റോം: അഞ്ച് വിദേശ രാജ്യങ്ങളുടെ ഔദ്യോഗിക പര്യടനത്തിന്റെ അവസാന ഘട്ടമായി ഇറ്റലിയിലെത്തിയ ഇന്ത്യൻ പ്രധാനമന്ത്രി നരേന്ദ്ര മോദിക്ക് റോമിൽ ഊഷ്മളമായ സ്വീകരണം. “റോമിലേക്ക് സ്വാഗതം എന്റെ സുഹൃത്തേ” എന്ന വാക്കുകളോടെ ഇറ്റാലിയൻ പ്രധാനമന്ത്രി ജോർജ്ജിയ മെലോണി അദ്ദേഹത്തെ നേരിട്ടെത്തി സ്വീകരിക്കുകയും റോമിലെ ചരിത്രപ്രസിദ്ധമായ കൊളോസിയത്തിന് മുന്നിൽ വെച്ച് ഇരുവരും സൗഹൃദം പങ്കുവെക്കുകയും ചെയ്തു. മോദിയ്ക്ക് ഇറ്റാലിയൻ പ്രധാനമന്ത്രി അത്താഴ വിരുന്നും ഒരുക്കി.
റോമിലെ വിമാനത്താവളത്തിൽ ഇറങ്ങിയ പ്രധാനമന്ത്രി മോദിയെ ഇറ്റലിയുടെ ഡെപ്യൂട്ടി പ്രധാനമന്ത്രിയും വിദേശകാര്യ-അന്താരാഷ്ട്ര സഹകരണ മന്ത്രിയുമായ അന്റോണിയോ താജാനി നേരിട്ടെത്തിയാണ് സ്വീകരിച്ചത്. ഇറ്റലി സന്ദർശനത്തിനിടെ പ്രധാനമന്ത്രി മോദി ഇറ്റാലിയൻ പ്രസിഡന്റ് സെർജിയോ മാറ്ററെല്ലയുമായും പ്രധാനമന്ത്രി ജോർജ്ജിയ മെലോണിയുമായും ഇരുരാജ്യങ്ങളും തമ്മിലുള്ള ഉഭയകക്ഷി സഹകരണം ശക്തമാക്കുന്നതിനെക്കുറിച്ച് വിശദമായ ചർച്ചകൾ നടത്തും.
സന്ദർശനത്തിനിടയിൽ വത്തിക്കാൻ സിറ്റിയിൽ മാർപ്പാപ്പയുമായി പ്രധാനമന്ത്രി കൂടിക്കാഴ്ച നടത്തിയേക്കുമെന്നാണ് സൂചന. കൂടാതെ, റോം ആസ്ഥാനമായുള്ള യു.എൻ ഭക്ഷ്യ-കൃഷി സംഘടനയുടെ (FAO) ആസ്ഥാനവും അദ്ദേഹം സന്ദർശിക്കും. ഇരുരാജ്യങ്ങളിലെയും പ്രമുഖ ബിസിനസ്സ് വ്യവസായ പ്രമുഖരുമായി നടത്തുന്ന സംവാദത്തോടെ പ്രധാനമന്ത്രിയുടെ സന്ദർശനം സമാപിക്കും.
