കോഴിക്കോട്: ക്ഷേത്രങ്ങള് ആദ്ധ്യാത്മികതയുടെ മാത്രമല്ല, ഭൗതികവളര്ച്ചയുടെയും കേന്ദ്രങ്ങളാകണമെന്ന് മുന് ഡിജിപി ഡോ. ടി.പി. സെന്കുമാര്.
കേരള ക്ഷേത്ര സംരക്ഷണ സമിതി വാര്ഷിക സമ്മേളനവും മാധവ്ജി ജന്മശതാബ്ദി ആഘോഷവും ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. ഭൗതിക വളര്ച്ചയുടെ കൂടി കേന്ദ്രമായാല് മാത്രമേ യുവാക്കളെ ക്ഷേത്രങ്ങളിലേക്ക് ആകര്ഷിക്കാന് സാധിക്കൂ. യുവജനതയെ നയിക്കാന് പര്യാപ്തമായ രീതിയില് പ്രവര്ത്തിക്കണമെങ്കില് ഭൗതികമായ നേട്ടങ്ങള് ഉണ്ടാവണം. പുതിയ സര്ക്കാര് അതിനുവേണ്ടിയുള്ള പ്രവര്ത്തനങ്ങള് ചെയ്യണം. കേന്ദ്ര സര്ക്കാര് യുവജനതയ്ക്കായി നിരവധി പദ്ധതികള് കൊണ്ടുവന്നിട്ടുണ്ട്. അതിനെ കുറിച്ച് ബോധവല്കരണം നടത്തുന്നതിനൊപ്പം സനാതന ധര്മം കൂടി പഠിപ്പിക്കണം. അങ്ങനെയൊരു സംവിധാനം ഉണ്ടായാല് മാത്രമേ ക്ഷേത്രങ്ങള്ക്ക് നിലനില്പ്പുണ്ടാകു.
ക്ഷേത്രങ്ങളുടെ നിയന്ത്രണം വിശ്വാസികളുടെ കൈകളിലെത്തണം. വിശ്വാസികള്ക്ക് ഒരിക്കലും ക്ഷേത്രസ്വത്ത് തട്ടിയെടുക്കാന് സാധിക്കില്ല. ശബരിമല വിഷയം അതിന് ഉദാഹരണമാണ്. ക്ഷേത്രങ്ങള് വിശ്വാസികളിലേക്ക് എത്താന് ഭരണഘടന അനുസരിച്ച് ഒരു നിയമമുണ്ടാക്കാന് കേന്ദ്ര സര്ക്കാരില് സമ്മര്ദം ചെലുത്തണം. അല്ലാത്തപക്ഷം ക്ഷേത്രങ്ങള് അന്യാധീനപ്പെട്ടുപോകാനും ഹൈന്ദവ സമൂഹം തന്നെ ഇല്ലാതാകാനും സാധ്യതയുണ്ടെന്നും അദ്ദേഹം പറഞ്ഞു.
രാവിലെ ‘ശാഖാസമിതി പ്രവര്ത്തനവും പ്രവര്ത്തകരും’ എന്ന വിഷയം സംസ്ഥാന ഉപാധ്യക്ഷന് എം. മോഹനന് അവതരിപ്പിച്ചു. സമിതി രക്ഷാധികാരി ഡോ. വിജയരാഘവന് അധ്യക്ഷനായി. സംസ്ഥാന ഓഡിറ്റര് ഇ. കുഞ്ഞിരാമന് സ്വാഗതവും മാതൃസമിതി സംസ്ഥാന സമിതി അംഗം കനകലത നന്ദിയും പറഞ്ഞു.
വാര്ഷിക സമ്മേളനത്തില് സംസ്ഥാന അധ്യക്ഷന് മുല്ലപ്പള്ളി കൃഷ്ണന് നമ്പൂതിരി അധ്യക്ഷനായി. സംസ്ഥാന ജനറല് സെക്രട്ടറി കെ.എസ്. നാരായണന് വാര്ഷിക റിപ്പോര്ട്ട് അവതരിപ്പിച്ചു. സംസ്ഥാന ട്രഷറര് വി.എസ്. രാമസ്വാമി വാര്ഷിക വരവുചെലവ് കണക്ക് അവതരിപ്പിച്ചു. സംസ്ഥാന സെക്രട്ടറി വി.കെ. ചന്ദ്രന് സ്വാഗതവും മാതൃസമിതി സംസ്ഥാന ജോയിന്റ് സെക്രട്ടറി ദീപാ മേനോന് നന്ദിയും പറഞ്ഞു.
