തിരുവനന്തപുരം: പത്തുകിലോ കഞ്ചാവുമായി പ്രായപൂർത്തിയാകാത്ത രണ്ട് ആൺകുട്ടികൾ പിടിയിൽ. സിറ്റി പോലീസ് കമ്മിഷണർക്ക് ലഭിച്ച രഹസ്യ വിവരത്തിന്റെ അടിസ്ഥാനത്തിൽ പോലീസ് നടത്തിയ പരിശോധനയിൽ തിരുവനന്തപുരം ഈഞ്ചക്കലിൽ നിന്നുമാണ് ഇവർ പിടിയിലാകുന്നത്.
തമിഴ്നാട്ടിൽ നിന്നോ ആന്ധ്രയിൽ നിന്നോ ആണ് കഞ്ചാവെത്തിച്ചതെന്നാണ് പോലീസ് സംശയിക്കുന്നത്. ബൈക്കിൽ വരികയായിരുന്ന പ്രതികളെ തിരുവനന്തപുരം സിറ്റി ഡാൻസാഫ് സംഘം പിടികൂടുകയായിരുന്നു. സ്കൂളുകൾ കേന്ദ്രീകരിച്ച് കഞ്ചാവ് വിൽക്കാനാണ് ഇവർ ലക്ഷ്യമിട്ടിരുന്നതെന്നാണ് പോലീസിന്റെ സംശയം. പ്രതികളെ ഫോർട്ട് പോലീസിന് കൈമാറി.
ലഹരി വേട്ടക്കായി ആഭ്യന്തര വകുപ്പ് നടപ്പാക്കുന്ന ‘ഓപ്പറേഷൻ തൂഫാൻ; ദ നാർക്കോ ഹണ്ടിന്’ ഇന്ന് തുടക്കമായിരിക്കുകയാണ്. ഇതിന്റെ ഭാഗമായി സംസ്ഥാനത്തുടനീളം പരിശോധനകളും ആരംഭിച്ചിട്ടുണ്ട്.
