ഒട്ടേറെ വിപ്ലവകരമായ കാര്യങ്ങള്‍ രാജ്യത്തിനായി നരേന്ദ്ര മോദി സര്‍ക്കാര്‍ നടപ്പാക്കി. 370-ാം വകുപ്പ് റദ്ദാക്കിയതും കശ്മീരില്‍ ഭീകരവാദത്തിന്റെ വേരറുത്തും മാവോയിസ്റ്റ് ഭീഷണി ഇല്ലാതാക്കിയതുമെല്ലാം മോദി സര്‍ക്കാരിന്റെ ഭരണ നേട്ടങ്ങളിലെ നാഴികക്കല്ലുകളാണ്. ശാസ്ത്രം, ബഹിരാകാശ ഗവേഷണം, പ്രതിരോധമേഖല ഉള്‍പ്പെടെ വിവിധ രംഗങ്ങളില്‍ രാജ്യം കുതിച്ചുചാട്ടം നടത്തിക്കൊണ്ടിരിക്കുന്നു. വികസിത ഭാരതമെന്ന സ്വപ്‌നത്തിന്റെ സാക്ഷാത്കാരമാണ് നടന്നുകൊണ്ടിരിക്കുന്നതെന്ന് ചുരുക്കത്തില്‍ പറയാനാകും.
രാജ്യത്തെ വിവിധ മേഖലകള്‍ മുമ്പെങ്ങുമില്ലാത്തവിധം പുരോഗമിക്കുകയാണ്. സാമ്പത്തിക രംഗത്തെ പുരോഗതി പ്രത്യേകം എടുത്തു പറയേണ്ടിവരും. നോട്ട് നിരോധനത്തിലൂടെ കള്ളപ്പണം നിയന്ത്രിക്കാനായത് വലിയ നേട്ടമായി. കൊവിഡിനെ ഭാരതം അതിജീവിച്ചത് ലോകത്തിനാകെ മാതൃകയാണ്. മറ്റു രാജ്യങ്ങള്‍ക്കുപോലും കൊവിഡ് വാക്‌സിന്‍ നല്‍കിയതിലൂടെ വാസ്തവത്തില്‍ ‘വസുധൈവ കുടുംബകം’ എന്ന ഭാരതീയ ദര്‍ശനം പ്രാവര്‍ത്തികമാക്കുകയായിരുന്നു മോദി സര്‍ക്കാര്‍.
രാജ്യത്തിന്റെ ശത്രുക്കള്‍ക്കും രാഷ്‌ട്രവിരുദ്ധര്‍ക്കുമുള്ള താക്കീതാണ് പാകിസ്ഥാന് കൊടുത്ത മറുപടി. എക്കാലത്തും അവര്‍ക്കു പാഠമാകും ഇത്. പാകിസ്ഥാന് ഒഴികെയുള്ള ഇസ്ലാമിക രാജ്യങ്ങള്‍ മോദിയെ അവരുടെ ഹീറോയും സുഹൃത്തുമൊക്കെയായി കരുതുന്നു. അതുകൊണ്ടുതന്നെ അവരുടെ ഉയര്‍ന്ന ബഹുമതികള്‍ നല്‍കി അദ്ദേഹത്തെ ആദരിക്കുകയും ചെയ്യുന്നുണ്ട്.
നെഹ്‌റുവിനു ശേഷം തുടര്‍ച്ചയായി മൂന്നാം തവണയും പ്രധാനമന്ത്രിയായത് നരേന്ദ്ര ദാമോദര്‍ ദാസ് മോദി മാത്രം. ഒന്നരപ്പതിറ്റാണ്ട് ഗുജറാത്ത് മുഖ്യമന്ത്രിയായിരുന്നതിന്റെ ഭരണപരിചയത്തില്‍ അദ്ദേഹം രാജ്യത്തെ മാറ്റിമറിക്കുന്ന കാഴ്ചയാണ് കണ്ടുകൊണ്ടിരിക്കുന്നത്. കഴിവിന്റെ മാത്രം അടിസ്ഥാനത്തില്‍ ഓരോ വകുപ്പിനും യോജിച്ച മന്ത്രിമാരെ നിയോഗിച്ച്് ഭരണരംഗത്ത് പുതിയ മാതൃക കാട്ടി. ഒരു രാഷ്‌ട്രീയപാര്‍ട്ടിയിലും അംഗമല്ലാതിരുന്ന എസ്. ജയശങ്കറെപ്പോലുള്ള പ്രതിഭാശാലികളെ കണ്ടെത്തി ഭരണരംഗത്തേക്ക് കൊണ്ടുവന്നു. അങ്ങനെയുള്ളവരുടെ കഴിവ് രാജ്യത്തിനായി മോദി പ്രയോജനപ്പെടുത്തുന്നതും കണ്ടുകൊണ്ടിരിക്കുന്നു.
ജന്മഭൂമി ഓണ്‍ലൈന്‍