കറാച്ചി : പാകിസ്ഥാനിലെ വടക്കുപടിഞ്ഞാറൻ പ്രവിശ്യയായ ഖൈബർ പഖ്തൂൺഖ്വയിൽ സായുധ സംഘങ്ങൾ തമ്മിലുള്ള ഏറ്റുമുട്ടലിൽ 14 തീവ്രവാദികൾ കൊല്ലപ്പെടുകയും നിരവധി പേർക്ക് പരിക്കേൽക്കുകയും ചെയ്തു.
അഫ്ഗാനിസ്ഥാന്റെ അതിർത്തിയോട് ചേർന്നുള്ള മധ്യ കുറം ജില്ലയിലെ മനാറ്റോ കമ്രാൻ പ്രദേശത്ത് സ്വയം പ്രഖ്യാപിത തീവ്രവാദ കമാൻഡർമാരായ കാസിമിന്റെയും മുംതാസ് ഇംതിയുടെയും നേതൃത്വത്തിലുള്ള ഗ്രൂപ്പുകൾ തമ്മിൽ ഏറ്റുമുട്ടലുണ്ടായതായി പോലീസ് പറഞ്ഞു.
വെടിവയ്പ്പിൽ മുംതാസ് ഇംതിയും കൊല്ലപ്പെട്ടതായി പോലീസ് പറഞ്ഞു.
തുടർന്ന് ഏറ്റുമുട്ടലിനുശേഷം നാട്ടുകാർ മൃതദേഹങ്ങൾ പ്രദേശത്ത് തന്നെ സംസ്കരിച്ചു. നിരവധി തീവ്രവാദ ഗ്രൂപ്പുകളുടെ സാന്നിധ്യമുണ്ടെന്ന റിപ്പോർട്ടുകൾ പുറത്തുവന്നതോടെ മധ്യ കുറാമിൽ അടുത്തിടെ സൈന്യം നിരവധി ഓപ്പറേഷനുകൾ നടത്തിയിരുന്നു.
അഫ്ഗാനിസ്ഥാനുമായി അതിർത്തി പങ്കിടുന്ന പാകിസ്ഥാനിലെ ഖൈബർ പഖ്തൂൺഖ്വ പ്രവിശ്യ വളരെ അസ്ഥിരമായ ഒരു പ്രദേശമാണ്. പർവതപ്രദേശങ്ങളും ദുഷ്കരവുമായ അതിർത്തി വളരെക്കാലമായി തീവ്രവാദ ഗ്രൂപ്പുകളുടെ നീക്കത്തിന് സഹായകമായിട്ടുണ്ട്. അഫ്ഗാൻ യുദ്ധങ്ങളും ഇവിടെ നേരിട്ട് സ്വാധീനം ചെലുത്തിയിട്ടുണ്ട്. അഫ്ഗാനിസ്ഥാനിലെ സംഘർഷങ്ങൾക്കിടയിൽ നിരവധി സ്വയം പ്രഖ്യാപിത തീവ്രവാദ സംഘടനകൾ ഇവിടെ ഉയർന്നുവന്നിട്ടുണ്ട്.
