തിരുവനന്തപുരം: ആരോഗ്യ മേഖലയില് ധാര്മികമായ പെരുമാറ്റം ഉണ്ടായില്ലെങ്കില് വികസിത ഭാരതം സാക്ഷാത്കരിക്കാന് കഴിയില്ലെന്ന് കേന്ദ്ര ആരോഗ്യ കുടുംബക്ഷേമ മന്ത്രാലയം സെക്രട്ടറി പുണ്യ സലില ശ്രീവാസ്തവ. ശ്രീചിത്ര തിരുനാള് ഇന്സ്റ്റിറ്റ്യൂട്ട് ഫോര് മെഡിക്കല് സയന്സസ് ആന്ഡ് ടെക്നോളജിയിലെ 42-ാമത് വാര്ഷിക ബിരുദദാന ചടങ്ങില് മുഖ്യാതിഥിയായി സംസാരിക്കുകയായിരുന്നു അവര്.
ധാര്മികമായ പെരുമാറ്റം ഭാരതത്തെ ശക്തമാക്കും. എല്ലാവരുടെയും ക്ഷേമത്തിന് ഊന്നല് നല്കുക എന്നതാണ് ദേശീയ ആരോഗ്യനയം. സാംക്രമികേതര രോഗങ്ങളുടെ നേരത്തെയുള്ള നിര്ണയം, മാനസികാരോഗ്യം, പാലിയേറ്റീവ്, ജെറിയാട്രിക് കെയര് എന്നിവ പ്രാഥമിക ആരോഗ്യ കേന്ദ്രങ്ങളില് നടത്താന് സാധിച്ചതായും പുണ്യ സലീല ശ്രീവാസ്തവ പറഞ്ഞു. ശ്രീചിത്രയുടെ സുവര്ണ ജൂബിലി ലോഗോയും സെക്രട്ടറി പ്രകാശനം ചെയ്തു.
കേന്ദ്ര ശാസ്ത്ര സാങ്കേതിക വകുപ്പ് സഹമന്ത്രി ജിതേന്ദ്ര സിംഗ് വീഡിയോ സന്ദേശം നല്കി. ഭാരത് ബയോടെക് ഇന്റര്നാഷണല് ലിമിറ്റഡ് ചെയര്മാന് ഡോ. കൃഷ്ണ ചടങ്ങില് വിശിഷ്ടാതിഥിയായി. ഇന്സ്റ്റിറ്റ്യൂട്ട് പ്രസിഡന്റ് സേനാപതി ക്രിസ് ഗോപാലകൃഷ്ണന് ചടങ്ങില് അദ്ധ്യക്ഷത വഹിച്ചു.
130 സീനിയര് റെസിഡന്റുമാര്ക്കും വിദ്യാര്ത്ഥികള്ക്കും അദ്ദേഹം ബിരുദദാനം നിര്വഹിച്ചു. കാര്ഡിയോളജി വിഭാഗം മേധാവി ഡോ. കെ. കെ. നാരായണന് നമ്പൂതിരി, ഹ്യൂമന് സ്പെയ്സ് ഫ്ളൈറ്റ് സെന്റര് ഡയറക്ടര് ദിനേശ് കുമാര് സിങ്, ഡയറക്ടര് ഡോ. സഞ്ജയ് ബെഹാരി, ഡീന് ഡോ. ശ്രീനിവാസന്, മെഡിക്കല് സൂപ്രണ്ട് ഡോ. കവിത രാജ, ബിഎംടി വിങ് തലവന് ഡോ. ഹരികൃഷ്ണ വര്മ്മ എന്നിവര് സംസാരിച്ചു.
