കോഴിക്കോട് 17, തൃച്ചിയില് 28 പേര്ക്കാണ് അവസരം
കരാര് നിയമനം മൂന്നു വര്ഷത്തേക്ക്; ഓണ്ലൈനില് അപേക്ഷ ജൂണ് 8 വരെ
യോഗ്യത: ഫസ്റ്റ് ക്ലാസ് ബിരുദം, പ്രായപരിധി 27 വയസ്
വിശദവിവരങ്ങള് www.aaiclas.aero/career ല്
എയര്പോര്ട്സ് അതോറിറ്റി ഓഫ് ഇന്ത്യ (എഎഐ) കാര്ഗോ ലോജിസ്റ്റിക്സ് ആന്റ് അലൈഡ് സര്വ്വീസസ് കമ്പനി ലിമിറ്റഡ് പരസ്യ നമ്പര് 01/2026 പ്രകാരം കോഴിക്കോട്, തൃച്ചി, പാറ്റ്ന, ഉദയ്പൂര്, ഡറാഡൂണ്, കൊല്ക്കത്ത എയര്പോര്ട്ട്/സ്ഥലങ്ങളിലേക്ക് സെക്യൂരിറ്റി സ്ക്രീനര് (ഫ്രഷര്) തസ്തികയില് മൂന്നുവര്ഷത്തെ കരാര് നിയമനത്തിന് അപേക്ഷ ക്ഷണിച്ചു. വിമാനത്താവളത്തിലെ കാര്ഗോ-ലോജിസ്റ്റിക്സ് വിഭാഗത്തിലേക്കാണ് നിയമനം. കോഴിക്കോട് 17, തൃച്ചി 28 ഉള്പ്പെടെ ആകെ 158 ഒഴിവുകളുണ്ട്. വിശദവിവരങ്ങളടങ്ങിയ വിജ്ഞാപനം www.aaiclas.aero/career ല് നിന്നും ഡൗണ്ലോഡ് ചെയ്യാം.
യോഗ്യത: 60 ശതമാനം മാര്ക്കില് കുറയാതെ അംഗീകൃത സര്വ്വകലാശാലാ ബിരുദം. പട്ടികജാതി/വര്ഗ വിഭാഗങ്ങള്ക്ക് 55 ശതമാനം മതി. ഇംഗ്ലീഷ്, ഹിന്ദി ഭാഷകളിലും പ്രാദേശിക ഭാഷയിലും വായിക്കാനും സംസാരിക്കാനും കഴിയണം. പ്രായപരിധി 1.5.2026 ല് 27 വയസ്. എസ്സി/എസ്ടി/ഒബിസി-എന്സിഎല്, വിമുക്തഭടന്മാര് വിഭാഗങ്ങള്ക്ക് നിയമാനുസൃത വയസിളവുണ്ട്.
അപേക്ഷാ ഫീസ് 750 രൂപ. വനിതകള്, എസ്സി/എസ്ടി/ഇഡബ്ല്യുഎസ് വിഭാഗങ്ങള്ക്ക് 100 രൂപ. ബാങ്ക് ചാര്ജ്, നികുതികൂടി നല്കേണ്ടതുണ്ട്. ക്രെഡിറ്റ്/ ഡെബിറ്റ് കാര്ഡ്, യുപിഐ, വാലറ്റ്, നെറ്റ് ബാങ്കിങ് വഴി ഓണ്ലൈനായി ഫീസ് അടയ്ക്കാം. ഓണ്ലൈനില് ജൂണ് 8 നകം അപേക്ഷിക്കണം. അപേക്ഷാ സമര്പ്പണത്തിനുള്ള നിര്ദ്ദേശങ്ങളും സെലക്ഷന് നടപടികളും വിജ്ഞാപനത്തിലുണ്ട്.
തെരഞ്ഞെടുക്കപ്പെടുന്ന ഫ്രഷേഴ്സിന് പരിശീലനകാലം പ്രതിമാസം 15,000 രൂപ സ്റ്റൈപ്പന്റ് ലഭിക്കും. പരിശീലനം വിജയകരമായി പൂര്ത്തിയാക്കുന്നവരെ കരാര് അടിസ്ഥാനത്തില് മൂന്നു വര്ഷത്തേക്ക് നിയമിക്കും. ആദ്യവര്ഷം പ്രതിമാസം 30,000 രൂപയും രണ്ടാം വര്ഷം 32,000 രൂപയും മൂന്നാം വര്ഷം 34,000 രൂപയുമാണ് ശമ്പളം. പ്രോവിഡന്റ് ഫണ്ട്, മെഡിക്കല് ഇന്ഷുറന്സ്, ഗ്രാറ്റുവിറ്റി ആനുകൂല്യങ്ങളും ലഭിക്കും. കൂടുതല് വിവരങ്ങള്ക്കും അപ്ഡേറ്റുകള്ക്കും വെബ്സൈറ്റ് സന്ദര്ശിക്കേണ്ടതാണ്.
