റോം: അബദ്ധത്തിൽ ചവറ്റുകുട്ടയിൽ ഉപേക്ഷിച്ച 10 ലക്ഷം യൂറോയുടെ ലോട്ടറി ടിക്കറ്റ് മാലിന്യക്കൂമ്പാരത്തിൽ നിന്ന് തിരഞ്ഞുപിടിച്ച് തപ്പിയെടുത്തു. ദക്ഷിണ ഇറ്റലിയിലെ ബിറ്റോന്റോ സ്വദേശിക്കാണ് തികച്ചും അത്ഭുതകരമായ രീതിയിൽ തന്റെ ഭാഗ്യം തിരികെ ലഭിച്ചത്.കടയിൽ ചെന്ന് ടിക്കറ്റ് പരിശോധിച്ചപ്പോൾ “പണം നൽകാൻ കഴിയില്ല” എന്ന സന്ദേശമാണ് മെഷീനിൽ തെളിഞ്ഞത്. ഇതോടെ ടിക്കറ്റിന് അടിച്ച തുക ലഭിക്കില്ലെന്ന് തെറ്റിദ്ധരിച്ച് ഇയാൾ ടിക്കറ്റ് കടയിലെ ചവറ്റുകുട്ടയിൽ ഉപേക്ഷിക്കുകയായിരുന്നു. സമ്മാനത്തുക വളരെ വലുതാകുമ്പോൾ മെഷീനിൽ തെളിയുന്ന സന്ദേശമായിരുന്നു അത്.
വീട്ടിലെത്തിയ ഇയാൾ താൻ സ്ഥിരമായി എടുക്കുന്ന നമ്പറുകളായ 2, 4, 8, 10, 51 എന്നിവയ്ക്ക് തന്നെയാണ് ഒന്നാം സമ്മാനം ലഭിച്ചതെന്ന് വീട്ടുകാർ ചൂണ്ടിക്കാണിച്ചപ്പോഴാണ് അബദ്ധം തിരിച്ചറിഞ്ഞത്. തുടർന്ന് ഇയാളും കുടുംബവും കടയിലെത്തിയെങ്കിലും അപ്പോഴേക്കും നഗരസഭയുടെ മാലിന്യ വണ്ടി ടിക്കറ്റ് ശേഖരിച്ചു കൊണ്ടുപോയിരുന്നു. ഉടൻ തന്നെ മാലിന്യശേഖരണ കമ്പനിയായ എസ്.എ.എൻ.ബിയെ വിവരമറിയിച്ചു.
ഞായറാഴ്ചയായതിനാൽ മാലിന്യങ്ങൾ ലാൻഡ്ഫില്ലിലേക്ക് മാറ്റി സംസ്കരിച്ചിരുന്നില്ല. ഒരു വലിയ മാലിന്യ ലോറിയിലെ ടൺ കണക്കിന് അവശിഷ്ടങ്ങൾക്കിടയിലാണ് ഉദ്യോഗസ്ഥർ തിരച്ചിൽ ആരംഭിച്ചത്. രണ്ടുദിവസം നീണ്ടുനിന്ന കഠിനശ്രമത്തിനൊടുവിൽ ചൊവ്വാഴ്ച രാവിലെയോടെ കീറിയ ഒരു കവറിനുള്ളിൽ നിന്ന് യാതൊരു കേടുപാടുകളും കൂടാതെ ഇവർ വിജയിച്ച ലോട്ടറി ടിക്കറ്റ് കണ്ടെടുത്തു. മാലിന്യങ്ങൾക്കിടയിൽ നിന്ന് ടിക്കറ്റ് കണ്ടെത്താൻ ചെലവായ തുക വിജയിയിൽ നിന്ന് ഈടാക്കുമെന്ന് കമ്പനി മേധാവി അറിയിച്ചു.
