ന്യൂഡൽഹി : സനാതനധർമ്മത്തെ ഉന്മൂലനം ചെയ്യണമെന്ന ഡിഎംകെ നേതാവ് ഉദയനിധി സ്റ്റാലിന്റെ പ്രസ്താവനയെ പിന്തുണച്ച് കോൺഗ്രസ് നേതാവും മുൻ രാജ്യസഭാ എംപിയുമായ ഹുസൈൻ ദൽവായ് . സനാതന ധർമ്മത്തിന്റെ ഉന്മൂലനത്തെക്കുറിച്ചുള്ള ഉദയനിധി സ്റ്റാലിന്റെ പരാമർശങ്ങൾ ശരിയാണെന്നും സനാതന ധർമ്മവും ഹിന്ദുമതവും തമ്മിൽ യാതൊരു ബന്ധവുമില്ലെന്നുമാണ് ഹുസൈൻ ദൽവായുടെ പരാമർശം.
“സനാതന ധർമ്മം ബ്രാഹ്മണർക്ക് മാത്രമുള്ള ഒരു മതമാണ്. അത് ഹിന്ദുമതത്തിന്റെ അനുയായികളെ ഉൾക്കൊള്ളുന്നില്ല. ബഹുജൻ സമൂഹം ഇത് മനസ്സിലാക്കേണ്ടത് നിർണായകമാണ്. സ്റ്റാലിന്റെ മകൻ പറഞ്ഞത് തികച്ചും ശരിയാണ്. ഈ സനാതന ധർമ്മം ഈ രാജ്യത്തെ നശിപ്പിക്കും. സനാതന ധർമ്മം ജാതിവ്യവസ്ഥയും ബ്രാഹ്മണ മേധാവിത്വവും സ്ഥാപിച്ചു. ഇപ്പോൾ, അവർ ആ ശക്തി പുനഃസ്ഥാപിക്കാൻ ശ്രമിക്കുന്നു.” എന്നാണ് ഹുസൈൻ ദൽവായ് പറയുന്നത് .മുൻപ് ആർ എസ് എസിനെ നിരോധിക്കണമെന്ന് ആവശ്യപ്പെട്ട നേതാവാണ് ദല്വായ്.
തമിഴ്നാട് നിയമസഭയിൽ മുഖ്യമന്ത്രി വിജയ്യുടെ മുന്നിൽ വെച്ചാണ് ഉദയനിധി ജനങ്ങളെ ഭിന്നിപ്പിക്കുന്ന സനാതനധർമ്മത്തെ തുടച്ചുനീക്കണം എന്ന് ആവശ്യപ്പെട്ടത് . നേരത്തെ, മുൻ സർക്കാരിൽ ഉപമുഖ്യമന്ത്രിയായിരുന്ന സമയത്ത് ഉദയനിധി, സനാതന ധർമ്മത്തെ ഡെങ്കിപ്പനി, മലേറിയ എന്നിവയുമായി താരതമ്യം ചെയ്യുകയും ഈ രോഗങ്ങൾ തുടച്ചുനീക്കുന്നതുപോലെ സനാതന ധർമ്മവും തുടച്ചുനീക്കണമെന്ന് പറയുകയും ചെയ്തിരുന്നു. ഉദയനിധിയുടെ പ്രസ്താവന അന്ന് വലിയ കോളിളക്കം സൃഷ്ടിച്ചു. ഈ വിഷയത്തിൽ അദ്ദേഹത്തിനെതിരെ കേസ് പോലും ഫയൽ ചെയ്തിരുന്നു
