കൊല്ക്കത്ത: ബംഗാളില് ആയുഷ്മാന് ഭാരത് ഹെല്ത്ത് കാര്ഡുകള് ജൂലൈ മുതല് വിതരണം ചെയ്യുമെന്ന് പ്രഖ്യാപിച്ച് മുഖ്യമന്ത്രി സുവേന്ദു അധികാരി. മമത ബാനര്ജി മുഖ്യമന്ത്രിയായിരുന്ന മുന് സര്ക്കാര് ഈ ആരോഗ്യ പരിരക്ഷാ കാര്ഡ് സംസ്ഥാനത്ത് നടപ്പിലാക്കാന് വിസമ്മതിച്ചിരുന്നു. ഏഴ് വര്ങ്ങള്ക്ക് ശേഷമാണ് കേന്ദ്രത്തിന്റെ പ്രധാന ആരോഗ്യ ഇന്ഷുറന്സ് പദ്ധതിയിലേക്ക് ബംഗാള് സംസ്ഥാനം തിരിച്ചെത്തുന്നത്.
ബംഗാള് മുഖ്യമന്ത്രി സുവേന്ദു അധികാരിയും കേന്ദ്ര ആരോഗ്യമന്ത്രി ജെ.പി. നഡ്ഡയും തമ്മിലുള്ള വെര്ച്വല് കൂടിക്കാഴ്ചയ്ക്ക് ശേഷമാണ് ഈ പ്രഖ്യാപനം. സംസ്ഥാനത്തെ പൊതുജനാരോഗ്യ മേഖലയെ പുനരുജ്ജീവിപ്പിക്കുന്നതിനായി കേന്ദ്രത്തില് നിന്ന് ഈ സാമ്പത്തിക വര്ഷത്തില് ഏകദേശം 3,000 കോടി രൂപയുടെ അനുമതി ലഭിച്ചതായും അതില് 500 കോടി രൂപ ഇതിനകം കൈമാറിയതായും സുവേന്ദു വ്യക്തമാക്കി.
സര്ക്കാര് നടത്തുന്ന സ്വാസ്ഥ്യ സതി പദ്ധതിയില് നിലവില് ഉള്പ്പെട്ടിരിക്കുന്ന ഏകദേശം ആറ് കോടി ഗുണഭോക്താക്കളെ ആയുഷ്മാന് ഭാരതിന് കീഴില് കൊണ്ടുവരുമെന്ന് അദ്ദേഹം പറഞ്ഞു. ബംഗാളിലെ താമസക്കാര്ക്ക് മാത്രമല്ല, രാജ്യത്തിന്റെ മറ്റിടങ്ങളില് ജോലി ചെയ്യുന്ന സംസ്ഥാനത്തെ ആളുകള്ക്കും ഈ ആനുകൂല്യങ്ങള് നല്കുമെന്ന് അദ്ദേഹം പറഞ്ഞു.
ഇതിന് പുറമേ സംസ്ഥാനത്തിനുള്ള വിശാലമായ ആരോഗ്യ പാക്കേജും മുഖ്യമന്ത്രി പ്രഖ്യാപിച്ചു. ഏഴ് ലക്ഷത്തിലധികം വാക്സിന് ഡോസുകള് കേന്ദ്രം ബംഗാളിലേക്ക് വിതരണം ചെയ്യും. മെയ് 30ന് കൊല്ക്കത്തയിലെ ബിധാന്നഗര് ആശുപത്രിയില് നിന്ന് ക്യാമ്പയിന് ആരംഭിക്കും.
2018 സപ്തംബര് 23ന് ബംഗാളിലാണ് ആയുഷ്മാന് ഭാരത് പദ്ധതി ആരംഭിച്ചതെങ്കിലും അന്നത്തെ തൃണമുല് കോണ്ഗ്രസ് സര്ക്കാര് ഇതില് നിന്ന് പിന്മാറിയിരുന്നു.
