ബ്രസീലിയ: ലോകകപ്പ് ഫുട്‌ബോള്‍ 2026ലേക്ക് അടുത്തുകൊണ്ടിരിക്കെ ലോക ഫുട്‌ബോള്‍ പ്രേമികളുടെ പ്രിയ താരം ബ്രസീലിന്റെ നെയ്മറിന് വീണ്ടും പരിക്ക്. വലത് കാലിന്റെ പേശിയിലാണ് പരിക്കേറ്റിട്ടുള്ളത്. മെഡിക്കല്‍ സംഘത്തിന്റെ നിര്‍ദേശം രണ്ടാഴ്ച്ച(14 ദിവസം) വിശ്രമം വേണമെന്നാണ്.
ദിവസങ്ങള്‍ക്ക് മുമ്പ് ബ്രസീല്‍ പരിശീലകന്‍ കാര്‍ലോ ആഞ്ചെലോട്ടി പ്രഖ്യാപിച്ച ടീമില്‍ പ്രധാന താരമായി നെയ്‌മര്‍ ഉള്‍പ്പെട്ടിരുന്നു. ടീം ലോകകപ്പിനും അതിന് മുന്നോടിയായുള്ള സന്നാഹ മത്സരങ്ങള്‍ക്കും തയ്യാറെടുക്കുന്നതിനിടെയാണ് നെയ്‌മറുടെ പരിക്ക് വിവരം പുറത്താകുന്നത്.
34കാരനായ നെയ്‌മറുട കളി ജീവിതത്തില്‍ നിരവധി തവണയാണ് പരിക്ക് കയ്യേറിയിട്ടുള്ളത്. ലയണല്‍ മെസിക്കും ക്രിസ്റ്റ്യാനോ റൊണാള്‍ഡോയ്‌ക്കുമൊപ്പം സമീപ കാല ലോക ഫുട്‌ബോളില്‍ ഉയര്‍ന്നുവരേണ്ട നെയ്‌മറുടെ കരിയര്‍ പരിക്കില്‍പെട്ട് പലതണ ചിന്നിചിതറിയത് ലോകം കണ്ടിട്ടുണ്ട്. ബ്രസീല്‍ ആതിഥേയരായ 2014 ലോകകപ്പില്‍ നെയ്‌മര്‍ പരിക്കേറ്റ് പുറത്തായതിന് തൊട്ടടുത്ത മത്സരത്തിലാണ് ബ്രസീല്‍ പരാജയപ്പെട്ടത്. അന്ന് മുതല്‍ തുടര്‍ച്ചയായി മൂന്ന് ലോകകപ്പുകളില്‍ ബ്രസീല്‍ ടീം കളത്തിലിറങ്ങിയത് നെയ്‌മറുടെ ചിറകിലേറിയാണ്.
ലോകകപ്പിന് മുന്നോടിയായി രണ്ട് സന്നാഹ മത്സരങ്ങളാണ് ബ്രസീലിനുള്ളത്. തിങ്കളാഴ്‌ച്ച പാനമയ്‌ക്കെതിരെയും അടുത്ത ഞായറാഴ്‌ച്ച ഈജിപ്തിനെതിരെയുമാണ്.
ലോകകപ്പില്‍ ഗ്രൂപ്പ് സിയില്‍ ഉള്‍പ്പെട്ട ബ്രസീലിന്റെ ആദ്യ മത്സരം 14ന് മൊറോക്കോയ്‌ക്കെതിരെ നടക്കും. പിന്നീട് ഹെയ്തി(20ന്), സ്‌കോട്ട്‌ലന്‍ഡ്(25) ടീമുകള്‍ക്കെതിരെ മത്സരങ്ങള്‍ നടക്കും.
