കോട്ടയം: അധികാരത്തിന്റെ ചുവടുപിടിച്ച് കേരളത്തില്‍ മറ്റൊരു മാറാട് സൃഷ്ടിക്കാനുള്ള മുസ്ലിം ലീഗിന്റെ ശ്രമം അനുവദിക്കില്ലെന്ന് എസ്എന്‍ഡിപി യോഗം മീനച്ചില്‍ യൂണിയന്‍ ചെയര്‍മാന്‍ സുരേഷ് ഇട്ടിക്കുന്നേല്‍.മീനച്ചില്‍ യൂണിയന്‍ നേതൃത്വത്തില്‍ പാലായില്‍ നടത്തിയ പ്രതിഷേധ യോഗം ഉദ്ഘാടനം ചെയ്യുകയായിരുന്നു അദ്ദേഹം.
വിഡി സതീശനെ മുഖ്യമന്ത്രിയായി പ്രഖ്യാപിച്ചതിന് പിന്നാലെ തൊടുപുഴയില്‍ മുസ്ലീം ലീഗ് പ്രവര്‍ത്തകര്‍ നടത്തിയ പ്രകടനത്തില്‍ വെള്ളാപ്പള്ളി നടേശനും എന്‍എസ്എസ് ജനറല്‍ സെക്രട്ടറി ജി സുകുമാരന്‍ നായര്‍ക്കുമെതിരെ മോശമായ പദപ്രയോഗങ്ങളുമായി മുദ്രാവാക്യങ്ങള്‍ ഉയര്‍ന്നിരുന്നു. ഇതിനെതിരായാണ് എസ്എന്‍ഡിപി യോഗം മീനച്ചില്‍ യൂണിയന്‍ പ്രതിഷേധം സംഘടിപ്പിച്ചത്. മുസ്ലീം ലീഗ് സംസ്ഥാന പ്രസിഡന്റ് പാണക്കാട് സാദിഖലി തങ്ങളുടെ കോലവും കത്തിച്ചു
മതസാഹോദര്യത്തിന്റെ മണ്ണില്‍ വര്‍ഗീയ കലാപങ്ങള്‍ നടത്താനുള്ള മനഃപൂര്‍വമായ ശ്രമങ്ങളാണ് ലീഗിന്റെ ഭാഗത്തുനിന്നുണ്ടായിരിക്കുന്നതെന്ന് സുരേഷ് ഇട്ടിക്കുന്നേല്‍ ആരോപിച്ചു. എസ്.എന്‍.ഡി.പി. യോഗം ജനറല്‍ സെക്രട്ടറി വെള്ളാപ്പള്ളി നടേശനെ ഒറ്റതിരിഞ്ഞ് ആക്രമിക്കാന്‍ ലീഗിനെ അനുവദിക്കില്ല. ഇതിന് ശ്രമിക്കുന്നവരെ ലീഗ് നേതൃത്വം നിലയ്‌ക്കുനിര്‍ത്തണം.
കേരളത്തില്‍ ഏറ്റവും കൂടുതല്‍ രക്തസാക്ഷി മണ്ഡപം ഉള്ളത് ഈഴവരുടെ പേരിലാണ്. വെള്ളാപ്പള്ളിയെ തടഞ്ഞാല്‍ മുസ്ലീം ലീഗ് നേതാക്കളെ വഴിയില്‍ തടയുമെന്നും സുരേഷ് ഇട്ടിക്കുന്നേല്‍ പറഞ്ഞു. നിയമസഭാ തെരഞ്ഞെടുപ്പില്‍ കടുത്തുരുത്തിയിലെ ബിഡിജെഎസ് സ്ഥാനാര്‍ഥിയായിരുന്നു ഇദ്ദേഹം.
