കോഴിക്കോട്: ഒ.വി. വിജയന്റെ സാഹിത്യത്തെ മാറ്റിനിര്ത്താന് മലയാളത്തില് ശ്രമം നടക്കുന്നുവെന്ന് പ്രൊഫ.കെ.പി. ശശിധരന്. തപസ്യ സാംസ്കാരികോത്സവത്തില് ഒ.വി. വിജയന്റെ സാഹിത്യദര്ശനം എന്ന വിഷയത്തില് നടന്ന സാഹിത്യ വിചാരത്തില് അദ്ധ്യക്ഷത വഹിക്കുകയായിരുന്നു അദ്ദേഹം.
വിജയനോടുള്ള എതിര്പ്പല്ല മറിച്ച് അദ്ദേഹത്തിന്റെ കഥകളിലെ പ്രമേയത്തെ ഭയന്നാണ് അദ്ദേഹത്തിന്റെ കൃതികളെ അരികിലേക്ക് മാറ്റിനിര്ത്താന് ശ്രമം നടക്കുന്നത്. ഒ.വി. വിജയന്റെ എല്ലാ നോവലുകളും ആര്ഷചിന്തയിലേക്ക് നയിക്കുന്നു. അത് ഗുരുസാഗരത്തില് മാത്രമല്ല. ആദ്യ നോവലായ ഖസാക്കിന്റെ ഇതിഹാസത്തില് തന്നെ ഗുരുസാഗരത്തിന്റെ വിത്ത് കിടക്കുന്നുണ്ട്. ഗുരുസാഗരം മലയാളത്തിലെ ഇതിഹാസമാണ്. സ്വന്തം മകള് തന്റെ ഗുരുവായി മാറുന്നതാണ് ഗുരു സാഗരത്തിന്റെ പ്രമേയം. മലയാള നോവല് സാഹിത്യത്തിലെ പാരമ്പര്യത്തിന്റെ വീണ്ടെടുപ്പാണ് വിജയന്റെ കൃതികള്. ഒരു പുതിയ ഭാഷ സൃഷ്ടിക്കാന് വിജയന് കഴിഞ്ഞു അദ്ദേഹം പറഞ്ഞു. ആഷാമേനോന് സാഹിത്യ വിചാരം ഉദ്ഘാടനം ചെയ്തു.
ഒ.വി. വിജയനില് അന്തര്ലീനമായ ഒരു ആദ്ധ്യാത്മിക പ്രേരണയുണ്ടെന്ന് ആഷാമേനോന് പറഞ്ഞു. അദ്ദേഹത്തിന്റെ എല്ലാ നോവലുകളിലും ഇത് ഉണ്ട്. ഖസാക്കില് രവിയുടെ ആത്മീയതയെ കുറിച്ച് ആരും ഒന്നും പറഞ്ഞിട്ടില്ല. രവിയുടെ ഉള്ക്കാഴ്ചയെന്താണ്, അയാള് എന്താണ് തേടുന്നത്, എന്താണ് പൊരുള് എന്ന് ആരും ചിന്തിച്ചില്ല. ഗുരുസാഗരം മതാത്മകമാണെന്ന ആരോപണം മ്ലേഛമാണ്. അതില് മതാത്മകതയല്ല. മറിച്ച് യോഗത്മകതയാണുള്ളത്. മനുഷ്യനെ മാത്രമല്ല, മറ്റ് ജീവജാലങ്ങളെയും അദ്ദേഹം ആവിഷ്കരിക്കുന്നു. അത് ഹൈന്ദവ ദര്ശനമാണ്. അദ്ദേഹം പറഞ്ഞു.
മനസ്സിന്റെ സൂക്ഷ്മാംശങ്ങളും ചലനങ്ങളും പകര്ത്തിയ എഴുത്താണ് വിജയന്റേതെന്ന് റഷീദ് പാനൂര് പറഞ്ഞു. മലയാളത്തിന്റെ ഭാഷാപരമായ പരിമിതി കൊണ്ടാണ് വിജയന്റെ എഴുത്ത് ലോകസാഹിത്യത്തില് എത്താതിരുന്നത്. വിജയന്റെ ധര്മ്മപുരാണം സമഗ്രാധിപത്യത്തെ ശക്തമായി എതിര്ക്കുന്നു. അതിനദ്ദേഹം ഉപയോഗിച്ചത് വിസ്ഫോടനത്തിന്റെ ഭാഷാ ശൈലിയാണ്. അദ്ദേഹം പറഞ്ഞു. കൃത്രിമത്വവും നാട്യങ്ങളുമില്ലാതെ സത്യസന്ധമായി എഴുതാന് ഒ.വി. വിജയന് കഴിഞ്ഞുവെന്ന് ശ്രീജിത്ത് മൂത്തേടത്ത് പറഞ്ഞു.
ഭാരതീയത ഹൈന്ദവതയാണെന്ന തിരിച്ചറിവ് പരസ്യമായി പറയാന് അദ്ദേഹം മടികാണിച്ചില്ല. ഇതു കാരണം അദ്ദേഹം ഏറെ ആക്രമിക്കപ്പെട്ടു. വാക്കിലും വരിയിലും ഏറെ അര്ത്ഥതലങ്ങള് സൃഷ്ടിക്കാന് അദ്ദേഹത്തിന് കഴിഞ്ഞു. സാമൂഹ്യവിമര്ശനത്തിന് കാര്ട്ടൂണുകളെ ഫലപ്രദമായി ഉപയോഗിച്ചു. കള്ച്ചറല് കാര്ട്ടൂണെന്ന പുതിയ ശാഖതന്നെ ആരംഭിച്ചു. അദ്ദേഹം പറഞ്ഞു.
യുവ എഴുത്തുകാര്ക്കുള്ള ചെറുകഥാ മത്സരവിജയിക്കുള്ള ഒ.വി. വിജയന് പുരസ്ക്കാരം മാധ്യമ പ്രവര്ത്തകന് മിഥുന് അയ്യപ്പന് ഏറ്റുവാങ്ങി. സാഹിത്യ വിചാരത്തോടനുബന്ധിച്ച് ബിയോണ്ട് ദ ബ്ലാക്ക് ബോര്ഡ് ചിത്രകാരന്മാരുടെ കൂട്ടായ്മ ഒ.വി. വിജയന്റെ ഗുരുസാഗരം നോവലിന്റെ ചിത്രവിഷ്ക്കാരണം നടത്തി. സുരേഷ് ഉണ്ണി ,രാംദാസ് കക്കട്ടില്, ഹാറൂണ് അല് ഉസ്മാന്, പി. സതീഷ്കുമാര് എന്നിവര് രചനയില് പങ്കെടുത്തു. ഡോ. ലക്ഷ്മി ദാസ്, പി.ജി. ഗോപാലകൃഷ്ണന് എന്നിവര് സംസാരിച്ചു
