയന് മുഖ്യമന്ത്രിയായിരിക്കെ നവകേരള യാത്രയ്ക്കിടെ ആലപ്പുഴയില് വെച്ച് കരിങ്കൊടി കാട്ടിയ പ്രവര്ത്തകരെ ഗണ്മാന് അനില് കുമാറും സുരക്ഷാ ഉദ്യോഗസ്ഥരും ചേര്ന്ന് മര്ദ്ദിക്കുകയായിരുന്നു.സംഭവത്തില് ഗണ്മാന് അനില്, എസ്കോര്ട്ട് പൊലീസുകാരായ അരുണ്, വിപിന്, സന്ദീപ് എന്നിവരെ സസ്പെന്റ് ചെയ്തതിരുന്നു.
