ചെന്നൈ: നടി തൃഷക്കെതിരെ അധിക്ഷേപകരമായ പരാമര്ശം നടത്തിയെന്ന കേസില് കസ്റ്റഡിയിലായ ഉദയനിധി സ്റ്റാലിനെ ചോദ്യം ചെയ്യലിന് ശേഷം ഇന്ന് തന്നെ സ്റ്റേഷന് ജാമ്യത്തില് വിട്ടയക്കാന് തമിഴ്നാട് പൊലീസിന് മദ്രാസ് ഹൈക്കോടതി നിര്ദ്ദേശം നല്കി. അതേസമയം അന്വേഷണത്തോട് പൂര്ണ്ണമായി സഹകരിക്കണമെന്ന് കോടതി ഉദയനിധിയോട് ആവശ്യപ്പെടുകയും ചെയ്തു. തഞ്ചാവൂരില് കാവേരി നദീജല പ്രശ്നത്തില് സംഘടിപ്പിച്ച പ്രതിഷേധത്തിനിടെ നടത്തിയ പരാമര്ശത്തില് ടിവികെയുടെ പരാതിയിലാണ് പൊലീസ് ഉദയനിധിയെ നീലാങ്കരൈയിലെ വസതിയില് നിന്ന് കസ്റ്റഡിയിലെടുത്തത്. കസ്റ്റഡിയിലെടുത്ത ഉടന് ഉദയനിധി ഹൈക്കോടതിയില് മുന്കൂര് ജാമ്യാപേക്ഷ നല്കി. ഇതേത്തുടര്ന്നാണ് ഉദയനിധിയെ ചോദ്യം ചെയ്ത ശേഷം ഇന്ന് തന്നെ ജാമ്യത്തില് വിട്ടയക്കണമെന്ന് കോടതി നിര്ദ്ദേശിച്ചത്. ചോദ്യം ചെയ്ത ശേഷം വിട്ടയ്ക്കാമെന്ന് തമിഴ്നാട് അഡ്വക്കറ്റ് ജനറല് ഹൈക്കോടതിയെ അറിയിക്കുകയും ചെയ്തു.
