ബംഗളുരു : കര്ണാടകത്തില് മുഖ്യമന്ത്രി സിദ്ധരാമയ്യ രാജിവച്ചേക്കുമെന്ന് അഭ്യൂഹം.ഉപമുഖ്യമന്ത്രി ഡി കെ ശിവകുമാര് മുഖ്യമന്ത്രി പദവി ആവശ്യപ്പെട്ട് കോണ്ഗ്രസ് ഹൈക്കമാന്ഡില് സമ്മര്ദ്ദം ശക്തമാക്കിയതിനെ തുടര്ന്ന് ചൊവ്വാഴ്ച ദല്ഹിയില് മാരത്തോണ് ചര്ച്ച നടന്നിരുന്നു.
രാഹുല് ഗാന്ധിയും കോണ്ഗ്രസ് ദേശീയ അധ്യക്ഷന് മല്ലികാര്ജുന് ഖര്ഗെയും സിദ്ധരാമയ്യയുമായും ഡി കെ ശിവകുമാറുമായും ഒന്നിച്ചും ഒറ്റയ്ക്കും ചര്ച്ചകള് നടത്തി. എന്നാല് മുഖ്യമന്ത്രി ചര്ച്ചയുമായി ബന്ധപ്പെട്ട അഭ്യൂഹങ്ങള് തള്ളിയായിരുന്നു എഐസിസി ജനറല് സെക്രട്ടറി കെ സി വേണുഗോപാലിന്റെ മാധ്യമങ്ങളോടുളള പ്രതികരണം . കര്ണാടകയിലെ രാജ്യസഭ, തദ്ദേശ തിരഞ്ഞെടുപ്പുകളുടെ കാര്യം മാത്രമാണ് ചര്ച്ചയായതെന്നാണ് കെ സി വേണുഗോപാല് പറഞ്ഞത്.
എന്നാല് യോഗത്തില് കര്ണാടകയിലെ മുഖ്യമന്ത്രിപദം ഡി കെ ശിവകുമാറിനായി ഒഴിഞ്ഞുനല്കണമെന്ന് ഹൈക്കമാന്ഡ് സിദ്ധരാമയ്യയോട് ആവശ്യപ്പെട്ടെന്നാണ് വിവരം. ദല്ഹിയില് ഉന്നത പദവിയും രാജ്യസഭ സീറ്റില് മത്സരിപ്പിക്കാമെന്നും സിദ്ധരാമയ്യയോട് വാഗ്ദാനം ചെയ്തതെന്നാണ് സൂചന. എന്നാല് സിദ്ധരാമയ്യ ഇതുവരെ സമ്മതം മൂളിയിട്ടില്ല. സിദ്ധരാമയ്യയുമായി നാളെയും കോണ്ഗ്രസ് ഹൈക്കമാന്ഡ് ചര്ച്ച നടത്താന് സാധ്യതയുണ്ടെന്നാണ് വിവരം.
ഹൈക്കമാന്ഡ് തീരുമാനത്തില് സിദ്ധരാമയ്യ പക്ഷത്തിന് കടുത്ത അതൃപ്തിയുണ്ട്. തന്നെ മാറ്റിയാല് ദളിത് നേതാവ് പരമേശ്വരയെ മുഖ്യമന്ത്രി ആക്കണമെന്ന് സിദ്ധരാമയ്യ ആവശ്യപ്പെട്ടതായാണ് അറിയുന്നത്. എ ഐ സി സി അധ്യക്ഷന് മല്ലികാര്ജുന ഖാര്ഗെ മുഖ്യമന്ത്രിയാകണമെന്ന വാദവും ഉയര്ന്നിരുന്നു.
