തിരുവനന്തപുരം:നെടുമങ്ങാട് ഒന്നരവയസുകാരന്റെ കൊലപാതകത്തില്‍ പ്രതി രണ്ടാനച്ഛന്‍ അഷ്‌കറിനെതിരെ കൂടുതല്‍ പരാതികള്‍ ഉയര്‍ന്നു.ആദ്യ ഭാര്യ ആമിനയുടെ സഹോദരന്റെ മുങ്ങി മരണം, അഷ്‌കറുമായി വിവാഹം നിശ്ചയിച്ചിരുന്ന മറ്റൊരു യുവതിയുടെ മരണം എന്നിവയില്‍ പ്രതിക്ക് പങ്കുണ്ടെന്നാണ് സംശയം.
ഒന്നരവയസുകാരനെ ക്രൂരമായി ഉപദ്രവിച്ച് കൊലപ്പെടുത്തിയ അഷ്കര് ആദ്യ ഭാര്യ ആമിനയെ മൃതപ്രായയാക്കിയെന്ന് അവരുടെ മാതാവ് പറഞ്ഞു. ഈ യുവതി ഇപ്പോഴും ചികിത്സയിലാണ്. ആദ്യം വിവാഹം നിശ്ചയിച്ചിരുന്ന ചിറയിന്‍കീഴ് സ്വദേശിനി യുവതി ജീവനൊടുക്കിയത് വിവാഹബന്ധത്തില്‍ നിന്ന് അഷ്കര് പിന്മാറിയതോടെയാണ്.ഇതിന് പിന്നാലെയാണ് ആമിനയെ വിവാഹം കഴിച്ചത്. ആമിനയെ ക്രൂരമായി ഉപദ്രവിച്ച് കോമയിലാക്കിയെന്ന പരാതിക്ക് പുറമേ ആമിനയുടെ സഹോദരന്റെ മരണത്തിലും ദുരൂഹതയുണ്ടെന്ന് ബന്ധുക്കള്‍ ആരോപിച്ചു.
ആമിനയെ സന്ദര്‍ശിച്ച മന്ത്രി ബിന്ദുകൃഷ്ണ, കൊല്ലപ്പെട്ട കുഞ്ഞിന്റെ അച്ഛന്റെ മാതാപിതാക്കളെയും കണ്ടു. കുഞ്ഞിന്റെ അമ്മ അഖിലയുടെ അമ്മയെയും വീട്ടിലെത്തി കണ്ടു. കുഞ്ഞിനെ വിട്ടുകിട്ടണമെന്ന പരാതിയിലും അഷ്‌കറിനെതിരായ ആമിനയുടെയും പരാതിയിലും പൊലീസ് വീഴ്ച വരുത്തിയെന്ന് മന്ത്രി പറഞ്ഞു.
കൊല്ലപ്പെട്ട കുഞ്ഞിന്റെ അച്ഛന്‍ ആത്മഹത്യ ചെയ്തത് ഗര്‍ഭിണിയായിരിക്കെ അഖില പിണങ്ങിപ്പോയതിന് പിന്നാലെയാണ്. ഇതും അന്വേഷിക്കുന്നുണ്ട്. കൈ കൊണ്ടും വടി കൊണ്ടും കുഞ്ഞിനെ അഷ്കര് അടിക്കുന്നത് കണ്ടിരുന്നെന്നാണ് അഖില മൊഴി നല്‍കിയത്. എന്നിട്ടും കുഞ്ഞിനെ സംരക്ഷിക്കാന്‍ അഖില ശ്രമിച്ചില്ല. അഷ്കറിന്റെ ബന്ധുക്കള്‍ കുഞ്ഞിനെ ഉപദ്രവിച്ചിരുന്നോ എന്നും അന്വേഷിക്കുന്നുണ്ട്.
