ചെന്നൈ: താന് ബിജെപി വിട്ട് പുതിയ പാര്ട്ടി രൂപീകരിക്കുമെന്ന് പ്രചരിച്ച അഭ്യൂഹം തള്ളി തമിഴ്നാട് ബിജെപി നേതാവ് അണ്ണാമലൈ. കേന്ദ്രനേതാക്കളുമായി ചര്ച്ചയ്ക്കായി അടിയന്തരമായി ദല്ഹിയ്ക്ക് പോയിരിക്കുകയാണ് അണ്ണാമലൈ. അടുത്ത രണ്ട് ദിവസം താന് ദല്ഹിയില് ചര്ച്ചകളിലായിരിക്കുമെന്നും ദയവായി അഭ്യൂഹങ്ങള് പരത്തരുതെന്നും അണ്ണാമലൈ പറഞ്ഞു.
തമിഴ്നാടിനെ ദേശീയതയുമായി ബന്ധിപ്പിക്കുക എന്ന ദൗത്യമേറ്റെടുത്ത നേതാവാണ് അണ്ണാമലൈ. അതിനാല് അദ്ദേഹത്തിന് തന്റെ ജീവിതദൗത്യത്തില് നിന്നും എളുപ്പം മാറാന് കഴിയില്ലെന്ന പലരും അഭിപ്രായപ്പെട്ടിരുന്നു. അത് ശരിയാണെന്ന് തെളിയിക്കുന്നതാണ് അണ്ണാമലൈയുടെ ദല്ഹിയാത്ര.
കഴിഞ്ഞ ദിവസങ്ങളിലാണ് അണ്ണാമലൈ ബിജെപി വിടുമെന്നും പുതിയ പാര്ട്ടി രൂപീകരിക്കുമെന്നും ദേശീയ മാധ്യമങ്ങളില് വാര്ത്ത പ്രത്യക്ഷപ്പെട്ടത്. ഇതേ തുടര്ന്ന് വലിയ ചര്ച്ചകള്ക്ക് മാധ്യമങ്ങല് തുടക്കം കുറിച്ചിരുന്നു. അതിനിടയിലാണ് പുതിയ സംഭവവികാസം.
ദല്ഹിയിലേക്ക് പോകാന് വേണ്ടി ചെന്നൈ എയര്പോര്ട്ടില് എത്തിയ അണ്ണാമലൈയുടെ കാറില് ബിജെപി കൊടിയില്ലെന്ന് വരെ ദേശീയ മാധ്യമങ്ങള് കണ്ടെത്തല് നടത്തിയിരിക്കുകയാണ.് എങ്ങിനെയെങ്കിലും അണ്ണാമലൈ എന്ന നേതാവിനെ ബിജെപിയില് നിന്നും പുറത്തുചാടിക്കണമെന്ന നിര്ബന്ധബുദ്ധിയോടെയാണ് എന്ഡിടിവി ഉള്പ്പെടെയുള്ള ദേശീയ മാധ്യമങ്ങള് ശ്രമിക്കുന്നത്. ബിജെപി ദേശീയ നേതാവ് നിതിന് നബീര് രാജ്യസഭാ സീറ്റ് വാഗ്ദാനം ചെയ്തെങ്കിലും 41കാരനായ അണ്ണാമലൈ അത് നിരസിച്ചുവെന്നും ദേശീയ മാധ്യമങ്ങള് കെട്ടിച്ചമച്ച വാര്ത്തകളില് പറയുന്നു.
ഉടനെ രാജ്യസഭയില് ഒഴിവുവരുന്ന 15 രാജ്യസഭാസീറ്റുകളില് ഒരെണ്ണം അണ്ണാമലൈയ്ക്ക് നല്കുമെന്നും അദ്ദേഹത്തെ കേന്ദ്രമന്ത്രിയാക്കുമെന്നും ഒരു അഭ്യൂഹം നേരത്തെ പരന്നിരുന്നു. തമിഴ്നാട് നിയമസഭാ തെരഞ്ഞെടുപ്പിന് തൊട്ടുമുന്പ് തമിഴ്നാട് ബിജെപി അധ്യക്ഷസ്ഥാനത്ത് നിന്നും ബിജെപി അണ്ണാമലൈയെ മാറ്റിയിരുന്നു. ബിജെപിയുമായി ചേര്ന്ന് സഖ്യമുന്നണി രൂപീകരിക്കണമെങ്കില് അണ്ണാമലൈയ്ക്ക് പകരം മറ്റൊരാളെ ബിജെപി സംസ്ഥാന അധ്യക്ഷനാക്കണമെന്ന എഐഎഡിഎംകെ നേതാവ് പളനിസ്വാമിയുടെ നിര്ദേശപ്രകാരമായിരുന്നു ഇത്തരമൊരു നീക്കം. ദ്രാവിഡ പാര്ട്ടികളില് ഏതെങ്കിലും ഒരെണ്ണമില്ലെങ്കില് തമിഴ്നാട്ടില് അടിസ്ഥാന ചലനമുണ്ടാക്കാന് സാധിക്കില്ലെന്ന സ്ഥിതിവിശേഷമായിരുന്നു അന്ന്. തെരഞ്ഞെടുപ്പിന് തൊട്ടു മുന്പ് ജയലളിതയെക്കുറിച്ച അണ്ണാമലൈ നടത്തിയ ചില പാമര്ശങ്ങള് വിവാദവുമായി മാറിയിരുന്നു.
