ന്യൂദല്ഹി: അന്തരിച്ച ഭര്ത്താവും നടനുമായ ധര്മ്മേന്ദ്രയ്ക്കുള്ള പത്മവിഭൂഷണ് പുരസ്കാരം രാഷ്ട്രപതിയില് നിന്നും വേദനയോടെ ഏറ്റുവാങ്ങി നടി ഹേമമാലിനി. കലാരംഗത്തെ സംഭാവനകള് മുന്നിര്ത്തിയായിരുന്നു പത്മവിഭൂഷണ് നല്കിയത്.
പ്രധാനമന്ത്രി മോദി, ആഭ്യന്തരമന്ത്രി അമിത് ഷാ, ഉപരാഷ്ട്രപതി സി.പി. രാധാകൃഷ്ണന് എന്നിവര് പങ്കെടുത്ത ചടങ്ങിലാണ് രാഷ്ട്രപതി ദ്രൗപതി മുര്മു അവാര്ഡ് സമ്മാനിച്ചത്.
രാഷ്ട്രപതി ഭവന്റെ ഗണതന്ത്ര മണ്ഡപത്തിലായിരുന്നു ചടങ്ങ്. പരസ്യരംഗത്തെ അതികായനായ ഈയിടെ അന്തരിച്ച പീയൂഷ് പാണ്ഡെ, വനിതാ ക്രിക്കറ്റ് താരം ഹര്മന്പ്രീത് കൗര് എന്നിവരും പുരസ്കാരങ്ങള് വാങ്ങാനെത്തിയിരുന്നു.
2026ല് അഞ്ച് പത്മവിഭൂഷണ്, 13 പത്മഭൂഷണ്, 113 പത്മശ്രീ അവാര്ഡുകള് പ്രഖ്യാപിച്ചിരുന്നു. അവശേഷിക്കുന്ന പത്മ അവാര്ഡുകള് അടുത്ത ചടങ്ങില് സമ്മാനിക്കും.
